Deuteronomio sbꞌi jun libro tic, syalelcꞌochi, “syalcot ley junelxo”. A dꞌa jun libro tic tzꞌibꞌabꞌilcan juntzan̈ tas nivan yelcꞌoch yalnaccan vin̈aj Moisés dꞌa ebꞌ israel ayic mantzac cꞌoch ebꞌ dꞌa lum Canaán. Syalanpaxcot juntzan̈ scꞌaybꞌubꞌal Dios yedꞌ masanil tas scꞌulejnac Dios chiꞌ yedꞌ ebꞌ ayic yelnaccot ebꞌ dꞌa Egipto. Syalpaxcot jayeꞌ abꞌil ecꞌnac oyoyoc ebꞌ dꞌa lum tzꞌinan luum. A Dios man̈ ton̈ejoc scolnac ebꞌ schon̈abꞌ sicꞌbꞌilel yuj chiꞌ, palta yacꞌnacpax svachꞌcꞌolal dꞌa yibꞌan̈ ebꞌ ayic yecꞌnac oyoyoc ebꞌ dꞌa lum tzꞌinan luum chiꞌ. Yuj chiꞌ smoj val to xajan Dios chiꞌ yuj ebꞌ, scꞌanabꞌajan ebꞌ tas syalaꞌ, syalan vachꞌ lolonel ebꞌ dꞌay, yic syacꞌn̈ej svachꞌcꞌolal dꞌa ebꞌ. Ay val jayeꞌ versículo te nivan yelcꞌoch dꞌa jun libro tic, aton dꞌa capítulo 6 versículos 4,5 yedꞌ 6. Yalnacpaxcan Jesucristo yuj juntzan̈ versículo tic ayic scꞌaybꞌannac ebꞌ anima to a juntzan̈ checnabꞌil tic te nivan yelcꞌochi.

A dꞌa capítulo 1 masanto dꞌa 4, ataꞌ syalcan vin̈aj Moisés tastac scꞌulejnac dꞌa tzꞌinan luum. Axo dꞌa capítulo 5 masanto dꞌa 26, ataꞌ syalpaxcot schabꞌil macan̈ slolonel vin̈aj Moisés chiꞌ. A juntzan̈ chiꞌ cachnabꞌil yaji, a dꞌa lajun̈eꞌ checnabꞌil elnaccoti. Syalanpaxcoti tas yovalil sbꞌeybꞌalej ebꞌ israel ayic ol och ebꞌ dꞌa lum Canaán, yic syicancan lum ebꞌ. A dꞌa capítulo 27 yedꞌ 28, ataꞌ syal yuj svachꞌcꞌolal Dios scha ebꞌ. Axo dꞌa capítulo 29 yedꞌ 30, ataꞌ syalaꞌ to tzꞌacꞌbꞌixi strato Dios yacꞌnac yedꞌ ebꞌ israel dꞌa lum vitzal Sinaí. Axo dꞌa capítulo 31 masanto dꞌa 34, ataꞌ syal masanil slajvubꞌ slolonel vin̈aj Moisés yalnaccan dꞌa ebꞌ yetisraelal. Yalancan sbꞌa vin̈ dꞌa ebꞌ, yujto yojtacxo vin̈ to toxo ol cham vin̈. Axo vin̈aj Josué yacꞌcanoch vin̈ sqꞌuexuloc dꞌa yopisio. Slajvi chiꞌ, sqꞌue vin̈ dꞌa lum vitz scuch Nebo, ataꞌ yilcanbꞌat lum Canaán vin̈, axo taꞌ cham vin̈.