Bꞌabꞌel libro yabꞌixal ebꞌ rey sbꞌi jun libro tic. A dꞌay tzꞌibꞌabꞌilcan yabꞌixal chon̈abꞌ Israel. Junn̈ej chon̈abꞌ yaj dꞌa yalan̈ smandar vin̈aj rey David ayic te ichamvinacxo vin̈. Ayic toxo scham vin̈, axo vin̈aj Salomón yuninal vin̈ yacꞌcanoch sqꞌuexuloc dꞌa reyal, tzꞌilchaj dꞌa capítulo 1 masanto dꞌa capítulo 2.12. Ayic ayoch vin̈aj Salomón chiꞌ reyal, te ochnac val vin̈ bꞌeyumal, aton syalcot dꞌa capítulo 2.13 masanto dꞌa capítulo 11.43. Te levanbꞌinac bꞌaj cꞌochnac smojonal smacbꞌen vin̈. Malaj junoc mach yal slajbꞌannac sbꞌa yedꞌ vin̈. A sbꞌeyumal vin̈ yedꞌ sjelanil, te bꞌinajnac dꞌa jun tiempoal chiꞌ. Ay juntzan̈ chon̈abꞌ laj sbꞌoqꞌue vin̈. Sbꞌoannacpax spalacio vin̈ yedꞌ stemplo Jehová dꞌa Jerusalén.

Syalcot jun libro tic to malaj stecꞌanil vin̈aj Salomón chiꞌ, yujto te tzijtum ebꞌ ix ix yicꞌnac vin̈. Ochnacpax vin̈ ejmelal dꞌa juntzan̈ sdiosal ebꞌ ix. Yuj val chiꞌ acꞌjinac ganar vin̈ yedꞌ yopisio, javinac oval yedꞌ yaelal dꞌa yibꞌan̈ vin̈, chapoj ajnaccan smacbꞌen vin̈. Aton juntzan̈ tic syalcot dꞌa capítulo 12 masanto dꞌa 22. Syalancot tas tzꞌaj sbꞌey junjun macan̈: Jun macan̈ dꞌa stojolal norte, aton Israel. Junxo macan dꞌa stojolal sur, aton Judá. A jun in̈tilal ebꞌ Judá chiꞌ te nivan yelcꞌoch ebꞌ.

Syalcoti to a ebꞌ vin̈ sreyal Israel maxtzac yacꞌoch spensar ebꞌ vin̈ dꞌa Jehová. Axo ebꞌ vin̈ sreyal Judá chiꞌ chꞌocchꞌoc spensar ebꞌ vin̈, ay ebꞌ vin̈ vachꞌ spensar, ay pax ebꞌ vin̈ chuclaj spensar. A cꞌaybꞌubꞌal tzꞌalji dꞌa ebꞌ vin̈, aton tas tzꞌaj sbꞌeybꞌalan vachꞌil ebꞌ vin̈. Axo ejmelal dꞌa comon dios yedꞌ pitalil, syicꞌcot yaelal. A dꞌa jun tiempoal chiꞌ nivan yelcꞌoch yopisio ebꞌ schecabꞌ Dios. Schecji ebꞌ yuj Dios yic scachan ebꞌ anima ebꞌ yedꞌ ebꞌ vin̈ rey, yic max och ebꞌ ejmelal dꞌa juntzan̈ comon dios. A jun vin̈ schecabꞌ Dios nivan yelcꞌoch sbꞌinaj dꞌa jun libro tic, aton vin̈aj Elías.