2 Al juntzan̈ tic dꞌa ebꞌ etchon̈abꞌ: Tato ay junoc vinac ma junoc ix ix syacꞌ stiꞌ yacꞌanoch sbꞌa dꞌa yol in cꞌabꞌ dꞌa nazareoal, 3 maxtzac yal-laj yucꞌan vino, ma yucꞌan junocxo tas to pajbꞌinac. Maxtzac yalpax yucꞌan vino ochnac vinagreal, ma vinagre pajbꞌinac. Max yalpax yucꞌan yal sat uva, ma sloan sat, ma sloan sat dꞌa taquin̈al. 4 A dꞌa jantac tiempo ix yacꞌ stiꞌ chiꞌ, man̈ val jabꞌoc syal yabꞌlan masanil tastac tzꞌel dꞌa teꞌ uva, vachꞌchom sqꞌuenal ma stzꞌumal. 5 Max yalpax sjoxanel xil sjolom masanto slajvi jantac tiempo ix yacꞌ stiꞌ chiꞌ dꞌayin, schan̈ej qꞌuibꞌ xil sjolom yujto vic yaj a in Jehová in tic. 6 A dꞌa jun tiempoal chiꞌ, max yal-laj scꞌoch dꞌa stzꞌey junoc chamnac, 7 vachꞌchom a smam, ma snun schami, ma junoc yucꞌtac, ma junoc yanabꞌ, palta max yal-laj scꞌoch dꞌa stzꞌey yic vachꞌ max can dꞌa chucal icha yalan ley. Yovalil vachꞌn̈ej yaji yujto vic yaji. 8 A dꞌa masanil tiempo bꞌaj ix yacꞌ stiꞌ chiꞌ, juneln̈ej vicn̈ej yaji.

9 Talaj ay junoc mach junn̈ej ayecꞌ yedꞌoc schami, a xil sjolom to vic yaj chiꞌ, man̈xo vachꞌoc tzꞌajcan icha yalan ley. Yuj chiꞌ ayic slajvi yecꞌbꞌat uqueoc cꞌual ayic sbꞌoxican icha yalan ley, ichato chiꞌ sjoxjiel xil sjolom chiꞌ. 10 Axo dꞌa yucubꞌixial, syicꞌanbꞌat chavan̈oc nocꞌ paramuch yaln̈ej tas macan̈il dꞌa junoc vin̈ sacerdote dꞌa yichan̈ in cajnubꞌ bꞌaj tzin chꞌox in bꞌa. 11 A vin̈ sacerdote chiꞌ tzꞌacꞌan junoc nocꞌ chiꞌ silabꞌil yuj smul jun anima chiꞌ. Axo junxo nocꞌ sn̈usjitzꞌa nocꞌ smasanil silabꞌil. Icha chiꞌ tzꞌaj yacꞌji tup smul yuj bꞌaj ix cham jun anima chiꞌ dꞌa stzꞌey. A dꞌa jun cꞌu chiꞌ, a xil sjolom sqꞌuibꞌxi, vic tzꞌajxicani. 12 Tzꞌelxi yich jun tiempoal bꞌaj ix yacꞌ stiꞌ dꞌayin. A jantac tiempo ix ecꞌbꞌat dꞌa yalan̈tax chiꞌ, maxtzac ochlaj sbꞌisuloc, yujto a xil sjolom vic yaji, ix ixtaxeli. An̈ejtonaꞌ yovalil syicꞌpaxbꞌat junoc nocꞌ calnel jun abꞌil sqꞌuinal silabꞌil dꞌa vichan̈ a in Jehová in tic yuj stupan tas ix scꞌulej chiꞌ.

