2 Icꞌchaan̈ sbꞌisul ebꞌ vinac dꞌa scal ebꞌ etchon̈abꞌ israel, ato syal junjun macan̈ yaj ebꞌ aton ebꞌ ayto yuj sbꞌa, yic vachꞌ tzꞌilji jantac ebꞌ yedꞌ tastac sbꞌi ebꞌ. 3 Sbꞌischaj ebꞌ 20 abꞌil sqꞌuinal, sbꞌeyn̈ejbꞌati, aton ebꞌ smoj val sbꞌat dꞌa oval, tzꞌacꞌchajoch ebꞌ dꞌa macquiltaquil. Colvajocabꞌ vin̈aj Aarón edꞌoc, 4 yedꞌ pax junjun yajalil junjun in̈tilal. 5-15 Aton sbꞌi juntzan̈ ebꞌ yajal yovalil scolvaj edꞌoc tic:

A dꞌa yin̈tilalcan vin̈aj Rubén, aton vin̈aj Elisur yuninal vin̈aj Sedeur. A dꞌa yin̈tilalcan vin̈aj Simeón, aton vin̈aj Selumiel yuninal vin̈aj Zurisadai. A dꞌa yin̈tilalcan vin̈aj Judá, aton vin̈aj Naasón yuninal vin̈aj Aminadab. A dꞌa yin̈tilalcan vin̈aj Isacar, aton vin̈aj Natanael yuninal vin̈aj Zuar. A dꞌa yin̈tilalcan vin̈aj Zabulón, aton vin̈aj Eliab yuninal vin̈aj Helón. A dꞌa ebꞌ yin̈tilalcan vin̈aj José, a dꞌa ebꞌ yic vin̈aj Efraín, aton vin̈aj Elisama yuninal vin̈aj Amiud, a dꞌa ebꞌ yic vin̈aj Manasés, aton vin̈aj Gamaliel yuninal vin̈aj Pedasur. A dꞌa yin̈tilalcan vin̈aj Benjamín, aton vin̈aj Abidán yuninal vin̈aj Gedeoni. A dꞌa yin̈tilalcan vin̈aj Dan, aton vin̈aj Ahiezer yuninal vin̈aj Amisadai. A dꞌa yin̈tilalcan vin̈aj Aser, aton vin̈aj Pagiel yuninal vin̈aj Ocrán. A dꞌa yin̈tilalcan vin̈aj Gad, aton vin̈aj Eliasaf yuninal vin̈aj Deuel. A dꞌa yin̈tilalcan vin̈aj Neftalí, aton vin̈aj Ahira yuninal vin̈aj Enán, xchi Dios.

16 Aton juntzan̈ ebꞌ yajal tic ix sicꞌchajel dꞌa scal masanil yin̈tilal Israel. 17-18 A dꞌa bꞌabꞌel cꞌual dꞌa schabꞌil ujal yic jun abꞌil chiꞌ, ix smolbꞌej juntzan̈ ebꞌ vin̈ tic vin̈aj Moisés yedꞌ vin̈aj Aarón, to satil tzꞌajcan ebꞌ vin̈ yuj Dios. An̈ejaꞌ ix molbꞌajpax masanil ebꞌ chon̈abꞌ. Icha chiꞌ ix aj yicꞌjichaan̈ sbꞌisul ebꞌ israel. Dꞌa stzolal ix aj stzꞌibꞌchaj sbꞌi ebꞌ, aton ebꞌ 20 abꞌil sqꞌuinal, sbꞌeyn̈ejbꞌati, ato aꞌ smacan̈il dꞌa junjun in̈tilal, 19 icha ix aj yalan Jehová dꞌa vin̈aj Moisés. A dꞌa tzꞌinan luum dꞌa Sinaí ix icꞌjichaan̈ sbꞌisul ebꞌ chiꞌ.

20-21 A dꞌa junjun in̈tilal, dꞌa junjun macquiltaquil, ix icꞌjichaan̈ sbꞌisul ebꞌ chiꞌ. Ix tzꞌibꞌchaj sbꞌi ebꞌ yedꞌ sbꞌisul ebꞌ vinac tzꞌacanxo yabꞌilal dꞌa 20 abꞌil, yuj chiꞌ aton val ix aj yelcꞌoch tic:

A dꞌa yin̈tilal vin̈aj Rubén, aton sbꞌabꞌel yuninal vin̈aj Israel, 46 mil 500 ebꞌ vinac smoj sbꞌat dꞌa oval.

