—Ay juntzan̈ ebꞌ vin̈ israel ix javi ul yil co chon̈abꞌ tic, xchi ebꞌ.

3 Yuj chiꞌ, ix yalbꞌat vin̈ rey chiꞌ dꞌa ix Rahab chiꞌ icha tic:

—Aqꞌuelta juntzan̈ ebꞌ vin̈ israel ayecꞌ posado chiꞌ dꞌayach, acꞌoch ebꞌ vin̈ dꞌa yol co cꞌabꞌ yujto ton̈ej tzul yilbꞌat co chon̈abꞌ tic ebꞌ vin̈, xchibꞌat vin̈ rey chiꞌ.

4-6 Ix yalan ix icha tic:

—Yeltoni, ay juntzan̈ ebꞌ vin̈ ix ecꞌ dꞌa tic, palta man̈ vojtacoc bꞌajtil ix cot ebꞌ vin̈. Axo yic vanxo sqꞌuicꞌbꞌi ix bꞌat ebꞌ vin̈, yujto yorailxo smacchaj spuertail chon̈abꞌ. Man̈ vojtacoc tas bꞌeal bꞌaj ix bꞌat ebꞌ vin̈. Tato elan̈chamel tzex bꞌat dꞌa spatic ebꞌ vin̈, tecan tzato yamchaj ebꞌ vin̈ eyuuj, xchi ix. Icha chiꞌ ix aj yalan ix, palta toxo ix scꞌubꞌejel ebꞌ vin̈ ix dꞌa span̈anil yibꞌan̈ spat, dꞌa yalan̈ juntzan̈ an̈ lino manojail yaji.

7 Ix lajvi chiꞌ ix bꞌat tzacꞌan ebꞌ vin̈ schecabꞌ vin̈ rey chiꞌ dꞌa spatic ebꞌ vin̈ yalani, masanto ix cꞌoch ebꞌ vin̈ dꞌa stiꞌ aꞌ Jordán bꞌaj jay aꞌ, ixn̈ej val elcan ebꞌ vin̈ soldado chiꞌ, ix macchaj spuertail chon̈abꞌ. 8 Axo yic manto vaylaj ebꞌ vin̈ chavan̈ chiꞌ, ix qꞌuecꞌoch ix Rahab dꞌa yibꞌan̈ spat chiꞌ dꞌa ebꞌ vin̈, ix yalan ix icha tic:

9 —Vojtac to a Jehová ix acꞌan jun lum tic dꞌayex, yuj chiꞌ ix javi jun nivan xivcꞌolal dꞌa quibꞌan̈, man̈xo on̈ animaoc scabꞌi ayic scabꞌan e pecal. 10 Cabꞌnac specal ayic eyelnaccot dꞌa Egipto to a Jehová pojannac snan̈al aꞌ Chacchac Mar, eyecꞌnaccot dꞌa staquin̈al. Cabꞌannacpax specal to e satnaccanel chavan̈ ebꞌ vin̈ sreyal amorreo dꞌa scꞌaxepalecꞌ aꞌ Jordán, aton vin̈aj Sehón yedꞌ vin̈aj Og. 11 Te xivnac on̈ ayic cabꞌannac specal jun chiꞌ. Malaj mach syal stzacꞌvan dꞌayex, yujto a Jehová e Diosal, an̈ejton Dios dꞌa satchaan̈ yedꞌ dꞌa sat lum luum tic. 12 Yuj chiꞌ tzin tevi dꞌayex to tze loc sbꞌi Jehová e Diosal yic tzeyacꞌancan e tiꞌ dꞌayin to tze nacot masanil ebꞌ ayto vuj in bꞌa yedꞌoc, icha val tzex vutej tic. Yuj chiꞌ aqꞌuec junoc seña, tato yel tzeyalaꞌ 13 to tzeyacꞌ nivancꞌolal dꞌa yibꞌan̈ in mam in nun yedꞌ masanil ebꞌ in nulej yedꞌ masanil tas ay dꞌa ebꞌ, mocabꞌ sateloc, xchi ix.

14 Ix tacꞌvi ebꞌ vin̈ chavan̈ chiꞌ icha tic:

—Scacꞌ co tiꞌ to ol ex co nacoti, an̈ej tato malaj bꞌaj tzal jun tic. Ayic ol yacꞌanoch jun lum tic Jehová dꞌa yol co cꞌabꞌ, ol ach co colcaneli, xchi ebꞌ vin̈ dꞌa ix.

