2 An̈ejaꞌ junoc mitzꞌ unin, malaj pax yalan yic yoch dꞌa scal ebꞌ smolbꞌej sbꞌa yic syicꞌanchaan̈ Jehová. An̈ejtonaꞌ pax yin̈tilal dꞌa bꞌaqꞌuin̈ max yalpaxlaj yochi.^*

3 A ebꞌ amonita yedꞌ ebꞌ moabita, juneln̈ej malaj yalan yic ebꞌ yoch dꞌa scal bꞌaj molanecꞌ ebꞌ schon̈abꞌ Jehová, ma yin̈tilal ebꞌ dꞌa bꞌaqꞌuin̈. 4 Yujto ayic ix on̈ ecꞌta dꞌa yol smacbꞌen ebꞌ, ayic ix on̈ elta dꞌa Egipto, maj yacꞌlaj jabꞌoc aꞌ ebꞌ cuqꞌuej, maj yacꞌpaxlaj jabꞌoc co vael ebꞌ. A tas ix scꞌulej ebꞌ to ix stup vin̈aj Balaam yuninal vin̈aj Beor ebꞌ, ix cot vin̈ dꞌa Petor dꞌa yol yic Mesopotamia, yic tzul on̈ scatabꞌancan vin̈. 5 Axo Jehová co Diosal, maj schalaj yabꞌ tas ix yal vin̈aj Balaam chiꞌ, yuj chiꞌ a catabꞌ ijan ix yalcan vin̈ chiꞌ dꞌa quibꞌan̈, vachꞌ lolonel ix aj yalancan vin̈, yujto te xajan on̈ yuj Jehová co Diosal. 6 Yuj chiꞌ juneln̈ej malajocabꞌ bꞌaqꞌuin̈ tzex och dꞌa juncꞌolal yedꞌ ebꞌ. Man̈ e bꞌopax tas yuj svachꞌiloc ebꞌ.

7 Palta axo pax ebꞌ edomita, man̈ e patiquejcanel ebꞌ, yujto ayto cuj co bꞌa yedꞌ ebꞌ. Man̈ e patiquejpaxel ebꞌ aj Egipto, yujto ecꞌnac on̈ cajan jun tiempoal dꞌa yol smacbꞌen ebꞌ. 8 Ato ebꞌ yixchiquin ebꞌ ayxo yalan yic yoch dꞌa co cal bꞌaj sco molbꞌej co bꞌa yuj quicꞌanchaan̈ Jehová.

9 Ayic tzex bꞌat dꞌa oval yedꞌ ebꞌ eyajcꞌool, ayic ayex ecꞌ taꞌ, man̈ e cꞌulej tas chacbꞌilel yuj Jehová. 10 Tato ay junoc vin̈ vinac tzꞌel yin̈atil ayic vaynac, yovalil tzꞌelcan vin̈ dꞌa spatictac campamento tzꞌecꞌ cꞌu. 11 Axo dꞌa yemcꞌualil, vachꞌ syutej vin̈ sbꞌicanel sbꞌa, axo yic sqꞌuicꞌbꞌi, tzꞌochxican vin̈ dꞌa yol campamento chiꞌ. 12 Yovalil junn̈ej junoc bꞌaj dꞌa spatiquel campamento bꞌaj tzex tzaji. 13 Ayic tzex bꞌat tzajel, tzeyicꞌbꞌat junoc te teꞌ dꞌa yol e pa, pach yaj sn̈iꞌ teꞌ, tze joy junoc olan, tzex tzajiem dꞌa yool. Slajvi chiꞌ, tzeyacꞌancanqꞌue lum luum dꞌa yibꞌan̈. 14 Yujto a Jehová co Diosal ajun eyedꞌoc, yicn̈ej yaj jun campamento chiꞌ. A tzex tan̈vani, scolvajpax eyedꞌoc yic tzeyacꞌan ganar ebꞌ eyajcꞌol chiꞌ. Max yal-laj to ay tas chuclaj ay dꞌa e cal chiꞌ, talaj tzꞌel Jehová chiꞌ dꞌa e cal yuj jun chiꞌ.

15 Tato ay junoc checabꞌ tzꞌel elelal dꞌa spatrón, snibꞌej tzꞌaj eyedꞌoc, man̈ eyacꞌ meltzaj dꞌa spatrón chiꞌ.

16 Canocabꞌ eyedꞌoc. Libre sicꞌlan junoc chon̈abꞌ bꞌaj sgana tzꞌaji. Malajocabꞌ mach stzuntzani.

17 Malajocabꞌ junoc vin̈ vinac, ma junoc ix ix dꞌa co cal syacꞌoch sbꞌa ajmulal yic tzꞌoch ejmelal dꞌa juntzan̈ comon dios. 18 A qꞌuen tumin syacꞌ ganar junoc ix ix, ma junoc vin̈ vinac dꞌa spatic yajmulal, man̈ e cha yacꞌ qꞌuen ebꞌ bꞌaj syacꞌ stiꞌ yacꞌan dꞌa Jehová, yujto a jun bꞌeybꞌal chiꞌ te chacbꞌilel yuuj.^*

19 Ayic tzeyacꞌan qꞌuen tumin majanil dꞌa junoc quetchon̈abꞌ, man̈ e cꞌan yuneꞌ qꞌueen, ma yaln̈ej tastac, man̈ e cꞌan smajananubꞌal. 20 A dꞌa junoc chꞌoc chon̈abꞌil ayecꞌ dꞌa e cal syal e cꞌanan smajananubꞌal junoc tas tzeyacꞌ smajnej. Axo dꞌa junoc quetchon̈abꞌ, man̈ e cꞌanaꞌ, yic vachꞌ ol yacꞌ svachꞌcꞌolal Jehová dꞌa eyibꞌan̈ dꞌa sat lum luum ol eyiquej chiꞌ.

21 Ayic tzeyacꞌan e tiꞌ dꞌa Jehová co Diosal, elan̈chamel tze cꞌanabꞌajej, yujto ol scꞌanbꞌej Jehová chiꞌ dꞌayex. Tato max eyacꞌaꞌ tzꞌoch e mul. 22 Tato malaj bꞌaj tzeyacꞌ e tiꞌ dꞌa Jehová chiꞌ jun, malaj bꞌaj syal yoch e mul. 23 Tato ay bꞌaj tzeyacꞌ e tiꞌ eyacꞌan jun, yovalil tzeyaqꞌuelcꞌochi, icha val tas tzꞌel dꞌa e cꞌool.

24 Ayic tzex och dꞌa scal smunlajel junoc ebꞌ quetchon̈abꞌ, syal e loan sat yuva icha jantac snibꞌej e cꞌol e loani, palta max yal-laj eyicꞌanbꞌat jabꞌoc dꞌa yol e pa. 25 Tato tzex och dꞌa scal strigo junoc ebꞌ quetchon̈abꞌ, syal e cꞌutzanelta ixim sjolom e cꞌuxuꞌ, palta max yal-laj tze jochelta ixim yedꞌ qꞌuen jochlabꞌ trigo yic tzeyicꞌanbꞌati.