2 Al dꞌa masanil ebꞌ etisraelal to a ebꞌ anima penaay yuj lepra, ebꞌ tzꞌel yin̈atil yuj junoc ilya ayoch dꞌay, ma ebꞌ syaman junoc chamnac, yovalil tzꞌicꞌjiel ebꞌ dꞌa spatiquel campamento. 3 Masanil juntzan̈ anima chiꞌ, tzꞌicꞌjiel ebꞌ, ebꞌ vin̈ vinac ma ebꞌ ix ix, yic malaj tas man̈ vachꞌoc dꞌa yol campamento bꞌaj ayinecꞌ eyedꞌoc, xchi dꞌa vin̈. 4 Ix scꞌanabꞌajej ebꞌ israel yicꞌanelta juntzan̈ ebꞌ anima chiꞌ, icha ix aj yalan Jehová dꞌa vin̈aj Moisés chiꞌ.

5 Ix yalanxi Jehová dꞌa vin̈aj Moisés chiꞌ icha tic:

6 Al juntzan̈ tic dꞌa ebꞌ etchon̈abꞌ: Tato ay junoc vinac, ma junoc ix ix max in cꞌanabꞌajani, syixtan yetanimail, van yoch smul. 7 Yovalil syojtaquejel spaltail chiꞌ. An̈ejtonaꞌ, yovalil syacꞌxi sqꞌuexul tastac ix yixtejbꞌat chiꞌ, syacꞌan jabꞌocxo dꞌa yibꞌan̈ stojol juntzan̈ chiꞌ. 8 Tato toxo ix cham jun mach ix ixtajbꞌat tastac ay dꞌay chiꞌ, man̈xa pax junoc ayto yuj sbꞌa smoj schaan sqꞌuexul junoc tas chiꞌ, a jun chiꞌ, tzꞌochcan vicoc, axo dꞌa yol scꞌabꞌ ebꞌ sacerdote scani. An̈ejtonaꞌ syacꞌanpax junoc nocꞌ chꞌac calnel silabꞌil yic tzꞌacꞌji tup smul ix och chiꞌ.

9 Masanil ofrenda syacꞌ ebꞌ etisraelal dꞌayin, tzꞌicꞌjibꞌat dꞌa ebꞌ sacerdote. A juntzan̈ chiꞌ, yic ebꞌ sacerdote chiꞌ yaji. 10 Masanil tastac syacꞌ junoc etisraelal dꞌayin, tato tzꞌacꞌji dꞌa junoc vin̈ sacerdote, yic vin̈ tzꞌajcani, xchi dꞌa vin̈.

11 Ix yalanxi Jehová dꞌa vin̈aj Moisés 12 to syal juntzan̈ tic vin̈ dꞌa ebꞌ yetisraelal: Talaj ay junoc vinac sna dꞌa spatic ix yetbꞌeyum to ay smul ix say dꞌa yol scꞌabꞌ, 13-14 to smulan ix yedꞌ junoc vinac, palta max nachajel-laj yuj vin̈ tato toxo ix mulan ix, yujto max yal ix, malaj pax junoc mach ix ilan smulan ix. Mato ay pax junoc vinac ton̈ej snaanqꞌue icha chiꞌ dꞌa spatic ix yetbꞌeyum chiꞌ, vachꞌchom malaj smul ix syacꞌoch dꞌa yol scꞌabꞌ vin̈. 15 A dꞌa cha macan̈ lolonel icha chiꞌ, a vin̈ vinac chiꞌ, syal yicꞌanbꞌat ix yetbꞌeyum vin̈ dꞌa yichan̈ junoc vin̈ sacerdote. Syacꞌan chan̈eoc libra ixim harina cebada vin̈ ofrendail yuj ix, palta max secjiemlaj aceite dꞌa yibꞌan̈ ixim, max acꞌjipaxlaj incienso yedꞌ ixim, yujto a jun ofrenda chiꞌ, ofrenda yic cꞌacꞌalcꞌolal, yopisio yic scheclajelta mul.

