2 Icꞌqꞌue vaan sbꞌisul ebꞌ yin̈tilalcan vin̈aj Coat dꞌa stzolal dꞌa scal ebꞌ levita, 3 aton ebꞌ 30 abꞌil sqꞌuinal scꞌoch dꞌa 50. Aton ebꞌ tic smoj val smunlaj dꞌa in cajnubꞌ bꞌaj tzin chꞌox in bꞌa.

4 A smunlajel ebꞌ yin̈tilalcan vin̈aj Coat chiꞌ, to a juntzan̈ tastac vicn̈ej yaji, a stan̈vej ebꞌ, aton juntzan̈ tic: 5 Ayic sbꞌatxi ebꞌ chon̈abꞌ, a ach ach Aarón yedꞌ ebꞌ uninal, tzeyiqꞌuel cꞌapac cortina ayoch smaculoc jun Lugar Vicn̈ej Yaji, tze musan teꞌ scaxail in trato dꞌa cꞌapac. 6 Axo dꞌa yibꞌan̈ tzeyacꞌbꞌat jun tzꞌuum te labꞌabꞌi smusiloc. Axo dꞌa yibꞌan̈ jun chiꞌ tzeyacꞌbꞌat jun cꞌapac qꞌuicꞌmutzꞌinac, tzeyacꞌanoch teꞌ bꞌachlabꞌ yic tzꞌicꞌjibꞌati. 7 Tzeyacꞌanpaxbꞌat jun cꞌapac qꞌuicꞌmutzꞌinac cꞌapac dꞌa sat mexa ay dꞌa vichan̈, axo dꞌa yibꞌan̈ jun chiꞌ tzeyaqꞌuem qꞌuen plato, juntzan̈ qꞌuen nivac cuchara, ucꞌabꞌ yedꞌ juntzan̈ xalual vino tzꞌacꞌji dꞌa ofrendail yedꞌ ixim pan tzꞌacꞌjitaxoni. 8 A dꞌa yibꞌan̈ masanil juntzan̈ chiꞌ tzeyacꞌbꞌat jun chacchac cꞌapac, tze musan dꞌa jun tzꞌuum te labꞌabꞌi chiꞌ, tzeyacꞌanpaxoch teꞌ bꞌachlabꞌ yic tzꞌicꞌjibꞌati. 9 Tzeyicꞌanpaxcot junxo qꞌuicꞌmutzꞌinac cꞌapac, tze musan jun sbꞌachnubꞌ candil yedꞌ juntzan̈ candil chiꞌ, qꞌuen qꞌueen tzꞌicꞌanel staan̈il cꞌapac cꞌapac bꞌaj tzꞌoch scꞌacꞌal candil yedꞌ platillo yedꞌ masanil yedꞌtal scꞌanchaj yedꞌ aceite. 10 Masanil juntzan̈ chiꞌ tze musej dꞌa jun nocꞌ tzꞌuum te labꞌabꞌi, tzeyacꞌanqꞌue dꞌa yibꞌan̈ te bꞌachlabꞌ.

