Ix yalan vin̈aj Booz chiꞌ dꞌa vin̈:

—Ochan̈ vaan to ol on̈ lolon jabꞌoc, xchi vin̈.

Ix scꞌanabꞌajej vin̈ chiꞌ yoch vaan, ix em cꞌojan vin̈. 2 Ix lajvi chiꞌ ix yavtancot lajun̈van̈ ebꞌ vin̈ yichamtac vinaquil chon̈abꞌ vin̈aj Booz chiꞌ, ix yalan vin̈ dꞌa ebꞌ vin̈ to tzꞌem cꞌojan junoc rato ebꞌ vin̈ yedꞌ vin̈. Ix em cꞌojan ebꞌ vin̈ bꞌian. 3 Ix yalan vin̈aj Booz chiꞌ dꞌa vin̈ ayto yuj sbꞌa yedꞌ ebꞌ chiꞌ icha tic:

—A ix Noemí ix meltzajxicot dꞌa Moab, snibꞌej ix schon̈el jabꞌoc slum vin̈ cucꞌtac xilbꞌa Elimelec. 4 Yuj chiꞌ sval dꞌayach talaj tza manel luum. Tato tzicꞌ luum, dꞌa val yichan̈ ebꞌ testigo tic yedꞌ ebꞌ vin̈ yichamtac vinaquil chon̈abꞌ tic, tzalancani to tzicꞌ luum. Yujto a ach tic smoj icꞌan luum. Tato max a mancan lum jun, al dꞌayin ticnaic, yujto a in tic schabꞌilxo macan̈ vaji, malaj junocxo syal smanan luum, xchi vin̈aj Booz chiꞌ.

Ix tacꞌvi vin̈ ayto yuj sbꞌa yedꞌ vin̈aj Elimelec chiꞌ icha tic:

—Ol in man luum, xchi vin̈.

5 Ix lajvi chiꞌ ix yalan vin̈aj Booz chiꞌ tas yaji:

—A ticnaic jun, tato tza mancanel lum dꞌa ix Noemí chiꞌ, yovalil tzicꞌ ix Rut aj Moab, ix yetbꞌeyumcan vin̈ xilbꞌa Mahlón, yic vachꞌ ol bꞌinajcan vin̈ yetbꞌeyum ix chiꞌ dꞌa luum, xchi vin̈.

6 Ayic ix yabꞌan jun chiꞌ vin̈, ix yalan vin̈:

—Tato icha chiꞌ yaji, max yal-laj in manan luum. Ay talaj tzꞌicꞌan in macbꞌen yuuj. Tato tza nibꞌej tza mancanel lum a ach tic, syal a manan luum, svacꞌ in derecho tic dꞌayach, xchi vin̈.

7 (A sbꞌeybꞌal ebꞌ israel dꞌa jun tiempoal chiꞌ, tato ay junoc mach ay yalan yic smanancan smacbꞌen junoc te ayto yuj sbꞌa yedꞌoc, tato max yal scꞌool smanani syal yacꞌancan bꞌaj ay yalan yic chiꞌ dꞌa junocxo mach. Ayic sbꞌo jun lolonel chiꞌ, a sbꞌeybꞌal ebꞌ to a jun mach max manancan chiꞌ, syiqꞌuel junoc xan̈abꞌ ayochi, syacꞌan dꞌa vin̈ smanancan chiꞌ, chꞌoxnabꞌil tzꞌajcani.)

8 Yuj chiꞌ ix yal vin̈ scꞌabꞌ yoc vin̈aj Elimelec chiꞌ dꞌa vin̈aj Booz chiꞌ:

—Mancanel luum, xchi vin̈.

