2-5 A ebꞌ yuninal vin̈aj David ix alji dꞌa Hebrón, aton sbꞌi ebꞌ tic dꞌa stzolal: Vin̈aj Amnón yuneꞌ ix Ahinoam aj Jezreel, vin̈aj Quileab, yuneꞌ ix Abigail, ix yetbꞌeyumcan vin̈aj xilbꞌa Nabal, aj Carmel, vin̈aj Absalón yuneꞌ ix Maaca yisil vin̈aj Talmai sreyal Gesur, vin̈aj Adonías yuneꞌ ix Haguit, vin̈aj Sefatías yuneꞌ ix Abital yedꞌ vin̈aj Itream yuneꞌ ix Egla. Aton sbꞌi ebꞌ ix yetbꞌeyum vin̈aj David tic yedꞌ ebꞌ yuninal ix alji ayic ayecꞌ vin̈ dꞌa Hebrón.

6 Ayic ayn̈ej och oval dꞌa scal ebꞌ yic vin̈aj David yedꞌ ebꞌ ayoch yedꞌ ebꞌ yin̈tilal vin̈aj Saúl, axo vin̈aj Abner chiꞌ ix ste iqꞌuej yipoc vin̈ dꞌa scal ebꞌ yic vin̈aj Saúl chiꞌ. 7 A vin̈aj Saúl chiꞌ, aycan jun ix yetbꞌeyum vin̈ scuchan Rizpa, yisil vin̈aj Aja. Ay jun cꞌu ix yal vin̈aj Is-boset dꞌa vin̈aj Abner chiꞌ:

—¿Tas yuj ix ach vay yedꞌ ix yetbꞌeyumcan vin̈ in mam? xchi vin̈ dꞌa vin̈.^* 8 Yujto ix yal jun chiꞌ vin̈aj Is-boset chiꞌ dꞌa vin̈aj Abner chiꞌ, yuj chiꞌ ix te cot yoval vin̈, ix yalan vin̈ icha tic:

—¿Tom tzꞌiꞌ in tzilaꞌ, tocval van vacꞌanoch in bꞌa yedꞌ ebꞌ ajcꞌol yic Judá tic? A in tic, te vachꞌn̈ej ix vutej in bꞌa dꞌa ebꞌ ayto yuj sbꞌa yedꞌ vin̈ a mam yedꞌ dꞌa ebꞌ vachꞌ yacꞌan yedꞌ vin̈, maj ach vacꞌpaxoch dꞌa yol scꞌabꞌ vin̈aj David, axo ticnaic tzacꞌan yovalil dꞌayin yuj jun ix ix chiꞌ. 9-10 A Jehová ix yacꞌ stiꞌ dꞌa vin̈aj David to tzꞌicꞌjiecꞌ opisio dꞌa vin̈aj Saúl yedꞌ pax dꞌa ebꞌ yin̈tilal, tzꞌochcan vin̈aj David chiꞌ reyal dꞌa Israel yedꞌ dꞌa Judá, scotn̈ej dꞌa chon̈abꞌ Dan masanto dꞌa Beerseba. Cotocabꞌ yoval scꞌol Jehová dꞌa vibꞌan̈ tato max vacꞌ vip yelcꞌoch tas ix yal chiꞌ, xchi vin̈.

11 Majxo yal-laj yalan junoc bꞌelan̈ lolonel vin̈aj Is-boset dꞌa vin̈aj Abner chiꞌ, yujto xivnac vin̈ dꞌa vin̈. 12 Ix lajvi chiꞌ, ix schecanbꞌat juntzan̈ schecabꞌ vin̈aj Abner chiꞌ yal dꞌa vin̈aj David icha tic: ¿Tom man̈oc in ay vopisio dꞌa yibꞌan̈ jun chon̈abꞌ tic? A ticnaic co bꞌo junoc co trato yic tzin och edꞌoc, yic vachꞌ masanil ebꞌ quetchon̈abꞌ tzꞌoch ebꞌ edꞌoc, xchibꞌat vin̈.

13 Ix yalan vin̈aj David chiꞌ: Syal in bꞌoan in trato chiꞌ edꞌoc, palta ay jun tas yovalil tzojtaquejeli: Max yal-laj a javi dꞌa vichan̈ tato man̈ edꞌnacoc ix vetbꞌeyum, ix Mical yisilcan vin̈aj xilbꞌa Saúl, xchibꞌat vin̈. 14 Ix schecanpaxbꞌat ebꞌ schecabꞌ vin̈aj David chiꞌ dꞌa vin̈aj Is-boset, ix yalan vin̈ icha tic: Acꞌcot ix Mical, ix vetbꞌeyum, aton ix vicꞌnac yic vacꞌannac jun ciento sjolom svinaquil ebꞌ vin̈ filisteo yuj stojoloc ix dꞌa vin̈ smam, xchibꞌat vin̈.

