5 Ix lolonxi Jehová dꞌa vin̈aj Moisés chiꞌ, ix yalan icha tic:

6 Avtej masanil ebꞌ vin̈ vinac dꞌa yin̈tilal Leví, yic scolvaj ebꞌ yedꞌ vin̈aj sacerdote Aarón icha ol yal vin̈. 7-8 A ebꞌ chiꞌ ayoch yopisio dꞌa yichan̈ vin̈aj Aarón chiꞌ yedꞌ dꞌa yichan̈ chon̈abꞌ dꞌa mantiado bꞌaj tzin chꞌox in bꞌa. Stan̈vanpax masanil yamcꞌabꞌ yic mantiado chiꞌ ebꞌ. Icha chiꞌ tzꞌaj yacꞌji servil masanil chon̈abꞌ Israel yuj ebꞌ dꞌa masanil munlajel bꞌaj ay in cajnubꞌ. 9 Icꞌchajocabꞌel ebꞌ levita dꞌa scal ebꞌ eyetchon̈abꞌ smasanil yic vachꞌ syacꞌ servil vin̈aj Aarón ebꞌ yedꞌ dꞌa masanil yin̈tilal vin̈. 10 An̈ej dꞌa yibꞌan̈ vin̈ yedꞌ yin̈tilal tzꞌochcan yopisio yacꞌan sacerdoteal. Tato ay junoc mach man̈ yin̈tiloc vin̈ chiꞌ syecoch sbꞌa dꞌa jun opisio chiꞌ, yovalil schami, xchi dꞌa vin̈.

11 Ix yalanxi Jehová dꞌa vin̈aj Moisés chiꞌ icha tic:

12 Toxo ix ex in sicꞌcanel a ex levita ex tic sqꞌuexuloc junjun ebꞌ bꞌabꞌel vinac unin dꞌa scal ebꞌ etisraelal, yuj chiꞌ vic eyaji. 13 Ayic ix vacꞌancham masanil ebꞌ bꞌabꞌel vinac unin dꞌa Egipto, ix vacꞌcan sbꞌabꞌel vinac unin ebꞌ etisraelal yic tzꞌochcan vicoc, icha pax chiꞌ nocꞌ bꞌabꞌel yuneꞌ nocꞌ e molbꞌetzal nocꞌ vic yaji. A in Jehová in svalaꞌ, xchi dꞌa vin̈aj Moisés chiꞌ.

14 Ix lolon Jehová dꞌa vin̈aj Moisés chiꞌ dꞌa tzꞌinan luum Sinaí, ix yalani:

15 Icꞌqꞌue vaan sbꞌisul ebꞌ etlevitail, icha junjun macquiltaquil, masanil ebꞌ vinac dꞌa e cal. Tza chael yich dꞌa ebꞌ jun ujal sqꞌuinal sbꞌeyn̈ejbꞌati, xchi Jehová. 16 Yuj chiꞌ ix yicꞌchaan̈ sbꞌisul ebꞌ vin̈aj Moisés chiꞌ, icha ix aj yalan Jehová.

17 A ebꞌ yuninal vin̈aj Leví: Aton vin̈aj Gersón, vin̈aj Coat yedꞌ vin̈aj Merari.

18 Axo ebꞌ yuninal vin̈aj Gersón chiꞌ: Aton vin̈aj Libni yedꞌ vin̈aj Simei, aton ebꞌ vin̈ tic sbꞌinajn̈ej dꞌa yin̈tilal.

19 A ebꞌ yuninal vin̈aj Coat: Aton vin̈aj Amram, vin̈aj Izhar, vin̈aj Hebrón yedꞌ vin̈aj Uziel, aton ebꞌ vin̈ tic sbꞌinajn̈ej dꞌa yin̈tilal.

20 A ebꞌ yuninal vin̈aj Merari: Aton vin̈aj Mahli yedꞌ vin̈aj Musi, aton ebꞌ vin̈ tic sbꞌinajn̈ej dꞌa yin̈tilal. A ebꞌ vin̈ tic, yajal yaj ebꞌ vin̈ dꞌa junjun macan̈ yin̈tilalcan vin̈aj Leví.

