2 Al dꞌa ebꞌ etchon̈abꞌ israel to syacꞌoch qꞌuin̈ ebꞌ yic snaancot ebꞌ ayic yelnac ebꞌ dꞌa libre ichataxon scꞌual to chequel yajcani. 3 Tzeyacꞌoch jun qꞌuin̈ chiꞌ dꞌa jun cꞌu chiꞌ ayic vanxo yem cꞌu, aton yic 14 yoch jun uj tic, tze cꞌanabꞌajan masanil icha yajcan dꞌa sleyal, xchi dꞌa vin̈.

4 Ichato chiꞌ ix yalan vin̈aj Moisés dꞌa ebꞌ yetisraelal to tzꞌoch jun qꞌuin̈ chiꞌ. 5 Ix yacꞌoch jun qꞌuin̈ chiꞌ ebꞌ dꞌa yemcꞌualil dꞌa 14 yoch jun uj chiꞌ dꞌa tzꞌinan lum Sinaí, icha ix aj yalan Jehová dꞌa vin̈aj Moisés chiꞌ.

6 Palta a dꞌa scal ebꞌ chiꞌ, ay juntzan̈ ebꞌ vin̈ man̈ vachꞌoc yaj icha yalan ley, yujto ix syam junoc chamnac ebꞌ vin̈, maj yal-laj yacꞌanoch qꞌuin̈ ebꞌ vin̈ dꞌa jun cꞌual chiꞌ. Yuj chiꞌ ix cꞌoch ebꞌ vin̈ dꞌa vin̈aj Moisés yedꞌ dꞌa vin̈aj Aarón dꞌa jun cꞌu chiꞌ yic scꞌanbꞌan ebꞌ vin̈. 7 Ix yalan ebꞌ dꞌa vin̈aj Moisés chiꞌ icha tic:

—A on̈ tic ix co yam jun chamnac, yuj chiꞌ man̈ vachꞌoc caj icha yalan ley. ¿Tocval man̈ ol chajoc cacꞌ cofrenda dꞌa Jehová dꞌa jun cꞌu tic yedꞌ masanil ebꞌ quetchon̈abꞌ? xchi ebꞌ vin̈.

8 Ix tacꞌvi vin̈aj Moisés chiꞌ icha tic:

—Tan̈vejec, ol vabꞌ tas xchi Jehová eyuuj, xchi vin̈.

9 Ix yalan Jehová dꞌa vin̈aj Moisés chiꞌ icha tic:

Al juntzan̈ tic dꞌa ebꞌ etisraelal. 10 E masanil a ex tic yedꞌ ebꞌ eyin̈tilal, yovalil tzeyacꞌoch jun qꞌuin̈ tic yic tze naancoti ayic vicꞌannac ex el dꞌa libre a in Jehová in tic. A mach man̈ vachꞌoc yaj icha yalan ley, yujto ix syam junoc chamnac, ma ebꞌ najat aybꞌat dꞌa junoc bꞌaj schec sbꞌa, 11 ol xo yacꞌoch qꞌuin̈ ebꞌ dꞌa 14 yoch schabꞌil uj dꞌa yemcꞌualil. Yovalil schi nocꞌ silabꞌ ebꞌ yedꞌ an̈ itaj cꞌaꞌ yedꞌ ixim pan malaj yich. 12 Malaj jabꞌocxo nocꞌ scan yuj ebꞌ dꞌa junxo cꞌual, max smacꞌpoj sbꞌaquil nocꞌ ebꞌ. Icha ix aj valani, icha val chiꞌ tzꞌaj eyacꞌanoch qꞌuin̈ chiꞌ. 13 Palta tato ay mach max acꞌanoch jun qꞌuin̈ chiꞌ, vachꞌchom vachꞌ yaj icha yalan ley, mato man̈ ayocbꞌat dꞌa junoc bꞌaj schec sbꞌa, man̈xaocabꞌ yalan yic dꞌa e cal, yujto maj yacꞌ yofrenda dꞌayin dꞌa jun cꞌu to chequel yajcan chiꞌ, scan smul chiꞌ dꞌa yibꞌan̈.

