2 Al dꞌa ebꞌ etisraelal, a dꞌa lum sluum ebꞌ ol scha chiꞌ, ataꞌ ol yacꞌ jayeoc chon̈abꞌ ebꞌ dꞌa ebꞌ levita bꞌaj ol cajnajoc yedꞌ pax lum colan dꞌa spatic yichan̈ junjun chon̈abꞌ chiꞌ bꞌaj ol va nocꞌ smolbꞌetzal nocꞌ ebꞌ levita chiꞌ. 3 A dꞌa juntzan̈ chon̈abꞌ chiꞌ ol cajnaj ebꞌ, axo dꞌa spatic yichan̈ ol va nocꞌ smolbꞌetzal nocꞌ ebꞌ. 4 A lum colan dꞌa spatic yichan̈ juntzan̈ schon̈abꞌ ebꞌ ol acꞌjoc chiꞌ, ayocabꞌ 450 metro tzꞌel dꞌa spatictac. 5 Masanil jun lum chiꞌ, ay 900 metro dꞌa junjun pacꞌan̈, lajann̈ej tzꞌaj sat dꞌa schan̈il pacꞌan̈. Axo dꞌa snan̈al yol scꞌol luum, ataꞌ aycan junjun chon̈abꞌ chiꞌ.

6 A dꞌa scal juntzan̈ chon̈abꞌ tzꞌacꞌji dꞌa ebꞌ levita chiꞌ, ayocabꞌ vaqueoc chon̈abꞌ bꞌaj syal bꞌat scolan sbꞌa junoc mach smacꞌancham junoc anima. Chꞌoc pax tzeyacꞌ 42-ocxo chon̈abꞌ dꞌa ebꞌ. 7 A dꞌa masanil, yovalil tzꞌacꞌji 48 chon̈abꞌ dꞌa ebꞌ levita chiꞌ yedꞌ slumal dꞌa spatictac bꞌaj sva smolbꞌetzal nocꞌ ebꞌ. 8 A dꞌa lum smacbꞌen ebꞌ yetisraelal ebꞌ levita chiꞌ, ataꞌ tzꞌelta juntzan̈ chon̈abꞌ tzꞌacꞌji dꞌa ebꞌ. Yuj chiꞌ junjun in̈tilal syacꞌ jayeoc juntzan̈ chon̈abꞌ chiꞌ. A juntzan̈ eyin̈tilal nivac sluum, tzijtum chon̈abꞌ syacꞌ ebꞌ dꞌa ebꞌ levita chiꞌ, axo juntzan̈ eyin̈tilal quenn̈ej sluum, quenn̈ej chon̈abꞌ syacꞌ ebꞌ dꞌa ebꞌ, xchi dꞌa vin̈.

9 Ix yalanxi Jehová dꞌa vin̈aj Moisés chiꞌ icha tic:

10 Al jun tic dꞌa ebꞌ etisraelal: Ayic ol ex cꞌaxpajecꞌ dꞌa aꞌ Jordán, ol ex och chon̈abꞌil dꞌa sat lum Canaán chiꞌ. 11 Ol e siqꞌuel jayeoc chon̈abꞌ bꞌaj ol yal scolan sbꞌa junoc mach smacꞌancham junoc anima tato man̈ scꞌanoc scꞌool scꞌulani. 12 Ataꞌ scol sbꞌa jun chiꞌ, vachꞌchom sayjiecꞌ yuj junoc mach ayto yuj sbꞌa yedꞌ jun ix cham chiꞌ, max yal-laj schami, tato maxto cꞌanbꞌaj dꞌay yuj ebꞌ yajal yaj dꞌa chon̈abꞌ chiꞌ. 13 A juntzan̈ chon̈abꞌ bꞌaj scol sbꞌa ebꞌ chiꞌ, vaqueꞌ chon̈abꞌil ol yil sbꞌa: 14 Oxeꞌ scan dꞌa scꞌaxepalecꞌta aꞌ Jordán tic, oxeꞌ pax scan dꞌa Canaán chiꞌ. 15 A dꞌa vaqueꞌ chon̈abꞌ chiꞌ, ataꞌ scol sbꞌa ebꞌ anima smacꞌancham junoc anima, aton ebꞌ eyetisraelal yedꞌ ebꞌ man̈ eyetchon̈abꞌoc ayecꞌ cajan dꞌa e cal, ma ebꞌ ton̈ej tzꞌecꞌ posado. Ataꞌ scol sbꞌa ebꞌ tato man̈ scꞌanoc scꞌol ebꞌ smacꞌancham anima chiꞌ ebꞌ.

16-18 Tato ay junoc mach smacꞌan junoc anima yedꞌ junoc qꞌuen yamcꞌabꞌ yic oval, ma yedꞌ junoc yaxqꞌueen, ma yedꞌ junoc te teꞌ, talaj scham jun anima chiꞌ yuuj, a jun smacꞌvaj chiꞌ, macꞌumcham anima toni, yovalil smacꞌjipax chamoc. 19 A junoc ayto yuj sbꞌa yedꞌ vin̈ ix cham chiꞌ, aꞌ smacꞌanpaxcham vin̈ ix macꞌancham jun anima chiꞌ ayic schalan sbꞌa yedꞌoc.