21 A ebꞌ yin̈tilalcan vin̈aj Gersón, cha macan̈ yaj ebꞌ, aton ebꞌ yin̈tilalcan vin̈aj Libni yedꞌ ebꞌ yin̈tilalcan vin̈aj Simei. 22 A sbꞌisul ebꞌ vinac dꞌa smasanil, ix chajiel yich dꞌa ebꞌ jun ujal sqꞌuinal sbꞌeyn̈ejbꞌati, ay 7 mil 500. 23 Masanil ebꞌ tic, a dꞌa stojolal bꞌaj tzꞌem cꞌu, dꞌa spatic scajnubꞌ Jehová tzꞌaj scampamento ebꞌ. 24 A pax mach yajal yaj dꞌa yin̈tilalcan vin̈aj Gersón, aton vin̈aj Eliasaf yuninal vin̈aj Lael. 25 Aton ebꞌ tzꞌilan juntzan̈ smacul yibꞌan̈ scajnubꞌ Jehová bꞌaj schꞌox sbꞌa yedꞌ cꞌapac cortina ayoch dꞌa stiꞌ scajnubꞌ chiꞌ, 26 cꞌapac scortinail amacꞌ oyanoch dꞌa spatic scajnubꞌ Jehová yedꞌ bꞌaj ay altar, cꞌapac cortina ayoch dꞌa stiꞌ amacꞌ chiꞌ yedꞌ schꞌan̈al ayoch dꞌa spatic syamcꞌabꞌil.

27 A ebꞌ yin̈tilalcan vin̈aj Coat, chan̈ macan̈ yaj ebꞌ: Aton ebꞌ yin̈tilalcan vin̈aj Amram, ebꞌ yin̈tilalcan vin̈aj Izhar, ebꞌ yin̈tilalcan vin̈aj Hebrón yedꞌ ebꞌ yin̈tilalcan vin̈aj Uziel. 28 A sbꞌisul masanil ebꞌ vinac ix schael yich dꞌa ebꞌ jun ujal sqꞌuinal sbꞌeyn̈ejbꞌati, ay 8 mil 600 ebꞌ, aton ebꞌ tzꞌilan scajnubꞌ Jehová. 29 Masanil ebꞌ tic, a dꞌa stzꞌeyel scajnubꞌ Jehová dꞌa stojolal sur tzꞌaj scampamento ebꞌ. 30 A yajalil juntzan̈ ebꞌ, aton vin̈aj Elizafán yuninal vin̈aj Uziel. 31 Aton ebꞌ tic tzꞌilan teꞌ scaxail trato, teꞌ mexa, sbꞌachnubꞌ candil, chabꞌ altar yedꞌ masanil jantac syamcꞌabꞌil scꞌanchaj dꞌa yol scajnubꞌ Jehová yedꞌ pax cꞌapac cortina ayoch dꞌa yool.

32 A jun sat yajal yajoch dꞌa scal ebꞌ levita chiꞌ, aton vin̈aj Eleazar yuninal vin̈aj sacerdote Aarón, a vin̈ tzꞌilan masanil ebꞌ smunlaj dꞌa scajnubꞌ Jehová.

33 A ebꞌ yin̈tilalcan vin̈aj Merari, cha macan̈ yaj ebꞌ, aton ebꞌ yin̈tilalcan vin̈aj Mahli yedꞌ ebꞌ yin̈tilalcan vin̈aj Musi. 34 A sbꞌisul masanil ebꞌ vinac, tzꞌel yich dꞌa ebꞌ jun ujal sqꞌuinal sbꞌeyn̈ejbꞌati, ay 6 mil 200 ebꞌ. 35 A yajalil ebꞌ, aton vin̈aj Zuriel yuninal vin̈aj Abihail. Tzꞌaj scampamento ebꞌ dꞌa stzꞌeyel scajnubꞌ Jehová dꞌa stojolal norte. 36 Aton ebꞌ tic tzꞌilan teꞌ smarcoal, sreglail, yoyal, sbꞌachnubꞌal, masanil syamcꞌabꞌil, 37 yedꞌ pax yoyal oyanoch dꞌa spatictac amacꞌ, sbꞌachnubꞌal, yestacail yedꞌ masanil schꞌan̈al.