22-23 A dꞌa yin̈tilal vin̈aj Simeón, ay 59 mil 300.

24-25 A dꞌa yin̈tilal vin̈aj Gad, ay 45 mil 650.

26-27 A dꞌa yin̈tilal vin̈aj Judá, ay 74 mil 600.

28-29 A dꞌa yin̈tilal vin̈aj Isacar, ay 54 mil 400.

30-31 A dꞌa yin̈tilal vin̈aj Zabulón, ay 57 mil 400.

32-35 Axo dꞌa yin̈tilalcan vin̈aj José: Ay 40 mil 500 dꞌa yin̈tilal vin̈aj Efraín, ay pax 32 mil 200 dꞌa yin̈tilal vin̈aj Manasés.

36-37 A dꞌa yin̈tilal vin̈aj Benjamín, ay 35 mil 400.

38-39 A dꞌa yin̈tilal vin̈aj Dan, ay 62 mil 700.

40-41 A dꞌa yin̈tilal vin̈aj Aser, ay 41 mil 500.

42-43 A dꞌa yin̈tilal vin̈aj Neftalí, ay 53 mil 400.

44 Aton ix aj yelcꞌoch juntzan̈ sbꞌisul ix yicꞌchaan̈ vin̈aj Moisés tic, vin̈aj Aarón yedꞌ lajchavan̈xo ebꞌ yajal yaj dꞌa scal ebꞌ israel dꞌa junjun in̈tilal. 45 Ix qꞌue vaan juntzan̈ sbꞌisul chiꞌ dꞌa junjun in̈tilal, dꞌa junjun macquiltaquil. A ebꞌ israel, 20 abꞌil sqꞌuinal sbꞌeyn̈ejbꞌati, aton ebꞌ chiꞌ smoj sbꞌat dꞌa oval. 46 A dꞌa smasanil ay 603 mil 550 ebꞌ.

47 A yin̈tilal vin̈aj Leví, maj acꞌjiochlaj ebꞌ sbꞌisuloc, 48 yujto a Jehová ix alan dꞌa vin̈aj Moisés: 49 Ayic ol icꞌanqꞌue vaan sbꞌisul chon̈abꞌ Israel tic, man̈ ol acꞌochlaj yin̈tilal vin̈aj Leví sbꞌisuloc. 50 Yujto a ex yin̈tilalexcan vin̈aj Leví chiꞌ, ol ex och yacꞌumaloc servil in cajnubꞌ bꞌaj ayecꞌ scaxail in trato yedꞌ masanil syamcꞌabꞌil. An̈ejaꞌ ex ol eyicꞌn̈ej bꞌey in cajnubꞌ chiꞌ yedꞌ masanil syamcꞌabꞌil. Yovalil ol ex ajn̈ej cajan dꞌa spatic yichan̈ in cajnubꞌ chiꞌ. 51 Ayic tzꞌicꞌjibꞌat dꞌa juntac el, a ex tze xuyemi, tze bꞌoanpaxqꞌue bꞌaj scꞌoch chiꞌ. Yaln̈ej mach junoc anima man̈ levitaoc sjavi dꞌa slacꞌanil jun in cajnubꞌ chiꞌ, tojoln̈ej schami. 52 Axo masanil juntzan̈xo yin̈tilal Israel ol cajnaj icha dꞌa stzolal, junjun ebꞌ ol aj dꞌa scampamento, dꞌa yalan̈ sbandera. 53 A exxo pax yin̈tilal ex can vin̈aj Leví chiꞌ jun, a dꞌa spatic yichan̈ in cajnubꞌ ol ex ajoc. A ex ol e tan̈vej, yic vachꞌ max cot voval dꞌa in chon̈abꞌ Israel, xchi Jehová.

54 Ix scꞌanabꞌajej ebꞌ israel scꞌulan icha val ix aj yalan Jehová dꞌa vin̈aj Moisés chiꞌ.