Números sbꞌi jun libro tic, yujto a dꞌay syalcot sbꞌisul ebꞌ israel ayic yicꞌjinaquelta ebꞌ yuj vin̈aj Moisés dꞌa Egipto. Ay pax junxo sbꞌisul ebꞌ qꞌuenac vaan ayic 38 abꞌilxo yeqꞌui ayic an̈ejaꞌ mantzac cꞌoch ebꞌ dꞌa lum Canaán. Toxo val sjavi ebꞌ dꞌa lum dꞌin̈an yacꞌji dꞌa ebꞌ, spitannac sbꞌa ebꞌ dꞌa Dios, yuj chiꞌ 38 abꞌil toxon̈ej ecꞌnac oyoyoc ebꞌ dꞌa tzꞌinan luum. Axo yic stzꞌacvi 40 abꞌil yelta ebꞌ dꞌa Egipto chiꞌ, syamanoch ebꞌ yoch dꞌa lum Canaán chiꞌ. A jun libro tic syalpaxcot tastac scꞌulejnac ebꞌ israel ayic yecꞌnac ebꞌ 40 abꞌil dꞌa lum tzꞌinan luum chiꞌ, ayic scotnac ebꞌ dꞌa yich lum vitz Sinaí, masanto javinac ebꞌ dꞌa smojonal lum luum yacꞌnac stiꞌ Dios yacꞌan dꞌa ebꞌ. Ayic scotnac ebꞌ dꞌa yich lum vitz Sinaí chiꞌ, sjavinac ebꞌ dꞌa lum Cades-barnea dꞌa lum Canaán chiꞌ. Nan̈al ebꞌ cajnajnaccan dꞌa scꞌaxepalecꞌ aꞌ Jordán, axo nan̈alxo ebꞌ yacꞌ lista sbꞌa yic tzꞌoch dꞌa lum luum chiꞌ.

A jun libro tic syalcot yabꞌixal jun chon̈abꞌil anima te ay schabꞌcꞌolal, ay xivcꞌolal dꞌa yaelal sjavi dꞌa yibꞌan̈. Jantac ebꞌ te chuc yutejnac sbꞌa dꞌa Dios, te chuclaj yalnac ebꞌ dꞌa vin̈aj Moisés, aton vin̈ sicꞌbꞌilel yuj Dios yic scuchbꞌan ebꞌ. Vachꞌchom te pit yutejnac sbꞌa ebꞌ, palta an̈ejaꞌ yacꞌnacn̈ej svachꞌcꞌolal Dios dꞌa ebꞌ, tan̈vajnac ebꞌ yuuj. Schꞌoxanpaxcan jun libro tic to te ay snivancꞌolal vin̈aj Moisés, yujto a dꞌa Dios smunlaj vin̈.