20 Qꞌuinaloc ay junoc mach tzꞌecanbꞌat pocꞌnaj junoc anima yujto schichonoch scꞌol dꞌay, ma syecanbꞌat junoc tas dꞌa yibꞌan̈ yuj yajcꞌolal, 21 mato smacꞌaꞌ yujto yajcꞌol sbꞌa ebꞌ, axo tzꞌaji scham jun anima chiꞌ, yovalil smacꞌjipaxcham jun ix macꞌvaj chiꞌ, yujto macꞌumcham anima. Yuj chiꞌ a junoc ayto yuj sbꞌa yedꞌ vin̈ ix cham chiꞌ, a smacꞌanpaxcham jun mach smilvaj chiꞌ. 22 Palta qꞌuinaloc ay junoc mach tzꞌecan telvoc junoc anima, man̈ scꞌanoc scꞌool, tato malaj oval dꞌa scal ebꞌ, ma jun, syecanbꞌat junoc tas dꞌa yibꞌan̈, 23 an̈ejtonaꞌ tato maj yilpaxi, sjulanbꞌat junoc qꞌueen axo dꞌa junoc anima scꞌoch qꞌueen, scham yuuj, man̈ yajcꞌoloc sbꞌa ebꞌ, man̈ yujoc yacꞌan chucal dꞌay yuj chiꞌ icha chiꞌ tzꞌaji. 24 Tato icha chiꞌ, sbꞌat scol sbꞌa jun anima chiꞌ dꞌa junoc chon̈abꞌ bꞌaj scol sbꞌa ebꞌ anima chiꞌ. Axo ebꞌ anima bꞌaj snibꞌej scol sbꞌa chiꞌ, a ebꞌ tzꞌicꞌanbꞌat bꞌaj ix och jun chamel chiꞌ. Axo ebꞌ anima cajan bꞌaj ix och chamel chiꞌ, a ebꞌ schꞌolbꞌitan jun ay smul chiꞌ yedꞌ jun ayto yuj sbꞌa yedꞌ jun ix cham chiꞌ, icha yalan sleyal dꞌa yibꞌan̈ ebꞌ.

25 A ebꞌ yichamtac vinaquil chon̈abꞌ bꞌaj ix bꞌat scol sbꞌa jun ix macꞌancham jun anima chiꞌ, a ebꞌ scolan dꞌa yol scꞌabꞌ vin̈ ayto yuj sbꞌa yedꞌ jun ix cham chiꞌ. Axo ebꞌ tzꞌicꞌanxibꞌat dꞌa chon̈abꞌ bꞌaj ix xidꞌecꞌ scol sbꞌa chiꞌ. A jun chiꞌ scann̈ej taꞌ masanto scham vin̈ sat sacerdote sicꞌbꞌiloch dꞌa jun tiempoal chiꞌ. 26 Palta tato tzꞌel dꞌa spatiquel chon̈abꞌ bꞌaj ayecꞌ scol sbꞌa chiꞌ, 27 tzꞌilchajelta yuj jun mach ayto yuj sbꞌa yedꞌ jun smacꞌnaccham chiꞌ, smacꞌjicham yuj jun tzꞌilanelta chiꞌ, a jun smilvaj chiꞌ max ochlaj smul. 28 Yuj chiꞌ yovalil ayn̈ejocabꞌecꞌ dꞌa yol chon̈abꞌ chiꞌ masanto scham vin̈ sat sacerdote, ichato chiꞌ syal spax dꞌa schon̈abꞌ.

29 A juntzan̈ tic ley tzꞌajcan dꞌa e cal yedꞌ dꞌa scal ebꞌ eyin̈tilal, yaln̈ej bꞌajtil ol ex cajnajoc.

30 Tato ay chavan̈oc, ma oxvan̈oc testigo dꞌa spatic junoc mach smacꞌancham junoc anima, a jun chiꞌ ay sleyal schami. Tato junn̈ej testigo jun, max yal-laj schami. 31 Max yal-laj schaji qꞌuen tumin tato toxo ix och dꞌa yibꞌan̈ junoc mach to ix smacꞌcham junoc anima, yovalil schami.

32 Max yal-laj schaji qꞌuen tumin dꞌa junoc smacꞌancham junoc anima yuj yel libre dꞌa chon̈abꞌ bꞌaj ayecꞌ scol sbꞌa chiꞌ, yic spax dꞌa schon̈abꞌ ayic manto cham vin̈ sat sacerdote.

33 Man̈ eyixtejbꞌat lum luum bꞌaj ol ex cajnaj chiꞌ yuj schiqꞌuil anima smacꞌjichamoc. Yuj chiꞌ tato ay chicꞌ tzꞌem dꞌa sat luum, malaj junoc tas syal yacꞌan tupoc, an̈ej to scham jun ix macꞌancham anima chiꞌ.

34 Yuj chiꞌ, man̈ eyixtejbꞌat sat lum luum bꞌaj ol ex cajnaj chiꞌ, yujto a in Jehová in ayinecꞌ dꞌa e cal a ex israel ex tic dꞌa sat lum luum chiꞌ, xchi Jehová dꞌa vin̈aj Moisés chiꞌ.