Juntzan̈ chon̈abꞌ bꞌaj scol sbꞌa anima
19
Ayic toxo ix satel masanil juntzan̈ anima yuj Jehová co Diosal, toxo ix eyiquej schon̈abꞌ ebꞌ, slum ebꞌ yedꞌ spat ebꞌ. 2 A dꞌa scal juntzan̈ chiꞌ ol e siqꞌuel oxeoc chon̈abꞌ aton juntzan̈ ol yacꞌ Jehová co Diosal eyicoc. 3 Oxeꞌ macan̈ ol aj e pojan luum. A dꞌa snan̈altac yol junjun macan̈ luum chiꞌ, ataꞌ scan junjunoc juntzan̈ chon̈abꞌ chiꞌ. Ol e bꞌoan sbꞌeal juntzan̈ chon̈abꞌ chiꞌ, yic vachꞌ yaln̈ej mach smacꞌancham junoc yetanimail, syal sbꞌat scol sbꞌa dꞌa juntzan̈ chon̈abꞌ chiꞌ. 4 An̈ej mach smacꞌancham junoc anima, tato man̈ scꞌanoc scꞌool, man̈ yajcꞌoloc sbꞌa ebꞌ, ataꞌ bꞌat scol sbꞌa, yic vachꞌ max chami. 5 Qꞌuinaloc ay chavan̈oc ebꞌ vin̈ sbꞌat cꞌatzitz, tato ay junoc ebꞌ vin̈ tzꞌelta qꞌuen schꞌacabꞌ, sva qꞌuen dꞌa junxo vin̈ chiꞌ, scham vin̈, a vin̈ tzꞌelta qꞌuen schꞌacabꞌ chiꞌ syal sbꞌat vin̈ scol sbꞌa dꞌa juntzan̈ chon̈abꞌ chiꞌ. 6 Qꞌuinaloc junn̈ej chon̈abꞌ, najat sbꞌat sbꞌeal, ay smay syamchaj vin̈ yuj junoc scꞌabꞌ yoc vin̈ ix cham chiꞌ, smacꞌancham vin̈ chiꞌ yedꞌ yoval scꞌool, palta man̈ smojoc scham vin̈, yujto toxonton man̈ yajcꞌoloc sbꞌa ebꞌ vin̈. 7 Yuj chiꞌ sval dꞌayex to tze sicꞌcanel oxeoc chon̈abꞌ bꞌaj syal scolan sbꞌa anima. 8-9 Tato ol e bꞌeybꞌalejn̈ej juntzan̈ checnabꞌil sval tic dꞌayex, yujto tze xajanej Jehová co Diosal, tze cꞌanabꞌajani, ol yacꞌ lum luum chiꞌ Jehová smasanil dꞌayex, icha val ajnac yacꞌan stiꞌ dꞌa ebꞌ co mam quicham. Ayic ol levanbꞌoc lum e luum chiꞌ yuj Jehová co Diosal, ol e sicꞌanel oxeocxo chon̈abꞌ stzꞌacubꞌoc oxeꞌ chequelxo yaj chiꞌ, aton bꞌaj syal e colan e bꞌa. 10 Icha chiꞌ ol e cꞌulej, yic vachꞌ man̈ comonoc ol cham junoc anima malaj smul dꞌa lum luum ol yacꞌ Jehová co Diosal dꞌayex, yic vachꞌ max cotcan dꞌa eyibꞌan̈ yuj ebꞌ anima scham chiꞌ.11 Qꞌuinaloc ay chavan̈oc ebꞌ vin̈ toxon yajcꞌol sbꞌa, a junoc vin̈ smaclan yecꞌ junxo vin̈ chiꞌ yic smacꞌancham vin̈, ayic smacꞌancham vin̈ chiꞌ vin̈, sbꞌat vin̈ scol sbꞌa dꞌa junoc juntzan̈ chon̈abꞌ chiꞌ. 12 Tato icha chiꞌ, axo ebꞌ vin̈ yichamtac vinaquil schon̈abꞌ vin̈ ix cham chiꞌ, a ebꞌ vin̈ schecanbꞌat yamchaj vin̈ ix sbꞌat scol sbꞌa chiꞌ taꞌ, tzꞌicꞌjibꞌat vin̈ dꞌa schon̈abꞌ yic tzꞌacꞌjioch vin̈ dꞌa yol scꞌabꞌ junoc scꞌabꞌ yoc vin̈ ix cham chiꞌ, yic smacꞌjipaxcham vin̈. 13 Man̈ eyacꞌ nivancꞌolal jun anima chiꞌ, yic vachꞌ max can schamel junoc anima malaj smul dꞌa eyibꞌan̈, yic vachꞌ ol aj eyelcꞌochi.
14 A dꞌa lum luum ol yacꞌ Jehová co Diosal chiꞌ dꞌayex, man̈ e qꞌuex stzꞌacan̈il e lum aycanem yuj e mam eyicham yic tze tocꞌan ecꞌ yic junocxo mach ay yic dꞌa stitac eyicoꞌ.
Ley dꞌa yibꞌan̈ ebꞌ testigo tzꞌesani
15 Tato junn̈ej testigo dꞌa spatic junoc anima tzꞌoch smul, max yal-laj yoch dꞌa yibꞌan̈. Masanto ay chavan̈oc, ma oxvan̈oc testigo, ichato chiꞌ tzꞌoch dꞌa yibꞌan̈ jun ay smul chiꞌ.
16 Qꞌuinaloc ay junoc chuc spensar syicꞌchaan̈ junoc esal lolonel dꞌa spatic junoc mach yic syicꞌancot dꞌa yibꞌan̈. 17 Tato icha chiꞌ, yovalil tzꞌicꞌjibꞌat ebꞌ schavan̈il dꞌa yichan̈ Jehová, aton dꞌa yichan̈ ebꞌ sacerdote yedꞌ ebꞌ juez ayoch dꞌa yopisio. 18 A ebꞌ ayoch yajalil chiꞌ, a ebꞌ schꞌolbꞌitani tato yel jun lolonel chiꞌ, mato es syicꞌchaan̈ jun anima dꞌa spatic junxo chiꞌ. 19 A dꞌa yibꞌan̈ jun tzꞌesan chiꞌ, ataꞌ tzꞌochcan jantac tas ix snibꞌej yacꞌoch dꞌa yibꞌan̈ junxo anima chiꞌ. Icha chiꞌ tzꞌaj slajvi jun esalvumal chiꞌ dꞌa e cal. 20 Ayic ol yabꞌan jun chiꞌ ebꞌ anima, ol xiv ebꞌ, man̈xo ol scꞌulej ebꞌ icha chiꞌ. 21 Mocabꞌ ocꞌ e cꞌol dꞌa junoc esalvum chiꞌ. Icha val tas sgana dꞌa spatic yetanimail chiꞌ, icha chiꞌ tzꞌutaji. Tato sgana to smacꞌjicham jun yetanimail chiꞌ, ma tzꞌicꞌjielta yol sat, ma smacꞌjiel ye, ma xicjiel scꞌabꞌ, ma yoc, icha val sgana tzꞌutaj jun anima chiꞌ, icha chiꞌ tzꞌutaji.