3 A dꞌa stojolal bꞌaj sjavi cꞌu, ataꞌ tzꞌaj scampamento oxeꞌ in̈tilal edꞌjinac sbandera yin̈tilal Judá. A ebꞌ soldado yic yin̈tilal Judá chiꞌ, a vin̈aj Naasón yuninal vin̈aj Aminadab ayoch yajaliloc ebꞌ. 4 Ato aꞌ yalan sbꞌisul, ay 74 mil 600 ebꞌ soldado. 5 Junn̈ej tzꞌaj scampamento yin̈tilal Isacar yedꞌ ebꞌ. A vin̈aj Natanael yuninal vin̈aj Zuar ayoch yajaliloc ebꞌ. 6 Ato aꞌ yalan sbꞌisul, ay 54 mil 400 ebꞌ soldado. 7 Ataꞌ tzꞌajpax scampamento yin̈tilal Zabulón. A vin̈aj Eliab, yuninal vin̈aj Helón ayoch yajaliloc ebꞌ. 8 Ato aꞌ yalan sbꞌisul, ay 57 mil 400 ebꞌ soldado. 9 Yuj chiꞌ a bꞌaj ay scampamento yin̈tilal Judá chiꞌ, ay 186 mil 400 ebꞌ soldado, aton ebꞌ bꞌabꞌel sbꞌat dꞌa yichan̈ ebꞌ chon̈abꞌ israel.

10 Axo dꞌa stojolal sur, ataꞌ tzꞌaj scampamento oxeꞌ in̈tilal edꞌjinac sbandera yin̈tilal Rubén. A ebꞌ soldado yic yin̈tilal Rubén chiꞌ, a vin̈aj Elisur yuninal vin̈aj Sedeur ayoch yajaliloc ebꞌ. 11 Ato aꞌ yalan sbꞌisul, ay 46 mil 500 ebꞌ soldado. 12 Junn̈ej tzꞌaj scampamento yin̈tilal Simeón yedꞌ ebꞌ. A vin̈aj Selumiel yuninal vin̈aj Zurisadai ayoch yajaliloc ebꞌ. 13 Ato aꞌ yalan sbꞌisul, ay 59 mil 300 ebꞌ soldado. 14 Ataꞌ tzꞌajpax scampamento yin̈tilal Gad yedꞌ ebꞌ. A vin̈aj Eliasaf yuninal vin̈aj Reuel ayoch yajaliloc ebꞌ. 15 Ato aꞌ yalan sbꞌisul, ay 45 mil 650 ebꞌ soldado. 16 Yuj chiꞌ a bꞌaj ay scampamento yin̈tilal Rubén chiꞌ, ay 151 mil 450 ebꞌ soldado, aton ebꞌ sbꞌey dꞌa yic schabꞌil macan̈.

17 Sbꞌatpax ebꞌ levita dꞌa scal chan̈eꞌ campamento. A ebꞌ edꞌjinac smantiadoal bꞌaj tzin chꞌox in bꞌa. A chan̈eꞌ campamento chiꞌ, dꞌa stzolal tzꞌaj sbꞌeyi icha tas yajecꞌ ebꞌ dꞌa scampamento, junjun ebꞌ dꞌa yalan̈tac sbandera.

18 Axo dꞌa stojolal bꞌaj sbꞌat cꞌu, ataꞌ tzꞌaj scampamento oxeꞌ in̈tilal edꞌjinac sbandera yin̈tilal Efraín. A ebꞌ soldado dꞌa yin̈tilal Efraín chiꞌ, a vin̈aj Elisama yuninal vin̈aj Amiud ayoch yajaliloc ebꞌ. 19 Ato aꞌ yalan sbꞌisul, ay 40 mil 500 ebꞌ soldado. 20 Junn̈ej tzꞌaj yin̈tilal Manasés yedꞌ ebꞌ. A vin̈aj Gamaliel yuninal vin̈aj Pedasur ayoch yajaliloc ebꞌ. 21 Ato aꞌ yalan sbꞌisul, ay 32 mil 200 ebꞌ soldado. 22 Ataꞌ tzꞌajpax scampamento yin̈tilal Benjamín. A vin̈aj Abidán yuninal vin̈aj Gedeoni ayoch yajaliloc ebꞌ. 23 Ato aꞌ yalan sbꞌisul, ay 35 mil 400 ebꞌ soldado. 24 Yuj chiꞌ a bꞌaj ay scampamento yin̈tilal Efraín chiꞌ, ay 108 mil 100 soldado, aton ebꞌ sbꞌey dꞌa yoxil macan̈.

25 Axo dꞌa stojolal norte, ataꞌ tzꞌaj scampamento oxexo in̈tilal edꞌjinac sbandera yin̈tilal Dan. A ebꞌ soldado dꞌa yin̈tilal Dan chiꞌ, a vin̈aj Ahiezer yuninal vin̈aj Amisadai ayoch yajaliloc ebꞌ. 26 Ato aꞌ yalan sbꞌisul, ay 62 mil 700 ebꞌ soldado. 27 Junn̈ej tzꞌaj scampamento yin̈tilal Aser yedꞌ ebꞌ. A vin̈aj Pagiel yuninal vin̈aj Ocrán ayoch yajaliloc ebꞌ. 28 Ato aꞌ yalan sbꞌisul, ay 41 mil 500 ebꞌ soldado. 29 Ataꞌ tzꞌajpax scampamento yin̈tilal Neftalí yedꞌ ebꞌ. A vin̈aj Ahira yuninal vin̈aj Enán ayoch yajaliloc ebꞌ. 30 Ato aꞌ yalan sbꞌisul, ay 53 mil 400 ebꞌ soldado. 31 Yuj chiꞌ a bꞌaj ay scampamento yin̈tilal Dan chiꞌ, ay 157 mil 600 ebꞌ soldado. Aton ebꞌ sbꞌeybꞌat dꞌa spatic sbandera yin̈tilal Dan chiꞌ, aton ebꞌ tzacꞌanto sbꞌati, xchi Jehová.

32 A sbꞌisul ebꞌ israel, ay 603 mil 550 ebꞌ soldado dꞌa smasanil. 33 Palta maj och ebꞌ yin̈tilalcan vin̈aj Leví sbꞌisuloc, icha val ix aj yalan Jehová dꞌa vin̈aj Moisés chiꞌ.

34 Ix scꞌulej ebꞌ israel icha val ix aj yalan Jehová. Junn̈ej ix aj ebꞌ dꞌa yalan̈tac sbandera, ix bꞌeybꞌat ebꞌ dꞌa stzolal, ato syal junjun macquiltaquil.