A junoc mach man̈ chequeloc mach smacꞌanchamoc
21
Tato tzꞌilchaj snivanil junoc anima dꞌa spatictaquel e chon̈abꞌ dꞌa lum luum ol yacꞌ Jehová co Diosal eyiquej chiꞌ, man̈ chequeloc mach ix macꞌanchamoc, 2 a ebꞌ vin̈ juez yedꞌ ebꞌ vin̈ yichamtac vinaquil juntzan̈ chon̈abꞌ ay dꞌa slacꞌanil jun chamnac chiꞌ, a ebꞌ tzꞌechtani mach junoc juntzan̈ chon̈abꞌ chiꞌ lacꞌan ay bꞌaj ix cham jun anima chiꞌ. 3 Slajvi chiꞌ, axo ebꞌ vin̈ yichamtac vinaquil chon̈abꞌ ay dꞌa slacꞌanil chiꞌ, a ebꞌ vin̈ tzꞌicꞌanbꞌat junoc nocꞌ cobꞌes vacax manta bꞌaj tzꞌoch teꞌ yugo dꞌay, 4 syicꞌanem nocꞌ ebꞌ vin̈ dꞌa schꞌolanil stiꞌ junoc aꞌ melem bꞌaj mantalaj mach smunlaji. Ataꞌ smacꞌji can̈chaj sjaj nocꞌ vacax chiꞌ.5 Axo ebꞌ sacerdote yin̈tilal Leví tzꞌoch testigoal dꞌay, yujto an̈ej ebꞌ sbꞌoan yaj oval yedꞌ tastac chucal tzuji dꞌa scal e chon̈abꞌ, aton ebꞌ sicꞌbꞌilel yuj Jehová co Diosal, ayoch ebꞌ yacꞌan servil yedꞌ yalan vachꞌ lolonel dꞌa Jehová chiꞌ. 6 Slajvi chiꞌ, masanil ebꞌ yichamtac vinaquil chon̈abꞌ chiꞌ sbꞌiquel scꞌabꞌ ebꞌ dꞌa yibꞌan̈ nocꞌ cobꞌes vacax chamnacxo chiꞌ, 7 syalan juntzan̈ lolonel ebꞌ icha tic: A on̈ tic, man̈oc on̈ ix co macꞌcham jun anima tic, man̈ cojtacoc mach ix macꞌanchamoc. 8 Mamin Jehová, acꞌ nivancꞌolal dꞌa quibꞌan̈, mocabꞌ acꞌcanoch schamel jun anima tic co muloc a on̈ a chon̈abꞌ on̈ colbꞌil on̈ tic uuj, xcham ebꞌ. Icha chiꞌ tzꞌaj sbꞌo yaj schamel jun chamnac chiꞌ. 9 Tato icha chiꞌ scꞌulej ebꞌ, man̈xalaj yalan yic ebꞌ dꞌa jun chamnac chiꞌ, yujto ix scꞌanabꞌajej ebꞌ tas syal Jehová.
Ley dꞌa yibꞌan̈ ebꞌ ix ix tzꞌicꞌjicot dꞌa scal oval
10 Ayic tzeyacꞌan oval yedꞌ ebꞌ ajcꞌool, tato tzeyacꞌ ganar ebꞌ yuj Jehová co Diosal, tzeyicꞌancot ebꞌ e checabꞌoc. 11 Tato ay mach dꞌa e cal tzꞌilanoch junoc ix ix te vachꞌ yilji dꞌa scal ebꞌ, scan sgana dꞌa ix, syicꞌanbꞌat ix dꞌa spat, 12 ataꞌ sjoxel xil sjolom ix, syicꞌanel yech ix, 13 sqꞌuexchajel spichul ix ayochi ayic ix icꞌjicot ix chiꞌ, scann̈ej ix dꞌa spat vin̈ vinac chiꞌ. Jun ujal tzꞌocꞌ ix yuj smam snun. Slajvi chiꞌ, syicꞌan ix vin̈ yetbꞌeyumoc. 14 Tato slajvi chiꞌ, man̈xa sgana vin̈ dꞌa ix, syal yacꞌanel ix vin̈ dꞌa libre. Palta max yal-laj schon̈jiel ix, ma yoch ix schecabꞌoc vin̈, yujto toxo ix ixtaj ix yuj vin̈.
Sleyal yic ebꞌ bꞌabꞌel uninabꞌil
15 Qꞌuinaloc ay junoc vin̈ vinac chavan̈ yetbꞌeyum, jun ix te xajan yuj vin̈, axo junxo ix chacbꞌilel yuj vin̈. Tato tzꞌalji yuneꞌ ebꞌ ix schavan̈il, tato a jun ix chacbꞌilel chiꞌ sbꞌabꞌlaj alji yuneꞌ, 16 ayic scꞌoch scꞌual spojanecꞌ stastac vin̈, syacꞌan vin̈ dꞌa ebꞌ yuninal, max yal-laj yoch yuneꞌ ix xajanabꞌil chiꞌ bꞌabꞌel uninal. Qꞌuinaloc icha bꞌabꞌel unin syutej vin̈, chuc scꞌulej vin̈ dꞌa vin̈ sbꞌabꞌel unin yic ix chacbꞌilel chiꞌ, yujto a vin̈ chiꞌ yel bꞌabꞌel unin yaj vin̈. 17 Yovalil a vin̈ chiꞌ bꞌabꞌel unin yaji. A vin̈ schaan cha macan̈ smacbꞌen yic sbꞌabꞌel uninabꞌil.
Yaelal tzꞌoch dꞌa yibꞌan̈ ebꞌ uninabꞌil te pit
18 Tato ay mach ay junoc yuninal te chuc, ma te pit, max scꞌanabꞌajej tas syal smam snun, vachꞌchom smacꞌji, palta an̈ejaꞌ max scꞌanabꞌajej. 19 Tato icha chiꞌ, a ebꞌ mamabꞌil nunabꞌil chiꞌ, yovalil syicꞌbꞌat jun yuneꞌ ebꞌ chiꞌ dꞌa yichan̈ ebꞌ vin̈ yichamtac vinaquil chon̈abꞌ, 20 syalan ebꞌ icha tic: A val jun cuneꞌ tic, te pit, te chuc. Max on̈ scꞌanabꞌajej, axon̈ej chucal scꞌulej, te bꞌucꞌtzin, an̈ej uqꞌuel an̈ syacꞌaꞌ, xcham ebꞌ. 21 Tato icha chiꞌ, axo masanil ebꞌ vin̈ vinac dꞌa jun chon̈abꞌ chiꞌ sjulqꞌuenancham jun yuneꞌ ebꞌ chiꞌ. Icha chiꞌ tzꞌaj yicꞌjiel jantac chucal ay dꞌa yol e chon̈abꞌ chiꞌ. Ayic syabꞌan jun chiꞌ ebꞌ quetchon̈abꞌ smasanil, sxivqꞌue ebꞌ.
Juntzan̈xo ley
22 Tato ay junoc vinac smacꞌjicham yuj schucal, sqꞌue locan dꞌa junoc te teꞌ, 23 a snivanil chiꞌ, max canlaj taꞌ tzꞌecꞌ acꞌval, yovalil smucchaj dꞌa jun cꞌu chiꞌ, yic vachꞌ max eyixtejbꞌat lum luum ol yacꞌ Jehová co Diosal chiꞌ dꞌayex, yujto aycot scatabꞌ Dios dꞌa yibꞌan̈ mach sqꞌue locan dꞌa junoc te teꞌ chiꞌ.