Ix alchaj tas tzꞌaj yoch scꞌacꞌal candil
8
Ix yalanxi Jehová dꞌa vin̈aj Moisés chiꞌ icha tic: 2 Al dꞌa vin̈aj Aarón to ayic ol yacꞌanoch scꞌacꞌal uqueꞌ candil vin̈, a dꞌa yichan̈ sbꞌachnubꞌ candil chiꞌ syacꞌ yoc, xchi dꞌa vin̈. 3 Ix scꞌanabꞌajej vin̈aj Aarón chiꞌ sbꞌoanoch scꞌacꞌal juntzan̈ candil chiꞌ yic syacꞌan yoc dꞌa yichan̈, icha ix aj yalan Jehová dꞌa vin̈aj Moisés chiꞌ. 4 A jun bꞌachnubꞌ candil chiꞌ nabꞌa oro, tenbꞌil dꞌa qꞌuen martillo, sbꞌat dꞌa yich masanto dꞌa sfloral dꞌa schon. Ix bꞌoji jun bꞌachnubꞌ candil chiꞌ icha val yechel ix schꞌox Jehová dꞌa vin̈aj Moisés chiꞌ.Ix ochcan yopisio ebꞌ levita
5 Ix yalanxi Jehová dꞌa vin̈aj Moisés chiꞌ icha tic:
6 Icꞌcanel ebꞌ levita dꞌa scal ebꞌ eyetisraelal tic, tza sacbꞌitan ebꞌ icha yalan ley. 7 Icha tic ol aj a sacbꞌitan ebꞌ: Tza tzicoch a aꞌ dꞌa ebꞌ yic sacbꞌican ebꞌ, sjoxjiel masanil xil snivanil ebꞌ. Slajvi chiꞌ, sjucꞌan spichul ebꞌ. Icha chiꞌ tzꞌaj sacbꞌican ebꞌ. 8 Elan̈chamel tzicꞌcot junoc nocꞌ quelem vacax yedꞌ junoc echlabꞌ ixim harina te vachꞌ, calabꞌil yedꞌ aceite tzꞌacꞌji ofrendail dꞌa ixim trigo. Tzꞌacꞌjipax junocxo nocꞌ quelem vacax silabꞌil yuj mul. 9 Tzalan dꞌa ebꞌ levita to sja ebꞌ smasanil dꞌa slacꞌanil cajnubꞌ bꞌaj tzin chꞌox in bꞌa, tza molbꞌanpax masanil ebꞌ eyetisraelal. 10 A ebꞌ levita chiꞌ tzꞌoch ebꞌ dꞌa vichan̈. Axo taꞌ ol yacꞌqꞌue scꞌabꞌ ebꞌ eyetchon̈abꞌ dꞌa sjolom ebꞌ. 11 A vin̈aj Aarón ol acꞌanoch ebꞌ levita chiꞌ dꞌa vichan̈ a in Jehová in tic yofrendaoc ebꞌ eyetisraelal chiꞌ. Icha chiꞌ ol aj scan ebꞌ in yacꞌan servil. 12 Slajvi chiꞌ, syacꞌanqꞌue scꞌabꞌ ebꞌ levita chiꞌ dꞌa sjolom chavan̈ nocꞌ quelemtac vacax chiꞌ. Jun nocꞌ tzꞌacꞌji silabꞌil yuj yacꞌji tup mul, axo junxo nocꞌ sn̈usjitzꞌa smasanil silabꞌil dꞌayin. Icha chiꞌ tzꞌaj stupcanel smul ebꞌ. 13 Slajvi chiꞌ tzacꞌanoch ebꞌ dꞌa yichan̈ vin̈aj Aarón yedꞌ ebꞌ yuninal yuj yacꞌjican ebꞌ dꞌayin. 14 Icha chiꞌ ol utoc icꞌancanel ebꞌ dꞌa scal ebꞌ eyetisraelal yic tzꞌochcan ebꞌ vicoc. 