A schamel vin̈aj Is-boset
4
Ayic ix yabꞌan vin̈aj Is-boset yuninal vin̈aj Saúl to toxo ix cham vin̈aj Abner dꞌa Hebrón, ix te xiv vin̈. Ix te somchajpaxqꞌue masanil ebꞌ yetisraelal vin̈ yedꞌoc. 2 Ay chavan̈ ebꞌ vin̈ schecabꞌ vin̈aj Is-boset chiꞌ, yajal yaj ebꞌ vin̈ dꞌa jun n̈ilan̈ ebꞌ soldado elcꞌum. Ay jun vin̈ scuch Baana, axo junxo vin̈ scuch Recab. A vin̈aj Rimón cajan dꞌa Beerot dꞌa slacꞌanil bꞌaj tzꞌecꞌ smacbꞌen ebꞌ yic Benjamín ay yuninal ebꞌ vin̈. (A ebꞌ yin̈tilal ebꞌ anima cajan dꞌa Beerot chiꞌ, yin̈tilal ebꞌ vin̈aj Benjamín. 3 An̈ejto bꞌatnaccan ebꞌ dꞌa Gitaim, ton̈ej comon ayecꞌ ebꞌ taꞌ, icha chꞌoc chon̈abꞌil yaj ebꞌ.)4 (A vin̈aj Jonatán yuninal vin̈aj Saúl ay jun yuninal vin̈ cannac scuch Mefi-boset. A jun vin̈ chiꞌ, man̈ vachꞌoc yoc vin̈ schabꞌil, yujto ayic oyeꞌanto abꞌil sqꞌuinal vin̈, ix javi yabꞌixal tas ix uji dꞌa Jezreel to toxo ix cham vin̈aj Saúl yedꞌ vin̈aj Jonatán. Yuj chiꞌ ix cheljibꞌat vin̈ yuj jun ix tzꞌilan qꞌuibꞌoc, ix bꞌat ebꞌ elelal yalani. Yujto ix spil yip ix yeli, ix yactanel vin̈ ix, yuj chiꞌ icha chiꞌ ix aj yixtaxcan yoc vin̈ chiꞌ.)
5 Axo ix aji to a vin̈aj Recab yedꞌ vin̈aj Baana chiꞌ, ix bꞌat ebꞌ vin̈ dꞌa spat vin̈aj Is-boset ayic te ov cꞌacꞌ dꞌa chimcꞌualil. Vaynac vin̈ dꞌa schꞌat yic syicꞌ jabꞌoc yip. 6 Axo ix stan̈vumal spuertail spat vin̈, van schayvi trigo ix, ix vaybꞌat ix. Val dꞌa jun rato chiꞌ, ix och lemnaj vin̈aj Recab yedꞌ vin̈ yucꞌtac chiꞌ bꞌaj vaynac vin̈aj Is-boset chiꞌ, malaj junoc mach ix ilani. 7 Ayic ix och ebꞌ vin̈ dꞌa yol pat chiꞌ, ix yilan ebꞌ vin̈ to jichanecꞌ vin̈aj Is-boset chiꞌ svay dꞌa schꞌat. Yuj chiꞌ ix steccham vin̈ ebꞌ vin̈, ix xicanel sjolom vin̈ ebꞌ vin̈, ix yicꞌanbꞌat ebꞌ vin̈ yedꞌoc. Pilan acꞌval ix bꞌey ebꞌ vin̈ bꞌaj sbꞌat sbꞌeal Arabá 8 yic sbꞌat yacꞌan ebꞌ vin̈ dꞌa vin̈aj rey David dꞌa Hebrón. Ix yalan ebꞌ vin̈ dꞌa vin̈ icha tic:
—Mamin rey, ix quicꞌcot sjolom vin̈aj Is-boset yuninal vin̈aj Saúl, vin̈ ochnac ajcꞌolal dꞌayach, snibꞌejnac vin̈ ach smilchamoc. Palta a ticnaic ix el dꞌa scꞌol Jehová yic tza pacan a bꞌa dꞌa vin̈aj Saúl yedꞌ dꞌa yin̈tilal, xchi ebꞌ vin̈.
9 Ix tacꞌvi vin̈aj rey David chiꞌ dꞌa ebꞌ vin̈ icha tic:
—Syil Jehová, aton ix in colanel dꞌa masanil tas ay smay ix ja dꞌa vibꞌan̈ 10 to ayic ix javi jun vin̈ vinac dꞌa Siclag yic ix yicꞌancot vachꞌ abꞌix vin̈ dꞌayin yalani, yuj schamel vin̈aj Saúl, ix vacꞌan yamjoc vin̈, ix vacꞌan miljoccham vin̈. Aton spac chiꞌ ix vacꞌ dꞌa vin̈ yuj jun vachꞌ abꞌix ix yicꞌcot chiꞌ dꞌayin. 11 Ocxom val dꞌayex a ex tic, smoj ton val svacꞌ spac dꞌayex, yujto ix e milcham vin̈ vinac malaj smul yacbꞌan vaynac vin̈ dꞌa spat. Yuj chiꞌ ol ex in satel dꞌa yolyibꞌan̈qꞌuinal tic. Man̈xa bꞌaqꞌuin̈ ol ex bꞌinaj jabꞌoc, xchi vin̈.
12 Ix lajvi chiꞌ, ix schecan vin̈ rey chiꞌ miljicham ebꞌ vin̈. Ix xicjiel scꞌabꞌ ebꞌ vin̈ yedꞌ yoc yuj ebꞌ soldado, ix qꞌue locan snivanil ebꞌ vin̈ bꞌaj ay yedꞌtal a aꞌ dꞌa Hebrón chiꞌ. Axo sjolom vin̈aj Is-boset chiꞌ, ix yicꞌbꞌat ebꞌ soldado, ix smucan ebꞌ bꞌaj mucan vin̈aj Abner, dꞌa Hebrón chiꞌ.