15 A ix Rahab chiꞌ, a dꞌa yibꞌan̈ smuroal jun chon̈abꞌ chiꞌ, ataꞌ bꞌobꞌilqꞌue spat ix, yuj chiꞌ axo dꞌa sventenail spat ix chiꞌ, ataꞌ ix yaqꞌuel ebꞌ vin̈ ix. Cꞌojancꞌolal ix em dꞌun̈un̈oc ebꞌ vin̈ dꞌa spatiquel jun chon̈abꞌ chiꞌ yuj ix dꞌa jun chꞌan̈ lasu. 16 Ayic mantzac em ebꞌ vin̈, ix yalan ix dꞌa ebꞌ vin̈ icha tic:

—Ixiquec dꞌa caltac teꞌ dꞌa lum jolom vitz chiꞌ, yic man̈ ol ex ilchaj yuj ebꞌ vin̈ tzex sayanecꞌ chiꞌ, tze cꞌubꞌejel e bꞌa taꞌ oxeoc cꞌual, masanto sjaxcan ebꞌ vin̈ dꞌa yol chon̈abꞌ tic, ichato chiꞌ tzex pax bꞌaj ex cot chiꞌ, xchi ix dꞌa ebꞌ vin̈.

17 Ix yalan ebꞌ vin̈ dꞌa ix icha tic:

—Ol caqꞌuelcꞌoch co tiꞌ ix cacꞌcan tic dꞌayach, 18 palta ayic ol on̈ javoc cacꞌ oval yedꞌ a chon̈abꞌ tic, yovalil locanocabꞌem jun chacchac lasu dꞌa ventena bꞌaj ol on̈ aqꞌuem dꞌun̈un̈oc tic. Tza molbꞌancot a mam a nun, ebꞌ a nulej yedꞌ ebꞌ ayto uj a bꞌa yedꞌoc dꞌa yol a pat tic. 19 Tato ay junoc tzꞌel dꞌa yol a pat tic ayic van cacꞌan oval chiꞌ, tato schami, max canlaj schamel chiꞌ dꞌa quibꞌan̈, palta tato a dꞌa yol a pat tic ayecꞌ junoc scham cuuj, a schamel chiꞌ scan dꞌa quibꞌan̈. 20 An̈ejtonaꞌ tato tzalelta tas tzul co cꞌulej tic, a on̈xo tic man̈xo ol caqꞌuelcꞌoch co tiꞌ ix cacꞌ tic dꞌayach, xchi ebꞌ vin̈.

21 —Ichocabꞌ taꞌ, xchi ix.

Ix lajvi yalan quil co bꞌa ebꞌ vin̈ dꞌa ix, ix stzecꞌancanoch jun chꞌan̈ lasu chiꞌ ix dꞌa sventenail spat chiꞌ.

22 Ix qꞌuecan ebꞌ vin̈ chavan̈ chiꞌ scꞌubꞌejel sbꞌa oxeꞌ cꞌual dꞌa caltac teꞌ dꞌa jolom vitz chiꞌ. Ix ecꞌ ebꞌ vin̈ soldado chiꞌ say ebꞌ vin̈, palta maj ilchajlaj ebꞌ vin̈, yuj chiꞌ ix meltzaj ebꞌ vin̈ soldado chiꞌ dꞌa Jericó chiꞌ. 23 Axo ebꞌ vin̈ chavan̈ ilum luum chiꞌ, ix emixta ebꞌ vin̈, ix cꞌaxpajxiecꞌ ebꞌ vin̈ dꞌa aꞌ Jordán chiꞌ, ix cꞌochxi ebꞌ vin̈ bꞌaj aycan vin̈aj Josué chiꞌ, ix och ijan ebꞌ vin̈ yalan dꞌa vin̈ tastac ix bꞌat yil ebꞌ vin̈ taꞌ. 24 Ix yalan ebꞌ vin̈ icha tic: A Jehová van yacꞌanoch juntzan̈ chon̈abꞌ chiꞌ dꞌa yol co cꞌabꞌ, yujto a ebꞌ anima taꞌ ichato chamnacxo ebꞌ yuj xivelal dꞌayon̈, xchi ebꞌ vin̈.