Génesis sbꞌi jun libro tic. Génesis, syalelcꞌochi “yichbꞌanil”. Aton jun bꞌabꞌel libro tic dꞌa yol chꞌan̈ Biblia. A tzꞌalan tas ajnac yel yich masanil tas. Syalcot yuj ebꞌ anima, yuj masanil nación yedꞌ tas ajnac yel yich chon̈abꞌ Israel, aton jun chon̈abꞌ sicꞌbꞌilel yuj Dios. Ix tzꞌibꞌchajcan jun libro tic ayic te tzijtumxo ebꞌ anima tzꞌacꞌanoch juntzan̈ comon dios dꞌa scꞌool yedꞌ tastac bꞌobꞌil yuj Dios.

A jun libro tic, syalcoti to junn̈ej Dios ay dꞌa juneln̈ej, a bꞌojinac masanil tastac. Syalcoti to a dꞌa yichbꞌanil chiꞌ vachꞌn̈ej yacꞌan Dios yedꞌ ebꞌ anima. A ebꞌ anima chiꞌ yajal yaj ebꞌ dꞌa yibꞌan̈ tastac ay dꞌa yolyibꞌan̈qꞌuinal tic. A ebꞌ anima chiꞌ, juncꞌolal yajecꞌ ebꞌ, tzalajcꞌolal pax yaj ebꞌ tato scꞌanabꞌajej ebꞌ tas syal Dios. An̈ejtonaꞌ syalcoti tas ajnac yel yich mul yedꞌ yaelal janaccan dꞌa quibꞌan̈, yujto a vin̈aj Adán yedꞌ ix Eva, scꞌulejnac ebꞌ tas snaꞌ dꞌa yol yicoꞌ, man̈ scꞌanabꞌajejnacoc ebꞌ tas yalnac Dios. Syalanpaxcot yuj tas ix yutej Dios scolan ebꞌ anima dꞌa scal schucal.

A jun libro tic cha macan̈ yaji: Bꞌabꞌel macan̈ tzꞌel yich dꞌa capítulo 1 masanto dꞌa 11. Syalcot yuj tas ajnac sbꞌo yolyibꞌan̈qꞌuinal tic yedꞌ on̈ anima on̈ tic yedꞌ tas ajnac yel yich mul yedꞌ yichbꞌanil yaelal. Syalanpaxcot yuj jun oval aꞌ mucvajum yedꞌ jun nivan torre scuchan Babel, syalelcꞌochi to syalcot yabꞌixal masanil nación. Axo schabꞌil macan̈ tzꞌel yich dꞌa capítulo 12 masanto dꞌa 50, syalcot yuj tas ajnac yel yich chon̈abꞌ Israel. Elnac yich dꞌa vin̈aj Abraham, vin̈aj Isaac yedꞌ dꞌa vin̈aj Jacob yedꞌ dꞌa ebꞌ yuninal vin̈aj Jacob chiꞌ, aton vin̈aj José yedꞌ ebꞌ yucꞌtac. Syalanpaxcot yuj tas aj sbꞌatnaccan vin̈aj Jacob yedꞌ ebꞌ yuninal dꞌa Egipto. Ataꞌ ochnac ebꞌ yin̈tilal vin̈aj Jacob chiꞌ nivan nacional. Masanil jun libro tic syalaꞌ to an̈ej Dios nivan yelcꞌochi, aꞌ schꞌolbꞌitan ebꞌ anima, syacꞌanoch syaelal ebꞌ max cꞌanabꞌajani. Palta a ebꞌ scꞌanabꞌajani, scolji ebꞌ yuuj. Aton tas tzꞌaj yel yich libro Génesis tic, syalcoti to a Dios bꞌojinac masanil tastac, syalanpaxi to a Dios max yactejcan stan̈van ebꞌ yicxo.