22
Tato ay junoc ex tzeyil satcan nocꞌ svacax, ma scalnel junoc ebꞌ eyetchon̈abꞌ, man̈ ton̈ejoc tzeyilcan nocꞌ, palta to tzeyicꞌcot nocꞌ dꞌa jun eyetchon̈abꞌ chiꞌ. 2 Tato man̈oc dꞌa e lacꞌanil cajan jun ay yic nocꞌ chiꞌ, mato man̈ eyojtacoc mach ay yic nocꞌ, tzeyicꞌcot nocꞌ, vachꞌocabꞌ tzꞌaj nocꞌ dꞌa e pat chiꞌ masanto sayjiecꞌ nocꞌ yuj vin̈ yajal nocꞌ chiꞌ, ichato chiꞌ tzeyacꞌan meltzaj nocꞌ dꞌa vin̈. 3 Icha pax chiꞌ tze cꞌulej yedꞌ junoc nocꞌ bꞌuru, ma junoc cꞌapac cꞌapac, ma junoc yaln̈ej tas satbꞌati. Tato ay junoc ex tzeyilaꞌ, mocabꞌ ton̈ejoc tzeyilcani.4 Tato ay junoc ex tzeyil stelvi nocꞌ sbꞌuru, ma nocꞌ svacax junoc eyetchon̈abꞌ dꞌa yoltac bꞌe, mocabꞌ ton̈ejoc tzeyiloch ebꞌ, palta to tzex och yedꞌ ebꞌ eyicꞌanqꞌue vaan nocꞌ.
5 A ebꞌ ix ix, max yal-laj scꞌanan tastac scꞌan ebꞌ vin̈ vinac ebꞌ ix, an̈ejaꞌ ebꞌ vin̈ vinac max yalpaxlaj yacꞌanoch spichul ebꞌ ix ix ebꞌ vin̈, yujto syajji mach icha chiꞌ scꞌulej yuj Jehová co Diosal.
6 Tato ay junoc mach ex tzeyil junoc soꞌ nocꞌ much dꞌa yol bꞌe dꞌa scꞌabꞌ junoc te teꞌ, mato sat luum ayemi, ayoch nocꞌ snun chiꞌ dꞌa yibꞌan̈ yuneꞌ, ma dꞌa yibꞌan̈ sn̈olobꞌ, man̈ eyicꞌbꞌat nocꞌ snun chiꞌ yedꞌ yuneꞌ chiꞌ. 7 Syal eyicꞌanbꞌat nocꞌ yuneꞌ chiꞌ, axo nocꞌ snun chiꞌ tzeyactejcanbꞌat nocꞌ yic vachꞌ ol ex elcꞌochoc, ol najatbꞌoc e qꞌuinal.
8 Tato ay junoc ex tze bꞌoqꞌue junoc e pat, pan̈an tzꞌaj yibꞌan̈, tzeyaqꞌuecꞌ oyan stitac dꞌa yibꞌan̈ chiꞌ yic vachꞌ malaj mach scot sutnajoc, schami, yic max cot dꞌa eyibꞌan̈.
9 Man̈ eyavej juntzan̈ocxo tas dꞌa scal bꞌaj avabꞌil eyuva, talaj tzꞌacꞌji yovalil dꞌayex, axo tzꞌaji malaj junoc macan̈ schaji e lo sat.
10 Ayic tzex munlaj yedꞌ arado, man̈ eyacꞌoch teꞌ yugo dꞌa junoc nocꞌ vacax yedꞌ dꞌa junoc nocꞌ bꞌuru yic junn̈ej smunlaj nocꞌ schavan̈il.