Ix lajvi chiꞌ ix yicꞌanel jun xan̈abꞌ vin̈, ix yacꞌancanbꞌat vin̈ dꞌa vin̈aj Booz chiꞌ. 9 Ix lajvi chiꞌ, ix yalan vin̈aj Booz chiꞌ dꞌa ebꞌ vin̈ yichamtac vinaquil chon̈abꞌ yedꞌ jantac ebꞌ ayecꞌ chiꞌ:

—E masanil, testigo tzex ajcan ticnaic to a in tzin mancanel lum dꞌa ix Noemí, aton slum vin̈aj Elimelec, lum yic vin̈aj Quelión, lum yic vin̈aj Mahlón. 10 An̈ejtonaꞌ testigo tzex ajpaxcani to ol vicꞌcan ix Rut aj Moab vetbꞌeyumoc, aton ix yetbꞌeyumcan vin̈aj Mahlón, yic ol bꞌinajn̈ejcan vin̈ dꞌa sluum chiꞌ yedꞌ dꞌa co cal a on̈ ayto cuj co bꞌa yedꞌ vin̈ yedꞌ dꞌa yol co chon̈abꞌ tic. Yuj chiꞌ testigo tzex ajcan dꞌa jun lolonel tic, xchi vin̈.

11 Ix tacꞌvi ebꞌ vin̈ yichamtac vinaquil chon̈abꞌ yedꞌ masanil ebꞌ ayecꞌ chiꞌ icha tic:

—Testigo tzon̈ ajcani. A ix ix tzꞌochcan dꞌa yol a pat chiꞌ, aocabꞌ Jehová ol acꞌan elcꞌoch ix icha ix Raquel yedꞌ ix Lea bꞌaj cotnac quin̈tilal a on̈ israel on̈ tic. An̈ejtonaꞌ a ach pax tic, nivanocabꞌ tzꞌaj a bꞌinajcan dꞌa yol yic Efrata, aton chon̈abꞌ Belén tic. 12 Tzijtumocabꞌ uninal ol yacꞌ Jehová yedꞌ ix, qꞌuibꞌocabꞌn̈ej sbꞌisul in̈tilal yedꞌ ix, icha ix aj sqꞌuibꞌchaan̈ yin̈tilal vin̈aj Fares, aton vin̈ yuninal vin̈aj Judá yedꞌ ix Tamar, xchi ebꞌ.

13 Icha chiꞌ ix aj yicꞌan ix Rut chiꞌ vin̈aj Booz chiꞌ. Ix lajvi chiꞌ, ix vay vin̈ yedꞌ ix, axo Jehová ix acꞌan svachꞌcꞌolal dꞌa ix, ix scuchanoch yuneꞌ ix, ix alji jun svinac unin ix.

14 Ix yalan ebꞌ ix ix dꞌa ix Noemí chiꞌ icha tic:

—Alchajocabꞌ vachꞌ lolonel dꞌa Jehová, yujto toxo ix yacꞌ jun iachiquin ilumaloc. Nivanocabꞌ ol aj sbꞌinaj dꞌa scal chon̈abꞌ Israel. 15 Aocabꞌ vin̈ ol och yipoc a cꞌool yedꞌ ach yilani ayic ol ach chichimaxoc, yujto yuneꞌ vin̈ ix alibꞌ tic. Aton ix tzach xajanani, ecꞌbꞌal yelcꞌoch ix dꞌa yichan̈ ichato ay ucvan̈oc uneꞌ ix il sat, xchi ebꞌ ix.

16 Ix lajvi chiꞌ, ix schelanqꞌue vin̈ unin chiꞌ ix Noemí chiꞌ, axo ix ix ilan qꞌuibꞌ vin̈. 17 Ayic ix yilan ebꞌ ix cajan dꞌa slacꞌanil ix chiꞌ, ix yalan ebꞌ icha tic:

—Ichato ix alji yuneꞌ ix Noemí, xchi ebꞌ ix. Obed ix yacꞌ ebꞌ ix sbꞌiej, aton vin̈ smam vin̈aj Isaí, smam vin̈aj rey David.

18-22 Aton ebꞌ smam yicham vin̈aj rey David dꞌa stzolal tic, tzꞌel yich dꞌa vin̈aj Fares, vin̈aj Hezrón, vin̈aj Ram, vin̈aj Aminadab, vin̈aj Naasón, vin̈aj Salmón, vin̈aj Booz, vin̈aj Obed, vin̈aj Isaí, aton vin̈ smam vin̈aj David chiꞌ.