38 Axo pax dꞌa stojolal bꞌaj sjavi cꞌu dꞌa yichan̈bꞌat scajnubꞌ Jehová tzꞌaj scampamento vin̈aj Moisés yedꞌ vin̈aj Aarón yedꞌ ebꞌ yuninal vin̈aj Aarón chiꞌ, aton ebꞌ tzꞌacꞌvi servil dꞌa yol scajnubꞌ Jehová chiꞌ yuj svachꞌiloc ebꞌ israel. Tato ay junoc mach scꞌoch dꞌa slacꞌanil cajnubꞌ chiꞌ to man̈ yopisiooc yaji, tojoln̈ej schami.

39 Ayic ix yicꞌanchaan̈ sbꞌisul ebꞌ levita vin̈aj Moisés yedꞌ vin̈aj Aarón dꞌa stzolal icha ix aj yalan Jehová, a sbꞌisul ebꞌ vinac dꞌa smasanil, ay 22 mil, tzꞌel yich dꞌa ebꞌ jun ujal sqꞌuinal sbꞌeyn̈ejbꞌati.

40 Ix yalanxi Jehová dꞌa vin̈aj Moisés chiꞌ icha tic:

Icꞌchaan̈ sbꞌisul yedꞌ sbꞌi ebꞌ bꞌabꞌel vinac unin dꞌa scal ebꞌ etchon̈abꞌ, tzꞌel yich dꞌa ebꞌ jun ujal sqꞌuinal sbꞌeyn̈ejbꞌati. 41 A ebꞌ levita tic, vic yaj ebꞌ sqꞌuexuloc ebꞌ bꞌabꞌel unin chiꞌ. An̈ejaꞌ vicpax tzꞌajcan masanil nocꞌ smolbꞌetzal nocꞌ ebꞌ sqꞌuexuloc nocꞌ sbꞌabꞌel yuneꞌ nocꞌ smolbꞌetzal nocꞌ ebꞌ israel tic. A in ton Jehová in svalaꞌ, xchi dꞌa vin̈.

42 Yuj chiꞌ ix icꞌjichaan̈ sbꞌisul masanil ebꞌ bꞌabꞌel vinac unin dꞌa scal chon̈abꞌ Israel yuj vin̈aj Moisés chiꞌ, icha ix aj yalan Jehová. 43 Masanil ebꞌ vinac unin jun ujal sqꞌuinal sbꞌeyn̈ejbꞌati, ay 22 mil 273 ebꞌ.

44 Ix yalanxi Jehová dꞌa vin̈aj Moisés chiꞌ icha tic:

45 Acꞌcanoch ebꞌ levita tic sqꞌuexuloc ebꞌ bꞌabꞌel vinac unin dꞌa scal chon̈abꞌ Israel. An̈ejaꞌ pax nocꞌ smolbꞌetzal nocꞌ ebꞌ tzꞌochcan sqꞌuexuloc nocꞌ smolbꞌetzal nocꞌ ebꞌ yetisraelal, yujto vic yaj ebꞌ levita tic. A in ton Jehová in svalaꞌ. 46-47 Palta ecꞌal sbꞌisul ebꞌ bꞌabꞌel unin dꞌa chon̈abꞌ Israel dꞌa yichan̈ ebꞌ levita chiꞌ, yuj chiꞌ a dꞌa junjun ebꞌ 273 bꞌabꞌel unin syacꞌ sobre chiꞌ, tza cꞌan oyeoc siclo qꞌuen plata, icha jantac yalil qꞌuen scꞌanchaj dꞌa in cajnubꞌ, aton 20 geras yalil. 48 Tzacꞌan juntzan̈ qꞌuen tumin chiꞌ dꞌa vin̈aj Aarón yedꞌ dꞌa ebꞌ yuninal, aton tzꞌoch sqꞌuexuloc ebꞌ bꞌabꞌel unin syacꞌ sobre chiꞌ, xchi Jehová.

49 Icha chiꞌ ix aj smolanqꞌue qꞌuen tumin vin̈aj Moisés ix och sqꞌuexuloc ebꞌ bꞌabꞌel unin dꞌa scal chon̈abꞌ Israel syacꞌ sobre chiꞌ. 50 Ix molchaj mil 365 siclo qꞌuen plata, icha jantac yalil qꞌuen scꞌanchaj dꞌa scajnubꞌ Jehová. 51 Ix lajvi chiꞌ, ix yacꞌan qꞌuen vin̈aj Moisés dꞌa vin̈aj Aarón yedꞌ dꞌa ebꞌ yuninal, icha ix aj yalan Jehová.