11 Man̈ eyacꞌoch pichul jalbꞌil dꞌa nocꞌ lana yedꞌ lino.
12 Tze bꞌooch chan̈eoc schional yelvanubꞌoc schiquintac e xotil.
Ley dꞌa yibꞌan̈ mul tzꞌochi
13 Tato ay junoc vinac tzꞌicꞌan junoc ix ix yetbꞌeyumoc, axo tzꞌaji maxtzac xajanej ix vin̈, 14 syalan vin̈ to ay smul ix, snaanqꞌue lolonel vin̈ dꞌa spatic ix, syalan vin̈: Ix vicꞌ jun ix ix tic, axo ix in vay yedꞌ ix, ix vilani to man̈xo cobꞌesoclaj ix, xchi vin̈. 15 Tato icha chiꞌ, axo smam snun ix cobꞌes chiꞌ tzꞌicꞌanbꞌat yechel yic scobꞌesal ix dꞌa yichan̈ sdespacho ebꞌ vin̈ yichamtac vinaquil chon̈abꞌ. 16 Syalan vin̈ smam ix chiꞌ icha tic dꞌa ebꞌ vin̈: Ix vacꞌ ix visil yetbꞌeyumoc jun vin̈ tic. Axo ticnaic man̈xa sgana vin̈ dꞌa ix, 17 tzijtum tas syal vin̈. Tobꞌ ay smul ix. Syalan vin̈ to man̈xo cobꞌesoc ix, palta ina val schꞌoxnabꞌil scobꞌesal ix tic, xchi vin̈ smam ix chiꞌ. Ayic van yalan vin̈ icha chiꞌ, schꞌoxan jun sábana vin̈ dꞌa yichan̈ ebꞌ vin̈ yichamtac vinaquil chon̈abꞌ chiꞌ. 18 Axo ebꞌ vin̈ syaman vin̈ vinac chiꞌ, smacꞌan vin̈ ebꞌ vin̈ dꞌa nocꞌ tzꞌuum. 19 Slajvi chiꞌ syacꞌan cien siclo qꞌuen plata vin̈ smultaoc, yujto syesejqꞌue vin̈ dꞌa spatic jun ix cobꞌes israel, syalan vin̈ to ayxo smul ix. A jun tumin chiꞌ tzꞌacꞌji dꞌa vin̈ smam ix cobꞌes chiꞌ. Man̈ yujoc chiꞌ maxtzac yicꞌ ix vin̈, palta yovalil syicꞌn̈ej ix vin̈ masanto chamel.
20 Palta tato yel a junoc ix ix chiꞌ man̈xo cobꞌesoc ix ayic ix nupnaj ix, malaj yechel dꞌa ix, 21 tzꞌicꞌjiel ix dꞌa stiꞌ spat smam, sjulqꞌuenajcham ix yuj masanil ebꞌ vin̈ vinac ay dꞌa jun chon̈abꞌ chiꞌ, yujto ix yacꞌoch jun nivan mul ix dꞌa e cal, syacꞌanpax qꞌuixvelal smam ix. Icha chiꞌ tzꞌaj satel juntzan̈ chucal chiꞌ dꞌa e cal.
22 Tato ay junoc vin̈ vinac smulan yedꞌ junoc ix ix ay yetbꞌeyum, tzꞌilchajelta ebꞌ, scham ebꞌ schavan̈il, icha chiꞌ tzꞌaj satel jun chucal chiꞌ dꞌa e cal.
23 Tato ay junoc ix cobꞌes ayxo strato snupnaji, axo tzꞌaji ay junocxo vinac tzꞌixtan ix dꞌa yol junoc chon̈abꞌ, 24 tzꞌicꞌjibꞌat ebꞌ schavan̈il dꞌa yichan̈ despacho dꞌa chon̈abꞌ chiꞌ. Ataꞌ sjulqꞌuenajcham ebꞌ schavan̈il. Scham ix yujto maj el yav ix yic ay mach scolani. Schampax vin̈ vinac chiꞌ yujto ix yixtej jun ix ayxo strato yoch yetbꞌeyumoc jun vin̈ yetvinaquil vin̈. Icha chiꞌ tzꞌaj satel jun chucal chiꞌ dꞌa e cal.
25 Tato ay junoc ix ix ayxo strato yoch yetbꞌeyum, schalan sbꞌa ix yedꞌ junoc vin̈ vinac bꞌaj malaj anima, tzꞌixtaj ix yuj vin̈, tato icha chiꞌ, an̈ej vin̈ vinac chiꞌ schami yujto ix acꞌji pural ix yuj vin̈. 26 Axo ix cobꞌes chiꞌ, malaj tas tzꞌalchaj dꞌa ix, yujto malaj smul ix, max yal-laj scham ix. A jun tas scꞌulej vin̈ vinac chiꞌ lajan icha junoc vin̈ smacꞌcham junoc yetanimail, 27 yujto schꞌocoj ix ayecꞌ bꞌaj malaj anima. Vachꞌchom tzꞌel yav ix, palta malaj mach scolan ix.
28 Tato ay junoc vin̈ vinac schalaj sbꞌa yedꞌ junoc ix cobꞌes mantalaj mach ay strato yedꞌoc, syacꞌan pural vin̈ yixtan ix, tzꞌilchajelta ebꞌ, 29 a vin̈ vinac chiꞌ yovalil syacꞌ 50 siclo qꞌuen plata vin̈ dꞌa vin̈ smam ix, yujto ix acꞌji pural ix yuj vin̈. Yovalil syicꞌxon̈ej ix vin̈ yetbꞌeyumoc, masanto chamel.
30 Malajocabꞌ junoc mach tzꞌem ajmulal yedꞌ ix yetbꞌeyum smam. Tato ay mach scꞌulan icha chiꞌ, malaj yelcꞌoch smam dꞌa yol sat syal chiꞌ.