15 Yuj chiꞌ ix yal vin̈aj Is-boset chiꞌ to tzꞌicꞌjiecꞌ ix dꞌa vin̈ yetbꞌeyum, aton vin̈aj Paltiel, yuninal vin̈aj Lais. 16 A vin̈aj Paltiel chiꞌ, ix bꞌat tzacꞌan vin̈ yuj ix, ix och ijan vin̈ yoqꞌui, masanto ix cꞌoch vin̈ dꞌa Bahurim. Ataꞌ ix yal vin̈aj Abner chiꞌ dꞌa vin̈ to smeltzaj vin̈, yuj chiꞌ ix meltzajcan vin̈.

17 Yacbꞌan chiꞌ, ix laj lolon vin̈aj Abner yedꞌ ebꞌ yichamtac vinaquil Israel, ix yalan vin̈ dꞌa ebꞌ icha tic: Ayxo stiempoal ix e naꞌ a ex tic to a vin̈aj David tzꞌoch e reyaloc. 18 A ticnaic jun, toxo ix cꞌoch stiempoal yic tzꞌoch vin̈, yujto yalnaccan Jehová yuj vin̈ schecabꞌ chiꞌ, to a vin̈ ol colan schon̈abꞌ dꞌa yol scꞌabꞌ ebꞌ filisteo yedꞌ dꞌa yol scꞌabꞌ masanil juntzan̈ ebꞌ ayoch ajcꞌolal dꞌayon̈, xchi vin̈.

19 Ix lolonpax vin̈ yedꞌ masanil ebꞌ yetchon̈abꞌ aj Benjamín, ix lajvi chiꞌ, ix bꞌat vin̈ dꞌa Hebrón yic slolon vin̈ yedꞌ vin̈aj David yuj tas ix yal ebꞌ yetisraelal ebꞌ yedꞌ tas ix yal masanil ebꞌ yetchon̈abꞌ ebꞌ aj Benjamín chiꞌ. 20 Ix cꞌoch vin̈ yedꞌ 20 ebꞌ soldado dꞌa Hebrón bꞌaj ayecꞌ vin̈aj David chiꞌ. Ix schecan bꞌojoc jun nivan vael vin̈aj David chiꞌ yuj vin̈aj Abner yedꞌ pax yuj ebꞌ ajun yedꞌ vin̈. 21 Ix lajvi chiꞌ, ix yalan vin̈aj Abner chiꞌ dꞌa vin̈aj David chiꞌ icha tic:

—A ticnaic mamin rey, yovalil tzin bꞌat in molbꞌej masanil ebꞌ quetisraelal, yic sbꞌoan junoc trato ebꞌ edꞌoc, icha val chiꞌ ol aj acꞌan reyal icha val tas tza nibꞌej, xchi vin̈.

—Ixic an, xchi vin̈aj David chiꞌ. Ix lajvi chiꞌ, ix yalancan quilcobꞌa vin̈aj Abner chiꞌ, ix bꞌat vin̈ dꞌa tzalajcꞌolal.

22-23 Ato val sbꞌat vin̈aj Abner chiꞌ, ix cꞌoch vin̈aj Joab yedꞌ ebꞌ soldado vin̈aj David, spetoj ebꞌ dꞌa oval. Te tzijtum tastac yedꞌnac ebꞌ, aton tas ix laj yiqꞌuecꞌ ebꞌ dꞌa ebꞌ yajcꞌool. Ayic ix cꞌoch vin̈aj Joab yedꞌ masanil ebꞌ soldado ajun yedꞌoc, ix alji dꞌa vin̈ to a vin̈aj Abner chiꞌ, ix ulecꞌ vin̈ lolonel yedꞌ vin̈ rey chiꞌ, toxo ix meltzaj vin̈ dꞌa tzalajcꞌolal. 24 Ix lajvi chiꞌ, ix bꞌat vin̈aj Joab chiꞌ dꞌa vin̈ rey chiꞌ, ix yalan vin̈:

—Mamin rey, ¿tas yuj icha chiꞌ ix a cꞌulej? Yujto a vin̈aj Abner ix ulecꞌ dꞌayach, ix a chaanxibꞌat vin̈ dꞌa tzalajcꞌolal. 25 Mamin rey ¿tom man̈ ojtacoc to a vin̈aj Abner chiꞌ ton̈ej tzul smusej a sat vin̈ yic syil vin̈ tas tza cꞌulej yedꞌ tas aji? xchi vin̈.