16 Axo vin̈ sacerdote chiꞌ tzꞌalani to snitzcot sbꞌa ix ix chiꞌ, tzꞌicꞌjioch ix dꞌa vichan̈ a in Jehová in tic. 17 Elan̈chamel syicꞌcot jabꞌoc a aꞌ vin̈ sacerdote chiꞌ dꞌa yol junoc lum ucꞌabꞌ, aton a aꞌ vicn̈ej yaji. Syicꞌanpaxqꞌue jabꞌoc pococ vin̈, aton lum ay dꞌa in cajnubꞌ, syacꞌanbꞌat vin̈ dꞌa scal a aꞌ chiꞌ. 18 Tzꞌoch lin̈an ix ix chiꞌ yuj vin̈ sacerdote chiꞌ dꞌa vichan̈ a in Jehová in tic, syicꞌanel scꞌox ix, tzꞌacꞌjipaxoch jun ofrenda yuj cꞌacꞌalcꞌolal chiꞌ dꞌa yol scꞌabꞌ ix. Axo vin̈ sacerdote chiꞌ edꞌjinacqꞌue a aꞌ cꞌaꞌ tzꞌicꞌancot yaelal, 19 schecan vin̈ yacꞌ stiꞌ ix. Syalan vin̈ dꞌa ix icha tic: Tato yel maj ach mulan yedꞌ junocxo vinac dꞌa yol scꞌabꞌ vin̈ etbꞌeyum tic, malaj tas ol ach icꞌanoc a ol ucꞌanem jun a aꞌ cꞌaꞌ edꞌjinac yaelal tic. 20 Palta tato ix ach mulan yedꞌ junocxo vin̈ vinac jun, ix och a mul dꞌa yol scꞌabꞌ vin̈ etbꞌeyum, 21 a Jehová ol ach acꞌancanoch chꞌoxnabꞌiloc dꞌa yichan̈ ebꞌ etchon̈abꞌ. Ol ach bꞌinaj yuj ebꞌ dꞌa chucal, ol malqꞌue a cꞌool, ol tacjoc yibꞌ a xubꞌ. 22 Aton val jun yaelal chiꞌ ol javoc dꞌa ibꞌan̈ a ol ucꞌanem jun a aꞌ tic, yujto a aꞌ edꞌjinac yaelal, xcham vin̈ sacerdote chiꞌ dꞌa ix. Axo stacꞌvi ix ix chiꞌ: Ujocabꞌ icha chiꞌ, xcham ix.

23 A juntzan̈ catabꞌ chiꞌ, tzꞌibꞌchajocabꞌcan yuj vin̈ sacerdote. Slajvi chiꞌ sbꞌicanel vin̈ yedꞌ a aꞌ cꞌaꞌ tzꞌem dꞌa yol ucꞌabꞌ chiꞌ. 24 Slajvi chiꞌ syucꞌanem aꞌ ix ix chiꞌ, axo yic slajvi yucꞌan aꞌ ix, scotcan yaelal dꞌa yibꞌan̈ ix. 25 Schaanecꞌ ixim harina cebada ofrenda yuj cꞌacꞌalcꞌolal vin̈ sacerdote chiꞌ dꞌa yol scꞌabꞌ ix. A jun ofrenda chiꞌ sbꞌachoch vin̈ sacerdote chiꞌ dꞌa vichan̈ a in Jehová in tic. 26 Syicꞌanqꞌue jun votzoc jun ofrenda vin̈ sacerdote chiꞌ, sn̈usantzꞌa vin̈ dꞌa yibꞌan̈ altar yuj schꞌoxancot masanil jun ofrenda chiꞌ. Ayic toxo ix yuqꞌuej a aꞌ cꞌaꞌ chiꞌ ix, 27 tato ay smul ix dꞌa yol scꞌabꞌ vin̈ yetbꞌeyum chiꞌ, scot yaelal dꞌa yibꞌan̈ ix yuj a aꞌ syuqꞌuem chiꞌ. Smalqꞌue scꞌool ix, stacji yibꞌ xubꞌ ix, tzꞌochcan ix chꞌoxnabꞌiloc yedꞌ sbꞌinaj dꞌa chucal dꞌa scal chon̈abꞌ chiꞌ. 28 Palta tato yel malaj jabꞌoc smul ix, malaj jabꞌoc tas tzꞌicꞌan ix, yuj chiꞌ scheclajeli to malaj smul ix, syaln̈ej yalji yuneꞌ ix.

29 Aton jun ley tic tzꞌoch dꞌa yibꞌan̈ ix ix smulan dꞌa yol scꞌabꞌ vin̈ yetbꞌeyum, yuj chiꞌ tzꞌoch vin̈ yetbꞌeyum ix chiꞌ dꞌa cꞌacꞌalcꞌolal. 30 Tato ay junoc vinac ton̈ej tzꞌecꞌ dꞌa yibꞌan̈ yacꞌan cꞌacꞌalcꞌolal dꞌa ix yetbꞌeyum, a jun vinac chiꞌ yovalil syicꞌcot ix yetbꞌeyum vin̈ chiꞌ dꞌa vichan̈ a in Jehová in tic, yic sbꞌoan vin̈ sacerdote chiꞌ masanil tas syal jun ley tic. 31 Tato yel ay smul ix ix chiꞌ, a dꞌa yibꞌan̈ ix scan smul chiꞌ. Axo dꞌa yibꞌan̈ vin̈ vinac chiꞌ malaj tas scani, xchi Jehová.