Josué sbꞌi jun libro tic, yujto a dꞌay tzꞌibꞌabꞌilcan yabꞌixal vin̈aj Josué, aton vin̈ ochnac sqꞌuexuloc vin̈aj Moisés dꞌa yopisio. A jun libro tic, syalcot yabꞌixal ebꞌ israel. A vin̈aj Josué chiꞌ cuchbꞌannac ebꞌ ayic yacꞌannac oval ebꞌ yedꞌ juntzan̈ chon̈abꞌ ay dꞌa lum Canaán. A dꞌa capítulo 1 masanto dꞌa 12, ataꞌ syal yuj tas ajnac scꞌaxpajecꞌ ebꞌ israel dꞌa yol aꞌ Jordán yedꞌ tas yutejnac ebꞌ yacꞌan ganar chon̈abꞌ Jericó, chon̈abꞌ Hai, chon̈abꞌ Hazor yedꞌ juntzan̈xo chon̈abꞌ ay dꞌa juntzan̈ lugar chiꞌ.

Axo dꞌa capítulo 13 masanto dꞌa 22, ataꞌ syalaꞌ tas ajnac spojchajecꞌ lum Canaán chiꞌ dꞌa junjun in̈tilal ebꞌ israel chiꞌ. Syalanpax yuj tas yutejnac ebꞌ sicꞌancanel juntzan̈ chon̈abꞌ bꞌaj scol sbꞌa ebꞌ smilancham junoc anima man̈ scꞌanoc scꞌool scꞌulani. Syalanpax tas ajnac scheclajcan juntzan̈ schon̈abꞌ ebꞌ levita, yujto a ebꞌ chiꞌ maj schalaj slum ebꞌ dꞌa scal ebꞌ yetisraelal chiꞌ. Axo chabꞌxo capítulo dꞌa slajvubꞌxo, syalcot yuj tas yalnaccan vin̈aj Josué ayic te ichamvinacxo vin̈. Syalanpaxcot tas ajnac smolbꞌan sbꞌa masanil ebꞌ israel chiꞌ dꞌa Siquem, ayic sbꞌoannacxi strato ebꞌ yedꞌ Dios. Scꞌanbꞌannac vin̈aj Josué dꞌa ebꞌ anima chiꞌ yic syabꞌan vin̈ tas sna ebꞌ, ix yacꞌan stiꞌ ebꞌ yacꞌan servil Jehová. Axo dꞌa slajvubꞌ jun libro tic, syalcot yuj schamel yedꞌ tas ajnac smucchaj vin̈aj Josué chiꞌ yedꞌ vin̈aj Eleazar sat sacerdote yuninalcan vin̈aj Aarón.