3 Ayic ix cꞌoch ebꞌ yichamtac vinaquil chon̈abꞌ Israel lolonel yedꞌ vin̈ dꞌa Hebrón chiꞌ, ix sbꞌoan jun strato vin̈ yedꞌ ebꞌ dꞌa yichan̈ Jehová. Ataꞌ ix acꞌjiqꞌue aceite dꞌa sjolom vin̈ yic tzꞌochcan vin̈ sreyaloc Israel, icha val tas schecnac Jehová yal vin̈aj Samuel.

4 Ix lajvi chiꞌ, ix bꞌat vin̈aj rey David chiꞌ yedꞌ masanil ebꞌ yetisraelal dꞌa Jerusalén, scuchan pax Jebús, bꞌaj cajan ebꞌ jebuseo. 5 Ix yalan ebꞌ jebuseo chiꞌ dꞌa vin̈ icha tic: A ach tic, man̈ ol yal-laj ochta dꞌa tic, xchi ebꞌ dꞌa vin̈. Palta ix acꞌji ganar scuartel ebꞌ dꞌa tzalan Sion chiꞌ yuj vin̈, yuj chiꞌ ix scuchcan schon̈abꞌ vin̈aj David. 6 Ix yalan vin̈ icha tic: A mach ol bꞌabꞌlajoch yacꞌ oval yedꞌ ebꞌ jebuseo tic, ol vacꞌoch yajaliloc ebꞌ soldado, xchi vin̈. Axo vin̈aj Joab yuneꞌ ix Sarvia ix bꞌabꞌlaji, yuj chiꞌ ix och vin̈ yajaliloc ebꞌ soldado chiꞌ. 7 Ix lajvi chiꞌ, ix cajnaj vin̈aj rey David dꞌa cuartel dꞌa Sion chiꞌ, yuj chiꞌ Schon̈abꞌ Vin̈aj David ix sbꞌiejcani. 8 Ix sbꞌoqꞌue juntzan̈xo pat vin̈ dꞌa spatictac chiꞌ, ix schabꞌat dꞌa chꞌolan masanto ix cꞌoch dꞌa smuroal chon̈abꞌ. Axo vin̈aj Joab ix vachꞌ bꞌoan stzꞌacubꞌ chon̈abꞌ Jebús chiꞌ. 9 Ix yicꞌan stecꞌanil yopisio vin̈aj rey David chiꞌ, yujto a Jehová Yajal dꞌa Smasanil ayn̈ejoch yedꞌ vin̈.

10 A ebꞌ vin̈ soldado vin̈aj rey David te bꞌinajnac, ix och ebꞌ vin̈ yedꞌ masanil ebꞌ yetisraelal ayic ix yacꞌanoch vin̈aj David chiꞌ ebꞌ reyal dꞌa yol smacbꞌen Israel smasanil. Ix te och val ebꞌ vin̈ yedꞌ vin̈ yic syacꞌan reyal vin̈ icha val ix aj yalan Jehová.

11 Aton slistail ebꞌ vin̈ soldado vin̈aj rey David te bꞌinajnac chiꞌ: A vin̈aj Jasobeam yuninal vin̈aj Hacmoni, sat yaj vin̈ dꞌa scal oxvan̈xo ebꞌ vin̈ yetbꞌinajnaquil chiꞌ. A dꞌa junel ix smilcham 300 ebꞌ vin̈ vinac vin̈ yedꞌ qꞌuen slanza. 12 Axo junxo vin̈ dꞌa scal ebꞌ vin̈ oxvan̈ chiꞌ, aton vin̈aj Eleazar yuninal vin̈aj Dodo, yin̈tilal vin̈aj Aho. 13 A dꞌa junel ayecꞌ vin̈ yedꞌ vin̈aj rey David dꞌa Pas-damim ayic ix smolbꞌan sbꞌa ebꞌ filisteo yacꞌ oval taꞌ. Ataꞌ ay jun munlajel bꞌaj avabꞌil ixim cebada. Ayic ix el lemnaj ebꞌ soldado Israel dꞌa yichan̈ ebꞌ filisteo, 14 axo ebꞌ vin̈ chavan̈ chiꞌ ix can tecꞌnaj dꞌa scal jun munlajel chiꞌ, yic syacꞌan oval ebꞌ vin̈. Ix acꞌji ganar ebꞌ filisteo chiꞌ yuj ebꞌ vin̈. Icha chiꞌ ix aj scolchajcan chon̈abꞌ Israel yuj Jehová.