15 Ayic toxo ix lajvi sacbꞌican ebꞌ icha yalan ley yedꞌ yacꞌjicanoch ebꞌ dꞌa yol in cꞌabꞌ, tzaxo yal sja ebꞌ dꞌa in cajnubꞌ bꞌaj tzin chꞌox in bꞌa yic smunlaji. 16 Aton ebꞌ tic vic tzꞌajcan dꞌa juneln̈ej dꞌa scal ebꞌ eyetisraelal sqꞌuexuloc ebꞌ bꞌabꞌel vinac unin. 17 Yujto vic yaj masanil sbꞌabꞌel vinac yuneꞌ ebꞌ ix eyetchon̈abꞌ tzꞌalji yedꞌ pax sbꞌabꞌel yuneꞌ nocꞌ e molbꞌetzal nocꞌ tato vinac nocꞌ. Ayic ix in milancham masanil ebꞌ bꞌabꞌel unin dꞌa Egipto, ataꞌ ix vacꞌcan masanil ebꞌ bꞌabꞌel vinac unin yic tzꞌochcan ebꞌ vicoc. 18 Yuj chiꞌ a ebꞌ levita tic tzin cha sqꞌuexuloc ebꞌ bꞌabꞌel unin chiꞌ ticnaic. 19 A in ix in sicꞌcanel ebꞌ levita tic dꞌa e cal a ex israel ex tic. Ix vacꞌ ebꞌ dꞌa vin̈aj Aarón yedꞌ dꞌa ebꞌ yuninal vin̈ yic a ebꞌ tzin acꞌan servil e qꞌuexuloc dꞌa in cajnubꞌ bꞌaj tzin chꞌox in bꞌa yuj vacꞌan tup e mul dꞌa eyibꞌan̈. A ebꞌ sja dꞌa vichan̈ e qꞌuexuloc yic max ex chami tato tzex ja dꞌa stzꞌey in cajnubꞌ, xchi Jehová.
20 Icha chiꞌ ix aj scꞌanabꞌajan vin̈aj Moisés, vin̈aj Aarón yedꞌ masanil ebꞌ israel masanil tas ix yal Jehová dꞌa vin̈aj Moisés chiꞌ yuj ebꞌ levita. 21 Ix sacbꞌitan sbꞌa ebꞌ levita chiꞌ, ix sjucꞌanel spichul ebꞌ, axo vin̈aj Aarón ix acꞌanoch ebꞌ dꞌa yichan̈ Jehová dꞌa ofrendail. Ix yacꞌanpax silabꞌ vin̈ yic stupcanel smul ebꞌ. 22 Ayic ix lajvi juntzan̈ chiꞌ smasanil, ix och ebꞌ levita chiꞌ bꞌaj ay scajnubꞌ Jehová bꞌaj schꞌox sbꞌa yic smunlaj ebꞌ taꞌ. A vin̈aj Aarón yedꞌ ebꞌ yuninal scuchbꞌan ebꞌ. Icha ix aj yalan Jehová dꞌa vin̈aj Moisés chiꞌ, icha chiꞌ ix aj scꞌanabꞌajan ebꞌ scꞌulan yedꞌ ebꞌ levita chiꞌ.
A stiempoal yic tzꞌacꞌvi servil ebꞌ levita
23 Ix yalanxi Jehová dꞌa vin̈aj Moisés chiꞌ icha tic:
24 Ol och ebꞌ levita dꞌa yopisio dꞌa in cajnubꞌ bꞌaj tzin chꞌox in bꞌa, ayic 25 abꞌilxo sqꞌuinal ebꞌ. 25 Axo yic slajvi 50 abꞌil sqꞌuinal ebꞌ, tzꞌel ebꞌ dꞌa yopisio dꞌa juneln̈ej. 26 Ayic scꞌoch sqꞌuinal ebꞌ dꞌa icha chiꞌ, syal scolvaj ebꞌ yedꞌ ebꞌ smunlaj dꞌa mantiado chiꞌ, palta maxtzac munlaj ebꞌ dꞌa smunlajel ichataxon ix scꞌulej. Icha chiꞌ tzutej acꞌanoch ebꞌ levita dꞌa smunlajel, xchi dꞌa vin̈.