13 Ayic slajvi jantac tiempoal ix yacꞌ stiꞌ jun anima chiꞌ, yovalil sbꞌat dꞌa stiꞌ in cajnubꞌ bꞌaj tzin chꞌox in bꞌa. 14 Ataꞌ syacꞌoch jun silabꞌ dꞌa vichan̈, sn̈usjitzꞌa smasanil, aton junoc nocꞌ quelem calnel jun abꞌil sqꞌuinal, malaj jabꞌoc spaltail. An̈ejaꞌ syacꞌpax junoc nocꞌ nun calnel jun abꞌil sqꞌuinal, malaj jabꞌoc spaltail. A jun chiꞌ silabꞌ yaj yuj yacꞌji tup mul. Tzꞌacꞌji junoc nocꞌ chꞌac calnel malaj jabꞌoc spaltail silabꞌil yic juncꞌolal. 15 An̈ejtonaꞌ, yovalil syacꞌ junoc yuneꞌ mooch ixim pan malaj yich, a ixim harina te vachꞌ ayoch dꞌay calabꞌil yedꞌ aceite. Syacꞌpax ixim cꞌoxox pan malaj yich, ayoch aceite dꞌay. Junn̈ej tzꞌaj yacꞌan yedꞌ yofrenda dꞌa ixim trigo yedꞌ vino dꞌin̈antaxon yacꞌani.

16 A junoc vin̈ sacerdote tzꞌacꞌanoch jun silabꞌ yuj mul chiꞌ dꞌa vichan̈ a in Jehová in yedꞌ silabꞌ to sn̈usjitzꞌa smasanil. 17 Syacꞌanpax nocꞌ calnel silabꞌil yic juncꞌolal. Junn̈ej tzꞌaj yacꞌan yedꞌ ixim pan malaj yich chiꞌ. Syacꞌanpax ofrenda dꞌa ixim trigo yedꞌ pax vino. 18 A jun ix yacꞌ stiꞌ dꞌa nazareoal chiꞌ, sjoxchajel xil sjolom. A dꞌa yichan̈ in cajnubꞌ sjoxchajeli. Smolqꞌue xil sjolom ayoch chꞌoxnabꞌiloc to vic yaji, sn̈usjitzꞌa dꞌa cal cꞌacꞌ, aton cꞌacꞌ bꞌaj stzꞌa silabꞌ yic juncꞌolal. 19 Ayic slajvi sjoxjiel xil sjolom chiꞌ, a vin̈ sacerdote tzꞌicꞌanqꞌue sjen̈jabꞌ nocꞌ calnel tajinacxo chiꞌ yedꞌ jun ixim pan malaj yich ayem dꞌa yol jun yuneꞌ mooch chiꞌ yedꞌ pax jun ixim cꞌoxox pan malaj yich, syacꞌanoch vin̈ masanil dꞌa yol scꞌabꞌ jun ix yacꞌoch sbꞌa nazareoal chiꞌ. 20 Slajvi chiꞌ, sbꞌachanoch juntzan̈ chiꞌ vin̈ sacerdote chiꞌ dꞌa vichan̈ a in Jehová in tic. A juntzan̈ chiꞌ sicꞌbꞌilel vicoc, yic ebꞌ sacerdote chiꞌ yaji yedꞌ pax sn̈iscꞌol nocꞌ sbꞌachchajoch dꞌa vichan̈, xubꞌ nocꞌ to sicꞌchajcaneli, yic vin̈ sacerdote chiꞌ yaji. Ayic toxo ix lajvi masanil juntzan̈ chiꞌ, a jun yacꞌnacoch sbꞌa nazareoal chiꞌ, tzaxo yal yucꞌan vino.

21 Aton juntzan̈ checnabꞌil tic dꞌa ebꞌ nazareo: Tato ay junoc nazareo chiꞌ syacꞌ stiꞌ yacꞌan junoc ofrenda ecꞌto dꞌa yichan̈taxon sleyal, yovalil scꞌanabꞌajej scꞌulan icha bꞌaj ix yacꞌ stiꞌ chiꞌ, xchi Jehová.

22 Ix yalanxi Jehová dꞌa vin̈aj Moisés chiꞌ icha tic:

23 Al dꞌa vin̈aj Aarón yedꞌ dꞌa ebꞌ yuninal, ayic syalan vachꞌ lolonel ebꞌ dꞌa yibꞌan̈ ebꞌ eyetisraelal, syal ebꞌ icha tic:

27 Icha chiꞌ ol yutej ebꞌ in yacꞌan bꞌinaj dꞌa yibꞌan̈ ebꞌ etisraelal. A inxo ol vacꞌ in vachꞌcꞌolal dꞌa yibꞌan̈ ebꞌ, xchi dꞌa vin̈.