15 A dꞌa junel, a oxvan̈ ebꞌ vin̈ soldado te bꞌinajnac chiꞌ, ix bꞌat ebꞌ vin̈ dꞌa sattac qꞌueen yic bꞌat schalan sbꞌa ebꞌ vin̈ yedꞌ vin̈aj rey David dꞌa jun qꞌuen n̈aqꞌueen scuchan Adulam. Axo ebꞌ filisteo ay scampamento ebꞌ dꞌa schꞌolanil Refaim. 16 Ayic ayecꞌ vin̈aj David dꞌa qꞌuen n̈aqꞌueen chiꞌ, ayecꞌ scampamento ebꞌ filisteo dꞌa Belén. 17 Yujto ste tacji stiꞌ vin̈aj David chiꞌ, yuj chiꞌ ix yal vin̈ icha tic: Comonoc a a aꞌ ay dꞌa stiel chon̈abꞌ Belén svuqꞌuej, xchi vin̈.

18 Axo oxvan̈ ebꞌ vin̈ soldado te bꞌinajnac chiꞌ, ix och ebꞌ vin̈ dꞌa scampamento ebꞌ filisteo, ix bꞌat yicꞌanelta a aꞌ ebꞌ vin̈ dꞌa aꞌ ucꞌbꞌilaꞌ dꞌa stiel chon̈abꞌ Belén chiꞌ, ix yicꞌancot aꞌ ebꞌ vin̈ dꞌa vin̈aj David chiꞌ. Palta maj yal-laj scꞌol vin̈ ix yuqꞌuej aꞌ, ton̈ej ix sequem aꞌ vin̈ dꞌa sat luum silabꞌil dꞌa Jehová. 19 Ix yalan vin̈ icha tic: Mocabꞌ scha Dios vucꞌ a aꞌ tic. Ichato aꞌ schiqꞌuil ebꞌ vin̈ tic svuqꞌuej tato svucꞌ aꞌ, yujto ix sbꞌec sbꞌa ebꞌ vin̈ schami yic ix bꞌat yicꞌancot aꞌ ebꞌ vin̈, xchi vin̈. Yuj chiꞌ maj yuqꞌuejlaj aꞌ vin̈.

Aton jun tic ix scꞌulej ebꞌ vin̈ oxvan̈ te bꞌinajnac chiꞌ.

20 A vin̈aj Abisai yucꞌtac vin̈aj Joab, yajal yaj vin̈ dꞌa 30-xo ebꞌ vin̈ te bꞌinajnac. A dꞌa jun tiempoal, ix smilcham 300 vinac vin̈ yedꞌ qꞌuen slanza. Icha val chiꞌ ix aj yicꞌan sbꞌinajnaquil vin̈ dꞌa scal ebꞌ vin̈ 30 chiꞌ. 21 Yuj chiꞌ te nivan ix aj yelcꞌoch vin̈ dꞌa yichan̈ ebꞌ vin̈ chiꞌ. Ix och vin̈ yajaloc ebꞌ vin̈, palta maj qꞌuecꞌoch vin̈ icha ebꞌ vin̈ oxvan̈ bꞌabꞌel chiꞌ.

