Levítico sbꞌi jun libro tic, yujto aꞌ tzꞌalancot yuj ebꞌ yin̈tilalcan vin̈aj Leví, yoxil yuninal vin̈aj Jacob. A ebꞌ yin̈tilal Leví chiꞌ an̈ej ebꞌ ay yalan yic smunlaj dꞌa scajnubꞌ Dios. Scolvajpax ebꞌ ayic tzꞌoch ebꞌ anima ejmelal dꞌa Dios chiꞌ. A jun libro tic syalcot yuj sleyal tastac smoj scꞌulaj dꞌa scajnubꞌ Dios chiꞌ yedꞌ tas man̈ smojoc syicꞌoch ebꞌ sacerdote chiꞌ dꞌa yichan̈ Dios. Syalanpaxcot yuj tas tzꞌaj sacbꞌitanxi sbꞌa ebꞌ anima.

A tas nivan yelcꞌoch dꞌa jun libro tic to a sDiosal ebꞌ israel malaj jabꞌoc chucal dꞌay. Snibꞌej Dios chiꞌ to vachꞌ syutej sbꞌeybꞌal ebꞌ israel chiꞌ yic malaj pax schucal ebꞌ. Syalanpaxcoti tastac tzꞌaj yacꞌji silabꞌ yedꞌ juntzan̈xo ofrenda tzꞌacꞌji dꞌa Dios, aton tic syal dꞌa capítulo 1 masanto dꞌa 8. Axo capítulo 9 yedꞌ 10, a tzꞌalancot tas aj yochnac vin̈aj Aarón sacerdoteal.

Axo dꞌa capítulo 11 masanto dꞌa 15, ataꞌ syal yuj juntzan̈ tas vachꞌ yedꞌ juntzan̈ tas man̈ vachꞌoclaj. Syalanpax yuj tas tzꞌaj sacbꞌitan sbꞌa ebꞌ anima yuj juntzan̈ chucal scꞌulej. Axo dꞌa capítulo 16, ataꞌ syal yuj tas tzꞌaj yacꞌji lajvoc mul. Axo juntzan̈xo capítulo dꞌa jun libro tic, syalcot yuj juntzan̈xo ley yovalil sbꞌeybꞌalaji yedꞌ juntzan̈ qꞌuin̈ yovalil syacꞌoch ebꞌ israel. Ay jun aycan dꞌa capítulo 19.18 to yovalil sco xajanej ebꞌ ay dꞌa spatic schiquin co pat, aton jun chiꞌ ix yalpax Jesús dꞌa San Mateo 22.39, te nivan yelcꞌoch jun checnabꞌil chiꞌ.