Ochnac vin̈aj David sreyaloc Israel yedꞌ Judá
5
Ix lajvi chiꞌ, ix javi masanil ebꞌ yin̈tilal Israel dꞌa vin̈aj David dꞌa Hebrón. Ix yalan ebꞌ dꞌa vin̈ icha tic: A on̈ tic te ayto cuj co bꞌa edꞌoc. 2 Dꞌa yalan̈taxo ayic aytooch vin̈aj Saúl co reyaloc, a ach on̈ a cuchbꞌejnac dꞌa oval. An̈ejaꞌ pax Jehová alannac dꞌayach to a ach ol on̈ a cuchbꞌej yedꞌ och co reyaloc, xchi ebꞌ.3 Yacbꞌan ayecꞌ ebꞌ taꞌ, axo ebꞌ yichamtac vinaquil chon̈abꞌ Israel ix lolon yedꞌ vin̈aj David chiꞌ yic sbꞌoancan strato vin̈ yedꞌ ebꞌ dꞌa yichan̈ Jehová. Ix lajvi chiꞌ, ix acꞌjicanqꞌue aceite dꞌa sjolom vin̈ yic sicꞌjicanoch vin̈ sreyaloc masanil ebꞌ israel. 4 Ayic ix schaanel yich vin̈ yacꞌan reyal, 30 abꞌil sqꞌuinal vin̈. 40 abꞌil ix yacꞌ reyal chiꞌ vin̈. 5 Nan̈al svajxaquil abꞌil ix yacꞌ reyal vin̈ dꞌa yibꞌan̈ ebꞌ aj Judá dꞌa Hebrón. Ix lajvi chiꞌ, 33 abꞌil ix yacꞌ reyal vin̈ dꞌa masanil ebꞌ israel yedꞌ dꞌa ebꞌ aj Judá dꞌa Jerusalén.
Ix yacꞌ ganar chon̈abꞌ Sion vin̈aj David
6 Ay jun cꞌu ix bꞌat vin̈aj rey David chiꞌ yedꞌ ebꞌ soldado yacꞌ oval yedꞌ ebꞌ jebuseo ay dꞌa Jerusalén. Ix snaꞌ ebꞌ jebuseo chiꞌ to max yal-laj yoch vin̈aj David chiꞌ dꞌa yol schon̈abꞌ ebꞌ chiꞌ, yuj chiꞌ ix yal ebꞌ dꞌa vin̈ icha tic: Cꞌocbꞌiln̈ej ebꞌ max uji yilani yedꞌ ebꞌ tzꞌem sbꞌeyi, a ebꞌ max ach chaan ochta dꞌa tic, xchi ebꞌ. 7 Vachꞌchom icha chiꞌ ix yal ebꞌ, palta ix yacꞌ ganar chon̈abꞌ Sion vin̈ rey chiꞌ, yuj chiꞌ schon̈abꞌ vin̈aj David ix sbꞌiejcani. 8 A dꞌa jun cꞌu chiꞌ, ix yal vin̈aj David dꞌa ebꞌ soldado: A mach sbꞌabꞌlajoch yacꞌ oval yedꞌ ebꞌ jebuseo tic, ochocabꞌ dꞌa sbꞌe a aꞌ tzꞌochcꞌoch dꞌa yol chon̈abꞌ chiꞌ, smilancham masanil ebꞌ max uji yilan yedꞌ ebꞌ tzꞌem sbꞌeyi. A val juntzan̈ ebꞌ chiꞌ, tzin yaj ebꞌ, xchi vin̈. Ataꞌ elnaccancot jun lolonel tzꞌalji: A ebꞌ max uji yilani yedꞌ ebꞌ tzꞌem sbꞌeyi, max yal-laj yoch ebꞌ dꞌa yol spalacio vin̈ rey, xchi. 9 Ix lajvi chiꞌ, ix cajnaj vin̈aj David chiꞌ dꞌa cuartel ay dꞌa jun chon̈abꞌ chiꞌ, ix yacꞌan scuch vin̈ Schon̈abꞌ Vin̈aj David, ix laj sbꞌoanqꞌue juntzan̈xo pat vin̈ dꞌa spatictac, ix schael yich bꞌaj ix mucchaj jun chꞌolan. 10 A Jehová Dios Yajal dꞌa Smasanil, a ayoch yedꞌ vin̈aj David chiꞌ, yuj chiꞌ te nivan ix aj sbꞌinaj vin̈.
