4 Yuj chiꞌ ix yalan Jehová dꞌa vin̈aj Moisés chiꞌ: 5 Cha juntzan̈ carreta yedꞌ juntzan̈ nocꞌ vacax smunlaj chiꞌ, tzacꞌan dꞌa ebꞌ levita yic scꞌan ebꞌ dꞌa munlajel dꞌa in cajnubꞌ bꞌaj tzin chꞌox in bꞌa, icha tastac munlajelal scꞌulej junjun ebꞌ, xchi dꞌa vin̈.

6 Ix schaan juntzan̈ carreta chiꞌ vin̈, ix schaanpax nocꞌ vacax smunlaj chiꞌ vin̈, ix spojanecꞌ vin̈ dꞌa scal ebꞌ levita. 7 A dꞌa ebꞌ yin̈tilalcan vin̈aj Gersón, chabꞌ carreta yedꞌ chan̈van̈ nocꞌ vacax chiꞌ ix yacꞌ vin̈, icha syal smunlajel ebꞌ. 8 Axo dꞌa ebꞌ yin̈tilalcan vin̈aj Merari, chan̈eꞌ carreta yedꞌ vajxacvan̈ nocꞌ vacax chiꞌ ix yacꞌ vin̈, icha syal smunlajel ebꞌ bꞌaj scuchbꞌaj yuj vin̈aj Itamar yuninal vin̈aj sacerdote Aarón. 9 Axo dꞌa yin̈tilalcan vin̈aj Coat, malaj carreta, malaj pax nocꞌ vacax ix acꞌji, yujto a ebꞌ sbꞌachanbꞌat masanil yamcꞌabꞌ yic scajnubꞌ Jehová dꞌa sjolom sjen̈jabꞌ.

10 Ayic ix acꞌjicanoch yopisio altar, ix yicꞌbꞌat yofrenda ebꞌ yajal dꞌa junjun in̈tilal dꞌa yichan̈ altar chiꞌ. 11 Ix yalan Jehová dꞌa vin̈aj Moisés chiꞌ: A dꞌa junjun cꞌu chꞌocchꞌoc ebꞌ yajal dꞌa junjun in̈tilal ol yicꞌcot yofrenda yuj yochcan yopisio altar, xchi.

12-83 A dꞌa bꞌabꞌel cꞌu, ix yicꞌancot yofrenda vin̈aj Naasón yuninal vin̈aj Aminadab, yajal dꞌa yin̈tilal Judá.

Dꞌa schabꞌil cꞌual, ix yicꞌancot yic vin̈aj Natanael yuninal vin̈aj Zuar, yajal dꞌa yin̈tilal Isacar.

Dꞌa yoxil cꞌual, ix yicꞌancot yic vin̈aj Eliab yuninal vin̈aj Helón, yajal dꞌa yin̈tilal Zabulón.

Dꞌa schan̈il cꞌual, ix yicꞌancot yic vin̈aj Elisur yuninal vin̈aj Sedeur, yajal dꞌa yin̈tilal Rubén.

Dꞌa yoil cꞌual, ix yicꞌancot yic vin̈aj Selumiel yuninal vin̈aj Zurisadai, yajal dꞌa yin̈tilal Simeón.

Dꞌa svaquil cꞌual, ix yicꞌancot yic vin̈aj Eliasaf yuninal vin̈aj Deuel, yajal dꞌa yin̈tilal Gad.

Dꞌa yuquil cꞌual, ix yicꞌancot yic vin̈aj Elisama yuninal vin̈aj Amiud, yajal dꞌa yin̈tilal Efraín.

Dꞌa svajxaquil cꞌual, ix yicꞌancot yic vin̈aj Gamaliel yuninal vin̈aj Pedasur, yajal dꞌa yin̈tilal Manasés.

Dꞌa sbꞌalun̈il cꞌual, ix yicꞌancot yic vin̈aj Abidán yuninal vin̈aj Gedeoni, yajal dꞌa yin̈tilal Benjamín.

Dꞌa slajun̈il cꞌual, ix yicꞌancot yic vin̈aj Ahiezer yuninal vin̈aj Amisadai, yajal dꞌa yin̈tilal Dan.

Dꞌa yuxluchil cꞌual, ix yicꞌancot yic vin̈aj Pagiel yuninal vin̈aj Ocrán, yajal dꞌa yin̈tilal Aser.