14 Tato ay ebꞌ chꞌoc chon̈abꞌil ayecꞌ cajan dꞌa e cal, sgana ebꞌ syacꞌoch jun qꞌuin̈ chiꞌ eyedꞌoc yic tzin yicꞌanchaan̈, yovalil scꞌanabꞌajej ebꞌ icha sleyal ix valaꞌ. A ley ix vacꞌ e cꞌanabꞌajej chiꞌ, aꞌ scꞌanabꞌajej pax ebꞌ chꞌoc chon̈abꞌil ayecꞌ cajan chiꞌ dꞌa e cal, xchi dꞌa vin̈.

15 A dꞌa scꞌual ayic ix bꞌojiqꞌue scajnubꞌ Jehová, syalelcꞌochi aton Mantiado yic trato, ix och jun asun dꞌa yibꞌan̈. Ayic ix emcan cꞌu, lajan ix aj yilji icha cꞌacꞌ, masanto ix sacbꞌi dꞌa junxo cꞌu. 16 Ichan̈ej chiꞌ ix aji. Ayn̈ejoch jun asun chiꞌ dꞌa yibꞌan̈ cajnubꞌ chiꞌ a tzꞌecꞌ cꞌu, axo dꞌacꞌvalil ichato ayoch scꞌacꞌal jun asun chiꞌ. 17 Ayic sqꞌue vaan jun asun chiꞌ dꞌa yibꞌan̈ cajnubꞌ chiꞌ, sbꞌeybꞌat ebꞌ israel chiꞌ. Axo bꞌaj tzꞌochxi vaan, ataꞌ sbꞌoxiqꞌue scampamento ebꞌ. 18 A Jehová schꞌoxan dꞌa ebꞌ tato sbꞌeybꞌat ebꞌ, mato tzꞌoch vaan ebꞌ. A bꞌaj tzꞌoch vaan jun asun chiꞌ dꞌa yibꞌan̈ scajnubꞌ Jehová, ataꞌ scann̈ej ebꞌ. 19 Tato nivan tiempo tzꞌoch vaan jun asun chiꞌ, scꞌanabꞌajej ebꞌ dꞌa Jehová scan taꞌ. 20 Tato jun chabꞌn̈ej cꞌual tzꞌecꞌ jun asun chiꞌ jun, icha chiꞌ scꞌulejpax ebꞌ, slajvi chiꞌ sbꞌeypaxbꞌat ebꞌ, icha tzꞌaj schꞌoxan Jehová dꞌa ebꞌ. 21 Ay bꞌaj junn̈ej acꞌval tzꞌecꞌ jun asun chiꞌ, axo dꞌa qꞌuin̈ibꞌalil sbꞌatxi, icha chiꞌ tzꞌaj sbꞌeyxibꞌat ebꞌ. Tato dꞌa cꞌualil ma dꞌacꞌvalil sbꞌat jun asun chiꞌ, sbꞌatpax ebꞌ. 22 Tato scann̈ej vaan jun asun chiꞌ dꞌa yibꞌan̈ scajnubꞌ Jehová chabꞌoc cꞌual, ma junoc ujal, ma junoc abꞌil, ataꞌ scann̈ej ebꞌ, max bꞌatlaj ebꞌ. Tato sbꞌatxi jun asun chiꞌ, sbꞌatxi ebꞌ. 23 Masanto aꞌ Jehová tzꞌalani, tzꞌoch vaan ebꞌ. An̈ejaꞌ tzꞌalanpaxi, sbꞌatxi ebꞌ. Ix scꞌanabꞌajejn̈ej ebꞌ dꞌa Jehová, icha ix aj yalan dꞌa vin̈aj Moisés chiꞌ.