Schamel vin̈aj Saúl yedꞌ ebꞌ yuninal
31
Ix och ebꞌ filisteo yacꞌ oval yedꞌ ebꞌ israel, ix el lemnaj ebꞌ israel chiꞌ, tzijtum ebꞌ ix cham dꞌa Gilboa. 2 Ix bꞌatn̈ej ebꞌ filisteo dꞌa spatic vin̈aj Saúl yedꞌ ebꞌ yuninal. Ix cham ebꞌ yuninal vin̈ chiꞌ, aton vin̈aj Jonatán, vin̈aj Abinadab yedꞌ vin̈aj Malquisúa. 3 Ix te och val oval chiꞌ bꞌaj ayecꞌ vin̈aj Saúl chiꞌ, axo ix aji, ix yamchaj vin̈ yuj sjul-labꞌ ebꞌ filisteo chiꞌ, yuj chiꞌ ix te xiv vin̈. 4 Ix yalan vin̈ dꞌa vin̈ edꞌjinac syamcꞌabꞌ:—Icꞌqꞌueta qꞌuen espada chiꞌ tzin a tecanchamoc, yic vachꞌ a juntzan̈ chꞌoc chon̈abꞌil tic, man̈ ol in sbꞌuch ebꞌ ayic ol in smilancham ebꞌ, xchi vin̈aj Saúl chiꞌ.
Palta ix te xiv vin̈ edꞌjinac syamcꞌabꞌ vin̈ chiꞌ, maj stacꞌlaj vin̈ stecancham vin̈. Yuj chiꞌ ix syumbꞌat n̈ojnaj sbꞌa vin̈ dꞌa yibꞌan̈ qꞌuen yespada, ix cham vin̈. 5 Ayic ix yilan vin̈ edꞌjinac syamcꞌabꞌ vin̈ chiꞌ to toxo ix cham vin̈, ix smilanpaxcham sbꞌa vin̈ icha ix aj smilancham sbꞌa vin̈aj Saúl chiꞌ. 6 A dꞌa jun cꞌu chiꞌ ix cham vin̈aj Saúl, ebꞌ yuninal vin̈ yoxvan̈il, vin̈ edꞌjinac syamcꞌabꞌ vin̈ chiꞌ yedꞌ masanil ebꞌ israel yedꞌnac vin̈. 7 Ayic ix yabꞌan ebꞌ israel ayecꞌ dꞌa scꞌaxepalbꞌat yacꞌlical Jezreel yedꞌ pax ebꞌ cajan dꞌa scꞌaxepalbꞌat aꞌ Jordán to toxo ix el lemnaj ebꞌ soldado, toxo ix champax vin̈aj Saúl yedꞌ ebꞌ yuninal yoxvan̈il, ix bꞌat ebꞌ elelal, ix yactejcan schon̈abꞌ ebꞌ. Axo ebꞌ filisteo ix cꞌochcan cajan taꞌ.
8 Axo dꞌa junxo cꞌu, ix bꞌat ebꞌ filisteo chiꞌ yicꞌcot masanil tastac ay dꞌa ebꞌ israel ix cham dꞌa oval chiꞌ, ix yilan ebꞌ to bꞌalancan vin̈aj Saúl yedꞌ ebꞌ yuninal yoxvan̈il dꞌa scal jantac ebꞌ soldado chamnacxo dꞌa lum vitz Gilboa. 9 Yuj chiꞌ ix xiquel sjolom vin̈ ebꞌ, ix yicꞌanpaxel qꞌuen syamcꞌabꞌ vin̈ ebꞌ yic oval. Ix lajvi chiꞌ, ix yacꞌanbꞌat yabꞌixal ebꞌ dꞌa junjun schon̈abꞌ ebꞌ filisteo yedꞌ dꞌa spatil sdiosal ebꞌ. 10 Ix yicꞌanbꞌat syamcꞌabꞌ vin̈aj Saúl chiꞌ ebꞌ dꞌa spatil sdiosal scuch Astarot, ix stzecꞌancanqꞌue jachan snivanil vin̈ chiꞌ ebꞌ yedꞌ yic ebꞌ yuninal vin̈ dꞌa smuroal chon̈abꞌ Bet-sán.
11 Ayic ix yabꞌan ebꞌ aj Jabes dꞌa yol yic Galaad to ix locbꞌajcanqꞌue snivanil vin̈aj Saúl chiꞌ yuj ebꞌ filisteo taꞌ, 12 masanil ebꞌ soldado te tecꞌan, pilan acꞌval ix bꞌey ebꞌ, ix cꞌoch ebꞌ bꞌaj aycan snivanil ebꞌ chamnac chiꞌ, ix yicꞌancot ebꞌ dꞌa Jabes. Axo taꞌ ix sn̈ustzꞌa ebꞌ. 13 Axo sbꞌaquil ebꞌ, a dꞌa yich jun te teꞌ dꞌa Jabes chiꞌ ix mucchajcani. Uqueꞌ cꞌual ix och ebꞌ aj Jabes chiꞌ dꞌa tzecꞌojcꞌolal yuj ebꞌ chamnac chiꞌ.