A Crónicas syalelcꞌochi “yabꞌixal ebꞌ vin̈ rey”. A chabꞌ libro Crónicas tic, syalcot tas syal dꞌa chabꞌ slibro vin̈aj Samuel yedꞌ pax tas tzꞌibꞌabꞌilcan dꞌa juntzan̈ libro yabꞌixal ebꞌ vin̈ rey. Palta man̈ masaniloc tas syal dꞌa juntzan̈ libro chiꞌ syal pax dꞌa chabꞌ libro tic. A dꞌa jun mach tzꞌibꞌjinac jun libro tic te nivan yelcꞌoch yabꞌixal vin̈aj rey David, vin̈aj rey Salomón, yabꞌixal stemplo Dios yedꞌ yabꞌixal tas yopisio ebꞌ sacerdote. Syalanpaxi to a vin̈aj rey David icꞌjinaccanel yich yic sbꞌochaj stemplo Dios yedꞌ sleyal, vachꞌchom a vin̈aj Salomón bꞌoannac.

A vin̈aj Josafat, vin̈aj Ezequías yedꞌ vin̈aj Josías, chꞌoxnabꞌil yaj ebꞌ vin̈, yujto te nivan yelcꞌoch Jehová dꞌa yol sat ebꞌ vin̈. An̈ej dꞌa Jehová tzꞌoch ebꞌ vin̈ ejmelal ayic sjavi yaelal dꞌa scal ebꞌ. Te bꞌinajnac ebꞌ vin̈ oxvan̈ tic, yujto a ebꞌ vin̈ cuchbꞌannacxi bꞌat spensar ebꞌ anima dꞌa Jehová. Ayic ayoch juntzan̈xo ebꞌ vin̈ rey dꞌa yopisio, te tzijtum ebꞌ anima tzꞌoch ejmelal dꞌa juntzan̈ comon dios. A mach tzꞌibꞌjinaccan juntzan̈ tic, schꞌoxcaneli to vachꞌchom te nivan juntzan̈ yaelal ix javi dꞌa yibꞌan̈ chon̈abꞌ Israel yedꞌ dꞌa yibꞌan̈ chon̈abꞌ Judá, palta a Dios naann̈ej strato yacꞌnac yedꞌ schon̈abꞌ chiꞌ, ix eln̈ejcꞌoch tas nabꞌil chiꞌ yuuj.

A dꞌa capítulo 1 masanto dꞌa 9, syalcot tas yaj stzolal smam yicham junjun macan̈ ebꞌ. A yabꞌixal schamel vin̈aj Saúl, syalcot dꞌa capítulo 10. Axo dꞌa capítulo 11 masanto dꞌa 29, syalcot yuj tas ajnac yacꞌan reyal vin̈aj David. Syalanpaxcot tastac janac dꞌa yibꞌan̈ vin̈ yedꞌ tas ajnac yicꞌan yip yopisio vin̈. Yacꞌnacvaloch vin̈ dꞌa scꞌool smolbꞌancan tastac cꞌanchajnac ayic sbꞌonac stemplo Jehová. Sbꞌoannaccan slistail ebꞌ bꞌojinac templo chiꞌ vin̈. Yacꞌannaccan masanil juntzan̈ chiꞌ vin̈ abꞌenal dꞌa yol scꞌabꞌ vin̈aj Salomón. A juntzan̈ tic syal dꞌa capítulo 22 masanto dꞌa 29.