Schamel vin̈aj Saúl yedꞌ ebꞌ vin̈ yuninal
10
Ix yacꞌ oval ebꞌ filisteo yedꞌ ebꞌ israel, ix el lemnaj ebꞌ israel chiꞌ, te nivan ebꞌ ix cham dꞌa lum vitzal Gilboa. 2 Ix bꞌat ebꞌ filisteo chiꞌ dꞌa spatic vin̈aj Saúl yedꞌ ebꞌ vin̈ yuninal: Aton vin̈aj Jonatán, vin̈aj Abinadab yedꞌ vin̈aj Malquisúa. Ix miljicham ebꞌ vin̈ yuninal vin̈ chiꞌ yoxvan̈il. 3 Ix ochval ebꞌ vin̈ filisteo chiꞌ dꞌa spatic vin̈aj Saúl chiꞌ, ix lajvi vin̈ sjulan ebꞌ vin̈. 4 Yuj chiꞌ ix yal vin̈ dꞌa vin̈ edꞌjinac syamcꞌabꞌ icha tic: Icꞌqꞌueta qꞌuen espada chiꞌ, tza tipanoch qꞌuen dꞌayin, yic vachꞌ man̈oc juntzan̈ chꞌoc chon̈abꞌil tic ol tzalaj in smilani, xchi vin̈.Palta a vin̈ edꞌjinac syamcꞌabꞌ vin̈ chiꞌ, maj yal-laj scꞌol vin̈ ix scꞌulej icha ix yal vin̈ chiꞌ, yujto xiv vin̈. Yuj chiꞌ a vin̈ ix icꞌanqꞌueta qꞌuen yespada, ix syumanbꞌat n̈ojnaj sbꞌa vin̈ dꞌa yibꞌan̈ sn̈iꞌ qꞌueen. 5 Ayic ix yilan vin̈ edꞌjinac syamcꞌabꞌ vin̈ chiꞌ to toxo ix cham vin̈, ix syumanpaxbꞌat n̈ojnaj sbꞌa vin̈ dꞌa yibꞌan̈ sn̈iꞌ qꞌuen yespada chiꞌ, ix champax vin̈. 6 Icha chiꞌ ix aj scham vin̈aj Saúl dꞌa jun cꞌu chiꞌ yedꞌ oxvan̈ ebꞌ vin̈ yuninal. Man̈xo junoc yin̈tilal vin̈ ix elcani. 7 Ayic ix yilan ebꞌ israel cajan dꞌa jun chꞌolan chiꞌ to toxo ix el lemnaj ebꞌ yetisraelal ebꞌ, toxo ix champax vin̈aj Saúl yedꞌ ebꞌ vin̈ yuninal, yuj chiꞌ ix yactejcan schon̈abꞌ ebꞌ, ix bꞌat ebꞌ elelal. Axo ebꞌ filisteo ix cꞌochcan cajan dꞌa juntzan̈ schon̈abꞌ ebꞌ chiꞌ.
8 Axo dꞌa junxo cꞌu, ix bꞌat ebꞌ filisteo chiꞌ spojecꞌ tastac ay dꞌa ebꞌ ix cham chiꞌ. Ix yilan ebꞌ to a vin̈aj Saúl yedꞌ ebꞌ vin̈ yuninal chamnacxo ebꞌ vin̈, teljabꞌcan snivanil ebꞌ vin̈ dꞌa lum vitzal Gilboa. 9 A spichul vin̈aj Saúl chiꞌ yic oval ayochi, elan̈chamel ix yiqꞌuel ebꞌ, ix xicanel sjolom vin̈ ebꞌ. Ix yicꞌanbꞌat ebꞌ. Ix schecan ebꞌ bꞌat alchaj dꞌa masanil yol smacbꞌen ebꞌ yedꞌ dꞌa sdiosal ebꞌ. 10 Ix bꞌat yacꞌanoch syamcꞌabꞌ vin̈aj Saúl chiꞌ ebꞌ dꞌa stemplo jun sdiosal scuchan Dagón, ix yacꞌanqꞌue locan sjolom vin̈ ebꞌ.
11 Ayic ix yabꞌan ebꞌ aj Jabes ay dꞌa yol yic Galaad tas ix yutej snivanil vin̈aj Saúl ebꞌ filisteo chiꞌ, 12 ix slajtian sbꞌa masanil ebꞌ vin̈ vinac te tecꞌan. Ix bꞌat yicꞌancot snivanil vin̈aj Saúl chiꞌ ebꞌ yedꞌ pax snivanil ebꞌ vin̈ yuninal vin̈, ix cꞌoch yuj ebꞌ dꞌa Jabes chiꞌ. A dꞌa yich jun teꞌ ji ix smuc snivanil ebꞌ vin̈ chiꞌ ebꞌ. Uqueꞌ cꞌual ix och ebꞌ dꞌa tzecꞌojcꞌolal yuj cuscꞌolal.
13 Icha chiꞌ ix aj scham vin̈aj Saúl yuj chucal ix scꞌulej, yujto maj scꞌanabꞌajej schecnabꞌil Jehová vin̈, yujto ix scꞌanbꞌej pax sbꞌa vin̈ dꞌa jun ix scꞌuman spixan ebꞌ chamnac, man̈oc dꞌa Jehová ix scꞌanbꞌej sbꞌa vin̈. 14 Yuj chiꞌ ix cham vin̈ yuj Jehová, axo dꞌa vin̈aj David yuninal vin̈aj Isaí ix acꞌjican yopisio vin̈ chiꞌ.