A ebꞌ schecabꞌ vin̈aj Hiram dꞌa vin̈aj David
11 A vin̈aj Hiram sreyal Tiro, ix scheccot ebꞌ smunlajvum vin̈ dꞌa vin̈aj David, aton ebꞌ n̈icum teꞌ yedꞌ ebꞌ macꞌumpoj qꞌueen, ix yicꞌanpaxcot teꞌ cꞌuteꞌ ebꞌ, yic sbꞌoanqꞌue spat vin̈aj David chiꞌ ebꞌ. 12 Icha chiꞌ ix aj snachajel yuj vin̈aj David chiꞌ to a Jehová ix acꞌancanoch vin̈ reyal, yic te nivan tzꞌaj sbꞌinaj schon̈abꞌ Jehová chiꞌ, yujto te xajan yuuj.
Juntzan̈xo ebꞌ yuninal vin̈aj David
13 Ayic ix el vin̈aj David chiꞌ dꞌa Hebrón, ix javi vin̈ dꞌa Jerusalén, ix cajnaj vin̈ taꞌ. Ayto juntzan̈xo ebꞌ ix ix, ix yicꞌ vin̈, yuj chiꞌ tzijtumto yal yuninal vin̈ ix alji. 14-16 A ebꞌ yuninal vin̈ ix alji dꞌa Jerusalén chiꞌ, aton ebꞌ tic: Vin̈aj Samúa, vin̈aj Sobab, vin̈aj Natán, vin̈aj Salomón, vin̈aj Ibhar, vin̈aj Elisúa, vin̈aj Nefeg, vin̈aj Jafía, vin̈aj Elisama, vin̈aj Eliada yedꞌ vin̈aj Elifelet.
Ix yacꞌ ganar ebꞌ filisteo vin̈aj David
17 Ayic ix yabꞌan ebꞌ filisteo to toxo ix och vin̈aj David sreyaloc Israel, ix cot ebꞌ masanil yacꞌ oval yedꞌ vin̈, palta ayic ix yabꞌan vin̈, ix em vin̈ bꞌaj ay juntzan̈ qꞌuen nivac tenam yic vachꞌ syacꞌ oval chiꞌ vin̈. 18 A ebꞌ filisteo chiꞌ ix cꞌoch ebꞌ dꞌa span̈anil Refaim, ix sbꞌoanqꞌue scampamento ebꞌ taꞌ. 19 Ix scꞌanbꞌan vin̈aj David chiꞌ dꞌa Jehová icha tic:
—¿Tzam yal vacꞌan oval yedꞌ ebꞌ filisteo chiꞌ? ¿Ol am acꞌoch ebꞌ dꞌa yol in cꞌabꞌ? xchi vin̈.
Ix tacꞌvi Jehová chiꞌ:
—Ixic, acꞌ oval yedꞌ ebꞌ. A in ol vacꞌoch ebꞌ dꞌa yol a cꞌabꞌ, xchi dꞌa vin̈.
20 Ix cꞌoch vin̈ yedꞌ ebꞌ soldado bꞌaj ayecꞌ ebꞌ filisteo chiꞌ. Ataꞌ ix acꞌji ganar ebꞌ yuj vin̈. Yuj chiꞌ ix yal vin̈: A Jehová ix jacanbꞌat jun bꞌe dꞌa vichan̈ dꞌa scal ebꞌ vajcꞌol tic, icha val tzꞌaj sbꞌat n̈epnaj junoc aꞌ elumaꞌ, xchi vin̈. Yuj chiꞌ Baal-perazim* ix sbꞌiejcan jun lugar chiꞌ. 21 Ayic ix el lemnaj ebꞌ filisteo chiꞌ, ix laj yactejcan sdiosal ebꞌ, axo vin̈aj David chiꞌ yedꞌ ebꞌ soldado ix icꞌancoti.
22 Ix jaxpax ebꞌ filisteo chiꞌ dꞌa span̈anil Refaim chiꞌ. 23 Yuj chiꞌ ix scꞌanbꞌejxi vin̈aj David chiꞌ dꞌa Jehová. Ix tacꞌvixi Jehová chiꞌ dꞌa vin̈:
—Man̈ ach cꞌoch dꞌa sat ebꞌ, palta to a dꞌa spatictac ebꞌ ol ach cotoc. A bꞌaj ay juntzan̈ teꞌ bálsamo tzach coti. 24 Ayic ol abꞌan scꞌan̈ jun icha scꞌan̈ yecꞌ anima dꞌa scaltac scꞌabꞌ te teꞌ chiꞌ, elan̈chamel tza yamoch acꞌan oval yedꞌ ebꞌ, yujto a jun chiꞌ schꞌoxani to a in ol in bꞌabꞌlaj uuj, yic ol in satanel ebꞌ filisteo chiꞌ, xchi Jehová.
25 Ix scꞌanabꞌajej vin̈aj rey David chiꞌ tas ix yal Jehová. Yuj chiꞌ ix yacꞌ ganar ebꞌ filisteo chiꞌ vin̈, ix el yich spechan ebꞌ vin̈ dꞌa Geba masanto dꞌa Gezer.