2 Toxo ix cham vin̈ in checabꞌ aj Moisés, yuj chiꞌ a achxo ol a cuchbꞌej jun chon̈abꞌ tic. Ol ex cꞌaxpajecꞌ dꞌa aꞌ Jordán tic, ol ex cꞌoch dꞌa sat lum luum ol vacꞌ chiꞌ dꞌayex. 3 A dꞌa masanil lum luum bꞌaj ol ex ecꞌoc, ol eyiquejcan luum, icha ajnac valan dꞌa vin̈aj Moisés. 4 Masanil lum sbꞌatn̈ej dꞌa taquin̈ luum masanto dꞌa lum Líbano, sbꞌatn̈ej lum dꞌa aꞌ nivan Éufrates, masanil lum yic ebꞌ hitita masanto scꞌoch dꞌa aꞌ mar Mediterráneo dꞌa stojolal bꞌaj tzꞌem cꞌu, ol vacꞌn̈ej lum dꞌayex.

5 Malaj junoc mach ol stecꞌbꞌej sbꞌa yacꞌan oval edꞌoc yujto ayinn̈ejoch edꞌoc dꞌa masanil tiempo, icha ix aj vochn̈ej yedꞌ vin̈aj Moisés chiꞌ. Malaj bꞌaqꞌuin̈ ol ach vactejcani. 6 Tecꞌann̈ej tzutej a bꞌa, man̈ ach xivoc, yujto a ach ol a puquecꞌ lum luum chiꞌ yic tzꞌochcan lum smacbꞌenej juntzan̈ anima tic, aton lum vacꞌnac in tiꞌ vacꞌan dꞌa ebꞌ e mam eyicham.

7 An̈ej sval dꞌayach, to tza tecꞌbꞌej a bꞌa, man̈ ach xivoc, tza cꞌanabꞌajan masanil cꞌaybꞌubꞌal ix yalcan vin̈ in checabꞌ aj Moisés dꞌayach. Man̈ a patiquejel jabꞌoc jun cꞌaybꞌubꞌal tic yic vachꞌn̈ej ol ach ajelcꞌochoc. 8 Man̈ actejcan avtan bꞌaj tzꞌibꞌabꞌilcan cꞌaybꞌubꞌal tic, dꞌa cꞌual dꞌacꞌval tza naubꞌtan̈ej tas syalaꞌ, yic vachꞌ ol a cꞌanabꞌajej masanil tas syal chiꞌ. Tato icha chiꞌ, masanil tas ol a cꞌulej, vachꞌn̈ej ol aj yelcꞌochi. 9 A in sval dꞌayach to tecꞌann̈ej tzutej a bꞌa, man̈ ach xivoc, mocabꞌ chabꞌax a cꞌool, yujto a in Jehová a Diosal in, ayinn̈ejoch edꞌoc yaln̈ej bꞌaj tzach eqꞌui, xchi Jehová dꞌa vin̈.

10 Ix lajvi chiꞌ, ix yalan vin̈aj Josué dꞌa ebꞌ yajalil chon̈abꞌ Israel icha tic:

11 Ixiquec dꞌa masanil campamento, tzeyalani to syacꞌ lista svael ebꞌ anima smasanil, yujto a chabꞌej tzon̈ cꞌaxpajecꞌ dꞌa aꞌ Jordán, yic syacꞌancan lum luum chiꞌ Jehová co Diosal quicoc, xchi vin̈.

12 Ix yalan vin̈ dꞌa ebꞌ yin̈tilal Rubén, dꞌa ebꞌ yin̈tilal Gad yedꞌ dꞌa nan̈al ebꞌ yin̈tilal Manasés icha tic:

13 —Naeccot masanil tas ix yalcan vin̈aj Moisés dꞌayex, vin̈ schecabꞌ Jehová, ayic ix yalan vin̈ to a Jehová ol acꞌan jun luum tic dꞌayex yic tzex cajnaj dꞌa juncꞌolal. 14 Ol eyactejcan ebꞌ ix eyetbꞌeyum, eyuninal yedꞌ nocꞌ e molbꞌetzal nocꞌ dꞌa lum tic, aton lum ix yacꞌcan vin̈aj Moisés dꞌayex dꞌa stojolal bꞌaj sjavi cꞌu dꞌa aꞌ Jordán tic. A exxo e masanil stiempoal val e bꞌat dꞌa oval, aqꞌuec lista e bꞌa yedꞌ eyamcꞌabꞌ, tzex bꞌabꞌlaj dꞌa yichan̈ masanil ebꞌ quetchon̈abꞌ tic, yic ol ex cꞌaxpaj dꞌa aꞌ Jordán tic yic tzex colvaj yedꞌ ebꞌ. 15 Masanto ol yacꞌ Jehová lum bꞌaj ol aj ebꞌ dꞌa juncꞌolal, aton lum ay dꞌa stojolal bꞌaj tzꞌem cꞌu icha ix aj yacꞌan lum eyic tic Jehová chiꞌ. Ayic toxo ix yiquejcan lum ebꞌ, ol ex meltzajxicot dꞌa lum eyic tic, axo e cajnajcan dꞌa sat luum, xchi vin̈ dꞌa ebꞌ.

16 Ix tacꞌvi ebꞌ icha tic.

—A masanil tas tzal tic, ol co cꞌanabꞌajej, yaln̈ej bꞌaj tzon̈ a checbꞌati, ol on̈ bꞌatoc. 17 Ol ach co cꞌanabꞌajej icha ix aj co cꞌanabꞌajan vin̈aj Moisés dꞌa masanil tas ix yal dꞌayon̈. An̈ej to tzꞌochn̈ej Jehová co Diosal edꞌoc icha ix aj yoch yedꞌ vin̈aj Moisés chiꞌ. 18 Yaln̈ej mach ebꞌ max cꞌanabꞌajan tas tzalaꞌ, mato spitej sbꞌa dꞌayach, a ebꞌ chiꞌ smiljicham ebꞌ. An̈ej to tza tecꞌbꞌej a bꞌa, man̈ ach xivoc, xchi ebꞌ vin̈ dꞌa vin̈aj Josué chiꞌ.