A jun libro tic, aton stzꞌacubꞌ bꞌabꞌel libro yic yabꞌixal ebꞌ vin̈ rey. A jun bꞌabꞌel libro a dꞌa yabꞌixal vin̈aj Josafat sreyal Judá yedꞌ vin̈aj Ocozías sreyal Israel slajvicani. Ix uji jun chiꞌ ayic 850 abꞌil manto javi Jesucristo. Axo pax jun schabꞌil libro tic, schael yich yalan yuj slajvubꞌ yopisio vin̈aj Elías schecabꞌ Dios yedꞌ pax tas ix aj schaanel yich yopisio vin̈aj Eliseo, aton vin̈ ochnaccan sqꞌuexuloc vin̈aj Elías chiꞌ. A jun bꞌabꞌel macan̈ dꞌa jun libro tic, syalcot yabꞌixal chabꞌ nación, aton Judá yedꞌ Israel, masanto ix acꞌji ganar Israel yuj ebꞌ asirio, aton dꞌa abꞌil 721 yic manto javi Jesucristo. Aton syalcot capítulo 1 masanto dꞌa 17. Axo schabꞌil macan̈, syalcot yabꞌixal Judá, masanto ix acꞌji ganar Jerusalén dꞌa abꞌil 586 yic manto javi Jesucristo, ayic ix icꞌjibꞌat ebꞌ dꞌa Babilonia. Ix yactancan schon̈abꞌ ebꞌ, axo juntzan̈xo ebꞌ, a dꞌa Egipto xidꞌnaquecꞌ jun tiempoal ebꞌ. Slajvicꞌoch jun libro tic yedꞌ yabꞌixal vin̈aj Gedalías gobernador dꞌa Judá, ayic aycan ebꞌ dꞌa yalan̈ smandar Babilonia, aton juntzan̈ tic syal dꞌa capítulo 18 masanto dꞌa capítulo 25.