Axo dꞌa slajchavil cꞌual, ix yicꞌancot yic vin̈aj Ahira yuninal vin̈aj Enán, yajal dꞌa yin̈tilal Neftalí.

Lajann̈ej yofrenda junjun ebꞌ vin̈ ix yicꞌcoti. Aton junjun plato nabꞌa plata, 130 siclo yalil junjun yedꞌ pax junjun qꞌuen nivac ucꞌabꞌ nabꞌa plata, 70 siclo yalil junjun, icha echlabꞌ scꞌanchaj dꞌa scajnubꞌ Jehová. A juntzan̈ yedꞌtal chiꞌ te bꞌudꞌan yuj ixim harina te vachꞌ calabꞌil yedꞌ aceite, aton syacꞌ ebꞌ dꞌa ofrendail. Ix yacꞌanpax junjun qꞌuen nivac cuchara nabꞌa oro ebꞌ, 10 siclo yalil junjun, bꞌudꞌan yedꞌ incienso. Ix yacꞌanpax junjun nocꞌ quelem vacax ebꞌ, junjun nocꞌ chꞌac calnel, junjun nocꞌ quelem calnel jun abꞌil sqꞌuinal yic sn̈usjitzꞌa dꞌa silabꞌil. Ix yacꞌanpax junjun nocꞌ mam chiva ebꞌ yic tzꞌoch silabꞌil yuj mul. Stzacꞌanilxo ix yacꞌ silabꞌ yic juncꞌolal ebꞌ, chavan̈ nocꞌ toro, ovan̈ nocꞌ chꞌac calnel, ovan̈ nocꞌ mam chiva yedꞌ pax ovan̈ nocꞌ quelemtac calnel jun abꞌil sqꞌuinal ix yacꞌ junjun ebꞌ.

84 Masanil ofrenda ix yacꞌ ebꞌ yajal yaj dꞌa yin̈tilalcan Israel, ayic ix ochcan yopisio altar, aton juntzan̈ tic: Lajchaveꞌ qꞌuen plato nabꞌa plata, lajchaveꞌ ucꞌabꞌ nabꞌa plata yedꞌ lajchaveꞌ nivac cuchara nabꞌa oro. 85 Junjun plato chiꞌ 130 siclo yalil, junjun ucꞌabꞌ 70 siclo yalil, yuj chiꞌ a qꞌuen plata chiꞌ dꞌa smasanil, ay 2 mil 400 siclo yalil, icha echlabꞌ scꞌanchaj dꞌa scajnubꞌ Jehová. 86 Ay pax lajchaveꞌ qꞌuen nivac cuchara nabꞌa oro bꞌudꞌan yuj incienso, 10 siclo yalil junjun, icha echlabꞌ scꞌanchaj dꞌa scajnubꞌ Jehová. A qꞌuen oro dꞌa smasanil, ay 120 siclo qꞌueen.

87 A sbꞌisul masanil nocꞌ nocꞌ ix n̈usjitzꞌa silabꞌil chiꞌ, aton tic: Lajchavan̈ nocꞌ quelemtac vacax, lajchavan̈ nocꞌ chꞌac calnel, lajchavan̈ nocꞌ quelemtac calnel jun abꞌil sqꞌuinal, ayn̈ej ixim trigo tzꞌacꞌji ofrendail yedꞌoc yedꞌ pax lajchavan̈ nocꞌ mam chiva tzꞌacꞌji silabꞌil yuj mul. 88 Axo pax nocꞌ nocꞌ ix acꞌji silabꞌil yuj juncꞌolal, 24 nocꞌ toro dꞌa smasanil, 60 nocꞌ chꞌac calnel, 60 nocꞌ mam chiva yedꞌ 60 nocꞌ quelemtac calnel jun abꞌil sqꞌuinal. Aton masanil juntzan̈ ofrenda chiꞌ ix acꞌchaji ayic ix ochcan yopisio altar ayic toxo ix ochcan yicoc Jehová.

89 Ayic tzꞌoch vin̈aj Moisés chiꞌ dꞌa scajnubꞌ Jehová bꞌaj schꞌox sbꞌa yic slolon vin̈ yedꞌ Jehová chiꞌ, syabꞌ val vin̈ slolon Jehová yedꞌoc dꞌa snan̈al chabꞌ yechel querubín ayoch dꞌa yibꞌan̈ bꞌaj tzꞌacꞌji tup mul, aton smacul scaxail trato.