Éxodo sbꞌi jun libro tic. Éxodo syalelcꞌochi “tzꞌeli”, yujto a tzꞌalancot yuj tas aj yelnaccot ebꞌ israel dꞌa Egipto, aton bꞌaj ecꞌnac ebꞌ checabꞌvumal dꞌa jun tiempoal.

A jun libro tic, ox macan̈ yaji: Bꞌabꞌel macan̈, tzꞌel yich dꞌa capítulo 1 masanto dꞌa 18. Syalcot yuj tas ajnac scolchajelta ebꞌ israel yuj Dios dꞌa Egipto bꞌaj ayoch ebꞌ checabꞌvumal yedꞌ tastac ajnac sbꞌeycot ebꞌ dꞌa lum taquin̈ luum masanto javinac ebꞌ dꞌa yich lum vitzal Sinaí. Axo schabꞌil macan̈, tzꞌel yich dꞌa capítulo 19 masanto dꞌa 24. Syalcot yuj jun strato Dios ix sbꞌo yedꞌ ebꞌ schon̈abꞌ, syalanpax yuj scꞌaybꞌubꞌal tas syutej yicꞌan bꞌey sbꞌa junjun anima yedꞌ junjun macan̈ checnabꞌil. Axo yoxil macan̈ tzꞌel yich dꞌa capítulo 25 masanto dꞌa 40, syalcot tas ajnac sbꞌochaj jun scajnubꞌ Dios bꞌaj yovalil tzꞌoch ebꞌ israel ejmelal dꞌa Dios. Syalpax yuj sleyal dꞌa yibꞌan̈ ebꞌ sacerdote yedꞌ tas tzꞌaj yoch ebꞌ anima ejmelal dꞌa Dios.

Syalcot jun libro tic tas yutejnac Dios scolanelta ebꞌ schon̈abꞌ. Ix yalan Dios to a jun schon̈abꞌ chiꞌ yovalil cꞌanabꞌajum syutej sbꞌa dꞌa schecnabꞌil Dios chiꞌ. Ay jun schecabꞌ Dios te nivan yelcꞌoch sbꞌinaj dꞌa jun libro tic, aton vin̈aj Moisés. Aton vin̈ ix yacꞌlabꞌej Dios ayic ix yicꞌanelta schon̈abꞌ dꞌa Egipto. Ay pax jun macan̈ cꞌaybꞌubꞌal te ojtacabꞌil aycan dꞌa jun libro tic, aton lajun̈eꞌ checnabꞌil tzꞌibꞌabꞌilcan dꞌa capítulo 20.