22 A vin̈aj Benaía yuninal vin̈aj Joiada aj chon̈abꞌ Cabseel, te bꞌinajnac pax vin̈, tzijtum tas ix scꞌulej vin̈. A vin̈ ix milancham chavan̈ soldado yuninal vin̈aj Ariel aj Moab. Axo dꞌa junel ayic te ay qꞌuen sacbꞌacom, ix em vin̈ dꞌa yol jun jul. Ataꞌ ix smilcham jun nocꞌ choj vin̈. 23 An̈ejtonaꞌ ix smilcham jun vin̈ aj Egipto vin̈. Nan̈al am yoxil metro steel vin̈ aj Egipto chiꞌ, axo steal qꞌuen slanza vin̈ yedꞌnac, nivan spatic. Palta a vin̈aj Benaía chiꞌ an̈ej jun te teꞌ yedꞌnac vin̈. Ix yiqꞌuecꞌ qꞌuen slanza vin̈ aj Egipto chiꞌ vin̈, axo yedꞌ qꞌuen slanza vin̈ chiꞌ, ix smilcham vin̈. 24 A yuj juntzan̈ tas ix scꞌulej vin̈ chiꞌ ix yicꞌ val sbꞌinajnaquil vin̈ icha ebꞌ vin̈ oxvan̈ bꞌabꞌel bꞌinajnac chiꞌ. 25 Nivan ix aj sbꞌinaj vin̈ dꞌa yichan̈ ebꞌ vin̈ 30 chiꞌ, palta maj cꞌochlaj icha ebꞌ vin̈ oxvan̈ chiꞌ. Ix acꞌjioch vin̈aj Benaía chiꞌ yuj vin̈aj rey David yajaliloc ebꞌ stan̈vumal.

26 A ebꞌ vin̈ 30 bꞌinajnac chiꞌ, aton ebꞌ vin̈ tic: Vin̈aj Asael yucꞌtac vin̈aj Joab, vin̈aj Elhanán yuninal vin̈aj Dodo aj Belén, 27 vin̈aj Samot aj Harod, vin̈aj Heles aj Pelón, 28 vin̈aj Ira yuninal vin̈aj Iques aj Tecoa, vin̈aj Abiezer aj Anatot, 29 vin̈aj Sibecai aj Husa, vin̈aj Ilai aj Aho, 30 vin̈aj Maharai aj Netofa, vin̈aj Heled yuninal vin̈aj Baana aj Netofa paxi, 31 vin̈aj Itai yuninal vin̈aj Ribai aj Gabaa ay dꞌa yol yic Benjamín, vin̈aj Benaía aj Piratón, 32 vin̈aj Hurai cajan dꞌa stiꞌ aꞌ Gaas, vin̈aj Abiel aj Arba, 33 vin̈aj Azmavet aj Bahurim, vin̈aj Eliaba aj Saalbón, 34 ebꞌ vin̈ yuninal vin̈aj Jasén aj Gizón, vin̈aj Jonatán yuninal vin̈aj Sage aj Harar, 35 vin̈aj Ahíam yuninal vin̈aj Sacar aj Harar paxi, vin̈aj Elifal yuninal vin̈aj Ur, 36 vin̈aj Hefer aj Mequera, vin̈aj Ahías aj Pelón, 37 vin̈aj Hezro aj Carmel, vin̈aj Naarai yuninal vin̈aj Ezbai, 38 vin̈aj Joel yucꞌtac vin̈aj Natán, vin̈aj Mibhar yuninal vin̈aj Hagrai, 39 vin̈aj Selec aj Amón, vin̈aj Naharai aj Berot. A jun vin̈ chiꞌ edꞌjinac syamcꞌabꞌ vin̈aj Joab yuneꞌ ix Sarvia, 40 vin̈aj Ira aj Itra, vin̈aj Gareb aj Itra paxi, 41 vin̈aj Urías hitita, vin̈aj Zabad yuninal vin̈aj Ahlai, 42 vin̈aj Adina yuninal vin̈aj Siza, yin̈tilal Rubén, yajal yaj vin̈ dꞌa scal ebꞌ yin̈tilal chiꞌ, 30 ebꞌ vin̈ vinac ajun yedꞌ vin̈, 43 vin̈aj Hanán yuninal vin̈aj Maaca, vin̈aj Josafat aj Mitán, 44 vin̈aj Uzías aj Astarot, vin̈aj Sama yedꞌ vin̈aj Jehiel, ebꞌ vin̈ yuninal vin̈aj Hotam aj Aroer, 45 vin̈aj Jediael yuninal vin̈aj Simri yedꞌ vin̈aj Joha yucꞌtac vin̈, aj Tiza ebꞌ vin̈, 46 vin̈aj Eliel aj Mahab, vin̈aj Jerebai yedꞌ vin̈aj Josavía. A ebꞌ vin̈ tic yuninal ebꞌ vin̈ vin̈aj Elnaam, vin̈aj Itma aj Moab, 47 vin̈aj Eliel, vin̈aj Obed yedꞌ vin̈aj Jaasiel, aj Soba ebꞌ vin̈.