A sleyal yoch oval
20
Ayic tzex bꞌat oval, man̈ ex xiv dꞌa ebꞌ eyajcꞌool chi. Vachꞌchom tzeyilaꞌ to ecꞌto sbꞌisul ebꞌ dꞌayex, nivanpax sbꞌisul nocꞌ schej ebꞌ yedꞌ scarruaje ebꞌ yic oval yedꞌ soldado ebꞌ, man̈ ex xivoc yujto a Jehová co Diosal icꞌjinac on̈ elta dꞌa Egipto, aꞌ ol och eyedꞌoc. 2 Ayic manto cꞌoch yorail yoch oval chiꞌ, a vin̈ sacerdote tzꞌalan dꞌa ebꞌ soldado icha tic: 3 Abꞌec ex vetchon̈abꞌ, a ticnaic toxo ol eyacꞌ oval yedꞌ ebꞌ cajcꞌool, mocabꞌ chabꞌaxqꞌue e cꞌool, man̈ ex xivoc. Man̈ ex ibꞌxocqꞌue yuj xivelal, 4 yujto a Jehová co Diosal ayoch quedꞌoc. A ol acꞌan oval yedꞌ ebꞌ cajcꞌool chiꞌ, yuj chiꞌ ol cacꞌ ganar ebꞌ, xcham vin̈.5 Slajvi chiꞌ, syalan ebꞌ yajalil ebꞌ soldado icha tic: Tato ay junoc ex toto ix e bꞌoqꞌue e pat, manto ex ochlaj dꞌa yool, meltzajan̈ec, qꞌuinaloc tzex cham dꞌa scal oval tic, chꞌocxo mach scajnajcan dꞌa yol e pat chiꞌ. 6 Tato ay pax junoc mach dꞌa co cal tic ix yavej yuva, manta jabꞌoc sat smoloꞌ, meltzajocabꞌ dꞌa spat. Qꞌuinaloc scham dꞌa scal oval tic, chꞌocxo mach smolan sat yuva chiꞌ.
7 Tato ay junoc ex ayxo e trato e nupnaji, palta manto ex nupnajoc, meltzajan̈ec yic tzex nupnaji. Qꞌuinaloc tzex cham dꞌa scal oval tic, chꞌocxopax mach snupnaj yedꞌ ix ix chiꞌ, xcham ebꞌ.
8 Slajvi chiꞌ syalanpax ebꞌ yajalil soldado chiꞌ: Tato ayex tzex xivi, meltzajan̈ec dꞌa e pat, yic vachꞌ malaj ebꞌ schabꞌaxqꞌue scꞌool eyuuj, xcham ebꞌ. 9 Ayic slajvi slolon masanil ebꞌ yajal chiꞌ, tzꞌacꞌjioch yopisio junjun cuchbꞌum dꞌa junjun macan̈ ebꞌ soldado.
10 Tato tzex cꞌoch dꞌa spatictac junoc chon̈abꞌ yic tzeyacꞌan oval yedꞌoc, bꞌabꞌel tzeyalaꞌ: ¿E gana am juncꞌolal, mato oval? xe chi. 11 Tato a ebꞌ ay dꞌa jun chon̈abꞌ chiꞌ sgana juncꞌolal, tzex schaanoch ebꞌ dꞌa yol schon̈abꞌ chiꞌ, yovalil tzeyacꞌ pural ebꞌ yochcan e checabꞌoc. 12 Palta tato malaj sgana ebꞌ yoch juncꞌolal eyedꞌoc jun, tato syal ebꞌ: Caqꞌuec oval, tato xchi ebꞌ, tzex oymaj dꞌa spatictac schon̈abꞌ ebꞌ chiꞌ, tzeyacꞌan oval. 13 Axo Jehová co Diosal ol acꞌanoch ebꞌ dꞌa yol e cꞌabꞌ, ol e xicancham masanil ebꞌ vin̈ vinac. 14 Axon̈ej ebꞌ ix ix yedꞌ ebꞌ unin, nocꞌ molbꞌetzal nocꞌ yedꞌ masanil tas ay dꞌa jun chon̈abꞌ chiꞌ, eyic tzꞌajcani. Tzex tzalaj yedꞌ masanil tastac ol scha scꞌol Jehová co Diosal yic scan dꞌa yol e cꞌabꞌ, aton masanil tas ol eyicꞌ dꞌa ebꞌ ajcꞌool chiꞌ. 15 Ichan̈ej chiꞌ ol e cꞌulej yedꞌ juntzan̈ nación najat ay bꞌaj ol ex cajnaj chiꞌ. 16 Palta a juntzan̈ chon̈abꞌ ay dꞌa lum luum ol yacꞌ Jehová co Diosal eyiquej, man̈xa junoc anima tzeyactejcani. 17 Ol e satel juntzan̈ ebꞌ tic: Ebꞌ hitita, ebꞌ amorreo, ebꞌ cananeo, ebꞌ ferezeo, ebꞌ heveo yedꞌ ebꞌ jebuseo, icha val ajnac yalan Jehová. 18 Icha chiꞌ tzeyutej ebꞌ, yic vachꞌ max ex scꞌaybꞌej ebꞌ e bꞌeybꞌalan juntzan̈ tas te chuc scꞌulej ayic syacꞌanem sbꞌa ebꞌ dꞌa diosal. Tato tze cꞌulej tas scꞌulej ebꞌ chiꞌ, tzꞌoch e mul dꞌa Jehová co Diosal.
19 Tato nivan tiempo tzex och oyan dꞌa spatictac junoc chon̈abꞌ, man̈ e chꞌaquel te teꞌ sloji sat, yujto ol e lo sat teꞌ. A teꞌ avbꞌen teꞌ chiꞌ, man̈ animaoc teꞌ, max yal-laj scot teꞌ dꞌayex yacꞌ oval eyedꞌoc. 20 A pax teꞌ comon teꞌ max loji sat jun, tze chꞌaquel teꞌ yic tzꞌoch teꞌ e tecꞌnubꞌoc dꞌa spatictac jun chon̈abꞌ chiꞌ, masanto satel jun chon̈abꞌ chiꞌ eyuuj.