2 Dꞌa bꞌabꞌel cꞌual yic bꞌabꞌel uj, ataꞌ sbꞌoqꞌue in cajnubꞌ bꞌaj tzin chꞌox in bꞌa. 3 Slajvi chiꞌ, tzꞌacꞌchajoch teꞌ scaxail trato dꞌa yool chiꞌ, tzꞌacꞌchajoch cꞌapac cortina smaculoc. 4 Tzꞌacꞌchajpaxoch teꞌ mexa yedꞌ tas tzꞌem dꞌa yibꞌan̈ yedꞌ sbꞌachnubꞌ candil, tzꞌochpax scꞌacꞌal candil chiꞌ. 5 A dꞌa yichan̈ scaxail trato tzꞌoch altar oro bꞌaj stzꞌa incienso, slocbꞌajqꞌue cꞌapac cortina dꞌa stiꞌ mantiado chiꞌ. 6 Sbꞌochajpaxem jun altar bꞌaj stzꞌa silabꞌ dꞌa yichan̈elta stiꞌ mantiado chiꞌ. 7 Tzꞌacꞌchajem jun nivan palangana dꞌa scal mantiado yedꞌ altar, tzꞌacꞌji bꞌudꞌjoc yedꞌ a aꞌ. 8 Slajvi chiꞌ, sbꞌochajoch cꞌapac cortina smaculoc spatictac yamaqꞌuil, axo cꞌapac tzꞌoch dꞌa stiꞌ yamaqꞌuil chiꞌ sqꞌuepax locan cꞌapac.

9 Tzicꞌancot aceite scꞌanchaji a sicꞌchajel junoc mach, ma junoc tas. Tza secanem dꞌa yibꞌan̈ in cajnubꞌ yedꞌ dꞌa masanil tastac ayoch dꞌa yool. Icha chiꞌ tzꞌaj yochcan masanil syamcꞌabꞌil dꞌa yopisio, yic vachꞌ vicxo tzꞌajcani. 10 Tza secanpaxem aceite chiꞌ dꞌa yibꞌan̈ altar bꞌaj stzꞌa silabꞌ yedꞌ masanil syamcꞌabꞌil. Icha chiꞌ tzꞌaj yochcan dꞌa yopisio, yuj chiꞌ a jun altar chiꞌ vicxo tzꞌajcani. 11 Tza secanpaxem aceite chiꞌ dꞌa yibꞌan̈ jun nivan palangana yedꞌ sbꞌachnubꞌal yich yic vachꞌ vicxo tzꞌajcani.

12 Slajvi chiꞌ, tzicꞌanbꞌat vin̈aj Aarón yedꞌ ebꞌ yuninal dꞌa stiꞌ mantiado chiꞌ, tza checan sbꞌic sbꞌa ebꞌ taꞌ. 13 Slajvi chiꞌ, tzacꞌanoch spichul vin̈aj Aarón chiꞌ yic yopisio. Tzacꞌanoch aceite dꞌa vin̈ yic tzꞌochcan yopisio vin̈ dꞌa sacerdoteal dꞌayin. 14 Sjapax ebꞌ yuninal vin̈ chiꞌ dꞌa a tzꞌey, tzacꞌanoch spichul ebꞌ. 15 Tzacꞌanpaxoch aceite dꞌa ebꞌ icha tzutej vin̈aj Aarón chiꞌ, yic vachꞌ tzꞌochcan ebꞌ sacerdoteal dꞌayin. Tzꞌacꞌjioch aceite chiꞌ dꞌa ebꞌ yic scan jun opisio chiꞌ dꞌa yol scꞌabꞌ ebꞌ, ol bꞌeyn̈ejbꞌat dꞌa yin̈tilal ebꞌ dꞌa masanil tiempo, xchi Jehová.

16 Icha ix aj yalan Jehová, icha val chiꞌ ix aj sbꞌoan vin̈aj Moisés chiꞌ.

17 Ayic ix schaanel yich yic schabꞌil abꞌil yelta ebꞌ dꞌa Egipto, dꞌa val sbꞌabꞌel cꞌual yic bꞌabꞌel uj ix bꞌojiqꞌue scajnubꞌ Dios. 18 Ix yalan vin̈aj Moisés chiꞌ to tzꞌacꞌjiem qꞌuen sbꞌachnubꞌal yich, ix acꞌjiem teꞌ marco dꞌa yibꞌan̈ qꞌueen, ix acꞌjipaxoch sreglail, ix icꞌjiqꞌue vaan teꞌ oy dꞌa yibꞌan̈ sbꞌachnubꞌal ayxoem chiꞌ. 19 Ix acꞌjibꞌat jen̈an cꞌapac mantiado dꞌa yibꞌan̈ scajnubꞌ Dios chiꞌ, ix acꞌjibꞌat juntzan̈xo dꞌa yibꞌan̈ mantiado icha ix aj yalan Jehová dꞌa vin̈aj Moisés chiꞌ.