11 Tzeyacꞌanpaxbꞌat junxo qꞌuicꞌmutzꞌinac cꞌapac dꞌa yibꞌan̈ altar nabꞌa oro. Tze pichan dꞌa juntzan̈ nocꞌ tzꞌuum labꞌabꞌi, tzeyacꞌanpaxoch steꞌal yic sbꞌachchaji. 12 Tze molanpax qꞌue vaan masanil yamcꞌabꞌ scꞌanchaj dꞌa yol in cajnubꞌ, tze pichanoch dꞌa yol jun qꞌuicꞌmutzꞌinac cꞌapac, tzeyacꞌanoch juntzan̈xo nocꞌ tzꞌuum labꞌabꞌi dꞌay, tzeyacꞌanqꞌue dꞌa yibꞌan̈ te bꞌachlabꞌ. 13 Yovalil tzeyiqꞌuel jantac qꞌuen taan̈ calan yedꞌ xepuꞌ stzꞌa dꞌa altar, slajvi chiꞌ tze musan altar chiꞌ dꞌa jun cꞌapac cꞌapac yaxmaquinac. 14 Axo dꞌa yibꞌan̈ tzꞌacꞌjibꞌat masanil tastac scꞌanchaj dꞌa altar chiꞌ: Aton yedꞌtal tzacꞌacꞌ yedꞌ juntzan̈ qꞌuen tenedor, qꞌuen pala, qꞌuen nivac ucꞌabꞌ yedꞌ juntzan̈xo yaln̈ej tas yamcꞌabꞌil. A dꞌa yibꞌan̈ masanil juntzan̈ chiꞌ tzꞌacꞌjibꞌat nocꞌ tzꞌuum te labꞌabꞌi, tzeyacꞌanpaxoch te teꞌ yic sbꞌachchaji. 15 Ayic slajvi e pichan masanil juntzan̈ tastac nivan yelcꞌoch chiꞌ, vachꞌxo yaji yic tzꞌicꞌjibꞌati, scot ebꞌ yin̈tilalcan vin̈aj Coat yic syicꞌanbꞌat ebꞌ. Masanil juntzan̈ tastac to vic yaj chiꞌ, max yal-laj syaman ebꞌ yic max cham ebꞌ yuuj. Masanil jantac syamcꞌabꞌil yic in cajnubꞌ bꞌaj tzin chꞌox in bꞌa, a ebꞌ yin̈tilalcan vin̈aj Coat yovalil tzꞌicꞌanbꞌati. 16 A vin̈aj Eleazar, vin̈ uninal a ach sacerdote Aarón, a vin̈ tzꞌilan tas yaj aceite yic candil, incienso vachꞌ sjabꞌ, ofrenda yic ixim trigo to yovalil tzꞌacꞌji dꞌayin yedꞌ aceite scꞌanchaji a sicꞌchajel junoc mach, ma junoc tas tzꞌochcan vicoc. A vin̈ stan̈van in cajnubꞌ yedꞌ masanil syamcꞌabꞌil, xchi Jehová.

17 Ix yalanxi Jehová dꞌa vin̈aj Moisés yedꞌ dꞌa vin̈aj Aarón chiꞌ icha tic:

18 Mocabꞌ satel ebꞌ yin̈tilalcan vin̈aj Coat dꞌa scal ebꞌ eyetlevitail. 19 Yic max javi chamel dꞌa yibꞌan̈ ebꞌ, yuj syaman ebꞌ tastac to vicn̈ej yaji, yovalil tze bꞌeybꞌalej juntzan̈ tic: Ach Aarón yedꞌ ebꞌ uninal, yovalil tzex och yedꞌ ebꞌ dꞌa yol in cajnubꞌ. A ex tzeyal dꞌa ebꞌ tastac syicꞌbꞌat junjun ebꞌ. 20 Yuj chiꞌ, max och ebꞌ junoc rato yil tastac to vic yaji, yic max cham ebꞌ yuuj, xchi Jehová.

21 Ix yalanxi Jehová dꞌa vin̈aj Moisés chiꞌ icha tic:

22 Icꞌchaan̈ sbꞌisul ebꞌ yin̈tilalcan vin̈aj Gersón dꞌa stzolal, 23 aton ebꞌ 30 abꞌil sqꞌuinal scꞌoch dꞌa 50, aton ebꞌ smoj val smunlaj dꞌa in cajnubꞌ bꞌaj tzin chꞌox in bꞌa.

