Jueces sbꞌi jun libro tic, yujto a dꞌay syalcot yabꞌixal ebꞌ cuchbꞌannac ebꞌ yetisraelal ayic ayxo scham vin̈aj Josué. A dꞌa jun tiempoal chiꞌ junn̈ej yaj ebꞌ. Slajvinac chiꞌ, sjavinac jun tiempoal to man̈xo junn̈ejoc yaj ebꞌ, man̈xa pax yelcꞌoch ebꞌ yajalil ebꞌ dꞌa sat. Cotac scal scꞌoch juntzan̈ nación ay dꞌa slacꞌanil ebꞌ, syacꞌan oval yedꞌ ebꞌ. Ay pax bꞌaj munil a ebꞌ syacꞌ oval. A dꞌa yol smacbꞌen ebꞌ israel chiꞌ, ay juntzan̈ ebꞌ cananeo cannac cajan, yujto man̈ yacꞌnacoc ganar ebꞌ spechanel ebꞌ, ayn̈ej oval dꞌa scal ebꞌ yuj ebꞌ. Bꞌelbꞌon yecꞌ yajalil ebꞌ. Axon̈ej ebꞌ tzꞌacꞌan ganar yuj tas scꞌulej yalani. A ebꞌ yajalil ebꞌ chiꞌ, aton ebꞌ Juez sbꞌinaj dꞌa jun libro tic, a ebꞌ scuchbꞌan ebꞌ. A ebꞌ sbꞌinaj val can dꞌa jun libro tic, aton ebꞌ tic: Ix Débora, vin̈aj Barac, vin̈aj Gedeón yedꞌ vin̈aj Sansón. A Dios maj yactejcan ebꞌ schon̈abꞌ dꞌa juneln̈ej. Cotac scal syacꞌanoch ebꞌ yajal chiꞌ dꞌa scal ebꞌ. A yuj tas tzꞌaj schaan svachꞌcꞌolal Dios ebꞌ, aton yuj svachꞌ sbꞌeybꞌal ebꞌ dꞌa Dios. Axo pax yuj schucal bꞌeybꞌal ebꞌ jun, a tzꞌicꞌan sjavi yaelal dꞌa yibꞌan̈ ebꞌ. Vachꞌchom icha chiꞌ sbꞌeybꞌal ebꞌ, palta a Dios ayn̈ejoch dꞌa scꞌool scolan schon̈abꞌ chiꞌ, an̈ej tato sna sbꞌa ebꞌ, smeltzajpax ebꞌ dꞌay.