A vin̈aj Samuel slajvubꞌ juez yaj vin̈. A vin̈ bꞌabꞌel yaj dꞌa scal ebꞌ schecabꞌ Dios, te nivan yelcꞌoch vin̈ dꞌa scal ebꞌ yetisraelal. A jun bꞌabꞌel libro bꞌaj ayoch sbꞌi vin̈ tic, a tzꞌalancot tas ajnac yecꞌ tiempo yuj ebꞌ juez yedꞌ tas ajnac yoch ebꞌ israel dꞌa junn̈ej chon̈abꞌil dꞌa yalan̈ smandar jun vin̈ rey sicꞌbꞌiloch yuj Dios. A vin̈aj Samuel schecabꞌ Dios acꞌannacoch vin̈aj Saúl reyal. Ay oxvan̈ ebꞌ vin̈ vinac nivan yelcꞌoch sbꞌinaj dꞌa jun libro tic: Aton vin̈aj Samuel, vin̈aj Saúl yedꞌ vin̈aj David. A uqueꞌ bꞌabꞌel capítulo tzꞌalancot yuj ebꞌ smam yicham vin̈aj Samuel yedꞌ bꞌaj aljinac vin̈ yedꞌ tas ajnac yoch vin̈ dꞌa yopisio scuchbꞌan ebꞌ yetisraelal.

Axo dꞌa capítulo 8 masanto dꞌa 15, ataꞌ syal tas ajnac yacꞌan reyal vin̈aj Saúl chiꞌ. Axo dꞌa capítulo 16 masanto dꞌa 30, ataꞌ syalcot tas ajnac sjuvi spensar vin̈aj Saúl chiꞌ yedꞌ jantac yaelal javinac dꞌa yibꞌan̈ vin̈. Syalanpax tas ajnac spechji bꞌeyecꞌ vin̈aj David yuj vin̈aj Saúl chiꞌ. Yuj chiꞌ xidꞌ yacꞌnacoch sbꞌa vin̈aj David chiꞌ dꞌa scal ebꞌ filisteo. Axo dꞌa slajvubꞌ capítulo, syalaꞌ tas ajnac scham vin̈aj Saúl yedꞌ ebꞌ yuninal dꞌa jun oval dꞌa vitzal Gilboa. Vachꞌchom a Dios acꞌannac jun sreyal ebꞌ israel yuj spactzitan tas scꞌan ebꞌ dꞌay, palta maj actajcan ebꞌ yuuj, yujto aton val Rey yaj dꞌa ebꞌ.