Sleyal yuj smacbꞌen ebꞌ ix ix
36
A ebꞌ yichamtac vinaquil yaj dꞌa ebꞌ yin̈tilalcan Galaad, aton ebꞌ yin̈tilalcan vin̈aj Maquir yuninal vin̈aj Manasés, yuninalcan vin̈aj José, ix ja ebꞌ dꞌa yichan̈ vin̈aj Moisés yedꞌ ebꞌ yajalil chon̈abꞌ, ix yalan ebꞌ icha tic:2 —Ach mamin Moisés, a Jehová ix alani to ol a pojecꞌ lum luum dꞌa co cal a on̈ yin̈tilal on̈ Israel tic ato syalaꞌ bꞌaj ol quicꞌ junjun on̈. Ix yalanpaxi to a jun macan̈ lum dꞌin̈an ol yicꞌ vin̈aj Zelofehad vin̈ cucꞌtac chamnac, syal yacꞌji lum dꞌa ebꞌ ix yisil vin̈. 3 Palta qꞌuinaloc a ebꞌ ix chiꞌ tzꞌicꞌan ebꞌ vin̈ vinac dꞌa junocxo in̈tilal ebꞌ quetisraelal, yuj chiꞌ a lum chiꞌ tzam el lum dꞌa yol smacbꞌen quin̈tilal tic, axom yecꞌ lum dꞌa yol smacbꞌen yin̈tilal ebꞌ vin̈ syicꞌ ebꞌ ix chiꞌ. 4 Slajvi chiꞌ, axom yic scꞌoch yabꞌilal yoch qꞌuin̈ yic tzꞌel tastac dꞌa libre, tzam canxon̈ej slum ebꞌ ix chiꞌ dꞌa yol smacbꞌen junxo in̈tilal chiꞌ, tzꞌelcan lum dꞌa yol co macbꞌen tic, xchi ebꞌ. 5 Ix yalan vin̈aj Moisés dꞌa ebꞌ icha ix aj yalan Jehová:
—A ebꞌ vin̈ yin̈tilalcan José, yel tas syal ebꞌ vin̈. 6 Yuj chiꞌ a ebꞌ ix yisil vin̈aj Zelofehad syal yicꞌan ebꞌ ix yaln̈ej mach bꞌaj scan sgana, an̈ej to junn̈ejocabꞌ yin̈tilal ebꞌ vin̈ yedꞌ ebꞌ ix. 7 Yujto a junjun macan̈ lum ol yicꞌcan junjun yin̈tilal ebꞌ israel chiꞌ, max yal-laj yicꞌjiecꞌ lum yuj junocxo in̈tilal ebꞌ, palta yovalil junjun in̈tilal yedꞌ sluum ol yicꞌcani. 8 Tato ay junoc ix ix yalxon̈ej tas in̈tilal ay lum smacbꞌen ix aycani, yovalil to a junoc vin̈ vinac an̈ejaꞌ yin̈tilal ix chiꞌ syicꞌaꞌ. Icha chiꞌ tzꞌaj yajecꞌ junjun ebꞌ dꞌa yol smacbꞌen ol schacan smam. 9 Max yal-laj sbꞌat slum junoc in̈tilal dꞌa junocxo in̈tilal. Junjun yin̈tilal ebꞌ israel scann̈ej yedꞌ smacbꞌen ol schaꞌa.
10-11 Yuj chiꞌ, a ebꞌ ix yisil vin̈aj Zelofehad chiꞌ: Aton ix Maala, ix Tirsa, ix Hogla, ix Milca yedꞌ ix Noa, ix scꞌanabꞌajej ebꞌ ix scꞌulan icha ix yal Jehová dꞌa vin̈aj Moisés chiꞌ. Yuj chiꞌ a ebꞌ vin̈ ayto yuj sbꞌa yedꞌ smam ebꞌ ix, a ebꞌ vin̈ ix yicꞌ ebꞌ ix, 12 aton ebꞌ yin̈tilalcan Manasés yuninal vin̈aj José. Icha chiꞌ ix aj scann̈ej smacbꞌen ebꞌ ix dꞌa yol smacbꞌen yin̈tilal bꞌaj cotnac smam ebꞌ ix chiꞌ.
13 Aton val juntzan̈ ley yedꞌ checnabꞌil tic ix yacꞌcan Jehová dꞌa vin̈aj Moisés yuj yalchaj dꞌa ebꞌ israel, ayic ayecꞌ ebꞌ dꞌa yacꞌlical Moab, dꞌa stiꞌ aꞌ Jordán dꞌa yichan̈ Jericó.