20 Ix lajvi chi, ix yacꞌanem chabꞌ pachan̈ qꞌuen qꞌueen vin̈aj Moisés chiꞌ dꞌa yol scaxail trato, aton qꞌuen bꞌaj tzꞌibꞌabꞌiloch lajun̈eꞌ checnabꞌil. Ix yacꞌanoch teꞌ sbꞌachlabꞌil teꞌ caxa chiꞌ vin̈, ix yacꞌanpaxem smacul teꞌ vin̈, aton bꞌaj tzꞌacꞌji tup mul. 21 Ix lajvi chiꞌ, ix icꞌjibꞌat teꞌ dꞌa yol scajnubꞌ Dios, ix acꞌjioch cꞌapac cortina dꞌa snan̈al yol scajnubꞌ chiꞌ, yic tzꞌoch smaculoc teꞌ caxa chiꞌ, icha ix aj yalan Jehová dꞌa vin̈. 22 Ix acꞌjipaxoch teꞌ mexa dꞌa co vachꞌ dꞌa yol mantiado bꞌaj schꞌox sbꞌa Dios. 23 Vachꞌ ix aj yacꞌjiem ixim pan dꞌa sat teꞌ mexa dꞌa yichan̈ Jehová, icha ix aj yalan dꞌa vin̈aj Moisés chiꞌ.

24 Ix acꞌjipaxoch qꞌuen sbꞌachnubꞌ candil dꞌa co qꞌuexan̈ dꞌa yichan̈ mexa dꞌa yol mantiado bꞌaj schꞌox sbꞌa Dios. 25 Ix acꞌjioch scꞌacꞌal candil dꞌa yichan̈ Jehová, icha ix aj yalan dꞌa vin̈aj Moisés chiꞌ. 26 Ix acꞌjipaxoch altar oro dꞌa yichan̈elta cꞌapac cortina chiꞌ. 27 Ix sn̈usantzꞌa incienso vin̈aj Moisés chiꞌ dꞌa yibꞌan̈ altar chiꞌ, icha ix aj yalan Jehová.

28 Ix lajvi chiꞌ, ix acꞌchajoch cꞌapac cortina smaculoc bꞌaj tzꞌoch ebꞌ sacerdote dꞌa yol cajnubꞌ chiꞌ. 29 Ix acꞌchajem altar bꞌaj sn̈usjitzꞌa silabꞌ dꞌa yichan̈elta stiꞌ mantiado bꞌaj schꞌox sbꞌa Jehová. Ix lajvi chiꞌ ix sn̈usantzꞌa nocꞌ silabꞌ vin̈aj Moisés chiꞌ yedꞌ ixim harina icha ix aj yalan Jehová.

30 Ix acꞌjioch qꞌuen nivan palangana dꞌa scal mantiado yedꞌ altar. Ix acꞌji bꞌudꞌjoc qꞌuen dꞌa a aꞌ yic sbꞌic scꞌabꞌ ebꞌ yedꞌ yoc. 31 A dꞌa a aꞌ chiꞌ ix sbꞌic scꞌabꞌ vin̈aj Moisés chiꞌ yedꞌ yoc. An̈ejaꞌ pax vin̈aj Aarón yedꞌ ebꞌ yuninal sbꞌic scꞌabꞌ ebꞌ yedꞌ yoc, 32 ayic tzꞌoch ebꞌ dꞌa yol mantiado. Sbꞌicpax scꞌabꞌ ebꞌ yedꞌ yoc chiꞌ ayic tzꞌoch ebꞌ dꞌa altar, icha val ix aj yalan Jehová dꞌa vin̈aj Moisés chiꞌ.

33 Dꞌa slajvubꞌalxo ix bꞌochajoch yamaqꞌuil spatic yichan̈ scajnubꞌ Dios yedꞌ altar. Ix lajvi chiꞌ ix acꞌchajoch cꞌapac cꞌapac smaculoc dꞌa stiꞌ amacꞌ chiꞌ. Icha val chiꞌ ix aj sbꞌocanel masanil tas ix alchaj dꞌa vin̈aj Moisés chiꞌ yuj Jehová.

34 Ayic ix lajvi sbꞌoel smasanil, ix emul asun dꞌa yibꞌan̈ mantiado bꞌaj schꞌox sbꞌa Jehová, ix em stziquiquial dꞌa yibꞌan̈ scajnubꞌ chiꞌ yedꞌ dꞌa yool. 35 Yuj chiꞌ maj yal-laj yoch vin̈aj Moisés dꞌa yool chiꞌ, yujto ayecꞌ jun asun chiꞌ dꞌa yibꞌan̈, macbꞌil yool chiꞌ yuj stziquiquial Jehová. 36 Ayic sqꞌue vaan asun chiꞌ dꞌa yibꞌan̈ scajnubꞌ Jehová chiꞌ syicꞌanqꞌue vaan smantiado ebꞌ israel, sbꞌeybꞌat ebꞌ. 37 Tato max qꞌue vaan asun chiꞌ jun, max yicꞌqꞌuelaj vaan scampamento ebꞌ, ato sqꞌue vaan ichato chiꞌ sbꞌat ebꞌ. 38 Yaln̈ej bꞌajtil ayecꞌ ebꞌ israel dꞌa yol bꞌe, syil val jun asun chiꞌ ebꞌ dꞌa yibꞌan̈ scajnubꞌ Jehová dꞌa cꞌualil, axo dꞌacꞌvalil ayoch scꞌacꞌal asun chiꞌ syil ebꞌ.