A jun libro tic, a stzꞌacubꞌ bꞌabꞌel libro Samuel. A dꞌa capítulo 1 masanto dꞌa 4, ataꞌ syal yuj tas yutejnac vin̈aj David sbꞌabꞌlaj acꞌan reyal dꞌa yol yic Judá. Palta axo jantac jun nación chiꞌ, a dꞌa yalan̈ smandar vin̈aj Is-boset yuninal vin̈aj Saúl aycani. Axo dꞌa capítulo 5 masanto dꞌa 24, syalaꞌ to ayic yacꞌannac oval vin̈aj Is-boset yedꞌ vin̈aj David chiꞌ, svachꞌ ochnaccan vin̈aj David chiꞌ reyal dꞌa yibꞌan̈ masanil chon̈abꞌ ay dꞌa yol smacbꞌen Israel.

Syalanpax jun libro tic to a vin̈aj David te jelan vin̈ dꞌa oval, jelan pax vin̈ yicꞌanchaan̈ schon̈abꞌ. Te vachꞌ yutejnac vin̈ yilan smacbꞌen, yacꞌnac val och vin̈ dꞌa scꞌol stan̈vani yic vachꞌ sbꞌey schon̈abꞌ vin̈ chiꞌ. Scheclajeli to te ayoch spensar vin̈ dꞌa Dios, xajan ebꞌ yetchon̈abꞌ vin̈ yuuj, yuj chiꞌ masanil ebꞌ ix tzalaj yedꞌ vin̈.

Cannac snanabꞌil vin̈aj rey David chiꞌ yuj sbꞌeybꞌal yedꞌ pax tas ajnac yacꞌan reyal vin̈ dꞌa chon̈abꞌ Israel. Yacꞌnacvaloch vin̈ dꞌa scꞌool scuchbꞌan schon̈abꞌ chiꞌ. A jun spensar vin̈ vachꞌ chiꞌ, schꞌoxnabꞌil Cristo yaji, yujto sicꞌbꞌilel yuj Dios to ol javoc yaqꞌuelcꞌoch juntzan̈ tas nivan yelcꞌoch albꞌilcan dꞌa ebꞌ chon̈abꞌ israel.