24 Aton smunlajel ebꞌ yin̈tilalcan vin̈aj Gersón tic dꞌa mantiado chiꞌ: 25 A ebꞌ yovalil tzꞌicꞌanbꞌat cꞌapac smacul yibꞌan̈ in cajnubꞌ yedꞌ chabꞌxo jen̈an smacul yibꞌan̈, nocꞌ tzꞌum labꞌabꞌi ayoch smaculoc yibꞌan̈, cꞌapac cortina ayoch dꞌa smaculoc stiꞌ, 26 cꞌapac cortina ayoch dꞌa spatictac yamaqꞌuil in cajnubꞌ bꞌaj ay altar, cꞌapac cortina ayoch bꞌaj ay stiꞌ yamaqꞌuil chiꞌ yedꞌ syamcꞌabꞌil yedꞌ jantac schꞌan̈al ayochi yic tzꞌoch dꞌa yopisio. A ebꞌ ayoch dꞌa yibꞌan̈ yilan juntzan̈ ix bꞌinaj tic. 27 A vin̈aj Aarón yedꞌ ebꞌ yuninal, a ebꞌ scuchbꞌan masanil ebꞌ yin̈tilalcan vin̈aj Gersón chiꞌ dꞌa munlajel scꞌulej yedꞌ yicꞌanbꞌat tastac ebꞌ to tzꞌicꞌjibꞌati. A ebꞌ tic schꞌoxan tastac syicꞌbꞌat junjun ebꞌ. 28 Aton val yopisio ebꞌ yin̈tilalcan vin̈aj Gersón tic ayic smunlaj ebꞌ dꞌa in cajnubꞌ bꞌaj tzin chꞌox in bꞌa. Scꞌanabꞌajejocabꞌ masanil tas syal vin̈aj Itamar ebꞌ, aton vin̈ yuninal vin̈aj sacerdote Aarón.

29 Icꞌchaan̈ sbꞌisul ebꞌ yin̈tilalcan vin̈aj Merari dꞌa stzolal, 30 aton ebꞌ 30 abꞌil sqꞌuinal scꞌoch dꞌa 50, aton ebꞌ smoj val smunlaj dꞌa in cajnubꞌ bꞌaj tzin chꞌox in bꞌa. 31 A smunlajel ebꞌ, aton yicꞌanbꞌat masanil steꞌal mantiado chiꞌ ebꞌ, aton smarcoal, sreglail, yoyal yedꞌ sbꞌachnubꞌal, 32 masanil yoyal oyanoch dꞌa spatictac yamaqꞌuil in cajnubꞌ, sbꞌachnubꞌal yich, yestacail, schꞌan̈al yedꞌ masanil syamcꞌabꞌil scꞌanchaji. A ex tzeyalaꞌ tastac yovalil syicꞌbꞌat junjun ebꞌ. 33 A jun munlajel tic scan dꞌa yol scꞌabꞌ ebꞌ yin̈tilalcan vin̈aj Merari. A vin̈aj Itamar yuninal vin̈aj sacerdote Aarón, a vin̈ tzꞌalani tas scꞌulej ebꞌ, xchi Jehová.

34-48 A vin̈aj Moisés, vin̈aj Aarón yedꞌ ebꞌ yajalil chon̈abꞌ, a ebꞌ ix icꞌanchaan̈ sbꞌisul ebꞌ levita smoj val smunlaj dꞌa scajnubꞌ Jehová bꞌaj schꞌox sbꞌa, aton ebꞌ 30 abꞌil sqꞌuinal scꞌoch dꞌa 50. Aton ebꞌ tic: Ebꞌ yin̈tilalcan vin̈aj Coat, vin̈aj Gersón yedꞌ vin̈aj Merari. Dꞌa stzolal ix icꞌjichaan̈ sbꞌisul ebꞌ icha ix aj yalan Jehová dꞌa vin̈aj Moisés chiꞌ.

A ebꞌ yin̈tilalcan vin̈aj Coat, icha stzolal, ay 2 mil 750 ebꞌ dꞌa smasanil.

A ebꞌ yin̈tilalcan vin̈aj Gersón, icha stzolal, ay 2 mil 630 ebꞌ dꞌa smasanil.

A ebꞌ yin̈tilalcan vin̈aj Merari, icha stzolal, ay 3 mil 200 ebꞌ dꞌa smasanil.

Axo sbꞌisul ebꞌ levita chiꞌ ix yicꞌchan̈ vin̈aj Moisés, vin̈aj Aarón yedꞌ ebꞌ yajal yaji, icha syal stzolal, aton ebꞌ 30 abꞌil sqꞌuinal scꞌoch dꞌa 50 to smoj val smunlaj dꞌa scajnubꞌ Jehová bꞌaj schꞌox sbꞌa, ay 8 mil 580 ebꞌ dꞌa smasanil.

49 A jun sbꞌisul tic, ix icꞌchajqꞌue vaan, ix alchaj dꞌa junjun ebꞌ tastac scꞌulej yedꞌ tastac syicꞌbꞌati, icha ix aj yalan Jehová dꞌa vin̈aj Moisés.