26 Ixn̈ej lajvi slolon vin̈ yedꞌ vin̈ rey chiꞌ, ix schecan vin̈ bꞌat saychaj vin̈aj Abner chiꞌ dꞌa elcꞌaltac, ato bꞌaj ay aꞌ ucꞌbꞌilaꞌ yic Sira, ataꞌ ix meltzaj vin̈ yuj ebꞌ, palta man̈ yojtacoclaj vin̈aj David chiꞌ tas yaji. 27 Ayic ix jax vin̈aj Abner chiꞌ dꞌa Hebrón, axo vin̈aj Joab chiꞌ ix chaan vin̈ sjavi dꞌa spatiquel chon̈abꞌ chiꞌ, ix icꞌjibꞌat vin̈ yuj vin̈ dꞌa stzꞌeybꞌat stiꞌ jun chon̈abꞌ chiꞌ, yic slolon ebꞌ vin̈ taꞌ schꞌocoj. Ataꞌ ix stipoch yespada vin̈aj Joab chiꞌ dꞌa scꞌol vin̈, ix cham vin̈, yic syacꞌanecꞌ spac vin̈ yucꞌtac vin̈aj Joab chiꞌ. 28 Ayic ix yabꞌan jun chiꞌ vin̈aj David, ix yalan vin̈: Syil Jehová to a in tic yedꞌ masanil ebꞌ in checabꞌ malaj calan quic dꞌa schamel vin̈aj Abner chiꞌ. 29 Cotocabꞌcan jun tic dꞌa yibꞌan̈ vin̈aj Joab yedꞌ dꞌa yibꞌan̈ ebꞌ yin̈tilal vin̈ yedꞌ ebꞌ scꞌabꞌ yoc. A dꞌa scal ebꞌ, ayocabꞌ mach ol yabꞌ syail yuj tas tzꞌel dꞌa snivanil, ayocabꞌ mach ol penaayax yuj lepra, ayocabꞌpax mach tzꞌem sbꞌeyi, ayocabꞌ mach smiljichamoc yedꞌ mach scham yuj vejel, xchi vin̈ rey chiꞌ.

30 A vin̈aj Joab chiꞌ yedꞌ vin̈aj Abisai ix milancham vin̈aj Abner chiꞌ, yujto ayic ix och oval dꞌa Gabaón, a vin̈aj Abner chiꞌ ix milancham vin̈aj Asael, vin̈ yucꞌtac ebꞌ vin̈.

31 Ix lajvi chiꞌ, ix yalan vin̈ rey dꞌa vin̈aj Joab chiꞌ yedꞌ dꞌa masanil ebꞌ ajun yedꞌ vin̈ to sn̈icꞌchitejel spichul ebꞌ, yic tzꞌoch ebꞌ dꞌa cuscꞌolal yuj schamel vin̈aj Abner chiꞌ. Ix och tzacꞌan vin̈ rey chiꞌ dꞌa spatic mach ix bꞌachanbꞌat snivanil vin̈ chiꞌ. 32 A dꞌa Hebrón ix smuc snivanil vin̈ chiꞌ ebꞌ. Ix ocꞌ vin̈ rey chiꞌ bꞌaj ix mucchaj vin̈aj Abner chiꞌ, ix ocꞌpax masanil ebꞌ anima ajun yedꞌ vin̈. 33 Yuj chiꞌ ix sbꞌitej jun bꞌit yic cuscꞌolal vin̈ rey chiꞌ:

Axo ebꞌ anima chiꞌ, ix ocꞌpax ebꞌ yuj schamel vin̈aj Abner chiꞌ. 35 Ix lajvi chiꞌ, ix yalan ebꞌ dꞌa vin̈aj David chiꞌ to sva jabꞌoc vin̈ yacbꞌan manto em cꞌu, palta ix yacꞌ stiꞌ vin̈ dꞌa yichan̈ Dios:

—Aocabꞌ Dios tzꞌacꞌanoch yaelal dꞌa vibꞌan̈ tato svabꞌlej jabꞌoc vael ma junocxo tasi ayic manto em cꞌu, xchi vin̈. 36 Masanil anima ayecꞌ taꞌ, ix nachajel jun chiꞌ yuj ebꞌ, ix scha val scꞌol ebꞌ, yujto masanil tas scꞌulej vin̈aj David chiꞌ scha scꞌol ebꞌ anima smasanil. 37 A dꞌa jun cꞌu chiꞌ, ix nachajel yuj ebꞌ israel chiꞌ smasanil to a vin̈aj rey David chiꞌ, man̈ locanoclaj vin̈ dꞌa schamel vin̈aj Abner chiꞌ.

38 Ix lajvi chiꞌ, ix yalan vin̈ rey chiꞌ dꞌa masanil ebꞌ schecabꞌ:

—Ojtaquejequeli to a ticnaic ix cham jun vin̈ sat yajal dꞌa co cal a on̈ israel on̈ tic. 39 Yuj chiꞌ vachꞌchom a Dios ix in sicꞌanoch reyal, palta ste el vip svabꞌ yuj schuc spensaril ebꞌ vin̈ yuneꞌ ix Sarvia. Aocabꞌ Jehová ol acꞌan spac dꞌa jun mach ix cꞌulan chucal tic, xchi vin̈.