2 Yuj chiꞌ ix yalan vin̈aj Moisés chiꞌ icha tic: Tato ay junoc ex tzeyicꞌcot junoc nocꞌ nocꞌ yic sn̈uschajtzꞌa smasanil silabꞌil dꞌa Jehová, a dꞌa scal nocꞌ e vacax, dꞌa scal nocꞌ e calnel ma dꞌa scal nocꞌ e chiva, ataꞌ tzeyicꞌcot nocꞌ. 3 Tato vacax nocꞌ tze n̈ustzꞌa silabꞌil chiꞌ, yovalil a junoc nocꞌ toro malaj spaltail tzeyicꞌcoti. A jun silabꞌ stzꞌai, a jun chiꞌ to stzꞌabꞌat nocꞌ nocꞌ chiꞌ smasanil. A dꞌa yichan̈ mantiado bꞌaj schꞌox sbꞌa Jehová, ataꞌ tzeyacꞌoch silabꞌ chiꞌ yic vachꞌ schaji yuj Jehová. 4 Yovalil tzeyacꞌqꞌue e cꞌabꞌ dꞌa sjolom nocꞌ, yic schaji nocꞌ yuj yacꞌji lajvoc e mul. 5 A mach ay yic nocꞌ chiꞌ, a smilancham nocꞌ dꞌa yichan̈ Jehová, axo ebꞌ sacerdote yuninal vin̈aj Aarón tzꞌicꞌancot schiqꞌuil nocꞌ, stzicanoch ebꞌ dꞌa schan̈il pacꞌan̈ jun altar ayecꞌ dꞌa yichan̈ mantiado. 6 An̈ejaꞌ vin̈ ay yic nocꞌ chiꞌ spatzꞌanel nocꞌ, schocꞌ xicanbꞌat nocꞌ vin̈. 7 Axo ebꞌ sacerdote yuninal vin̈aj Aarón chiꞌ, syacꞌqꞌue teꞌ cꞌatzitz ebꞌ dꞌa yibꞌan̈ teꞌ tzacꞌacꞌ dꞌa altar chiꞌ yic sqꞌue scꞌacꞌal. 8 Tzꞌacꞌjiqꞌue nocꞌ chibꞌej cotac xicabꞌil chiꞌ dꞌa yibꞌan̈ teꞌ cꞌatzitz chiꞌ yedꞌ nocꞌ sjolom yedꞌ nocꞌ xepuꞌ tzꞌicꞌjiel dꞌa nocꞌ yol scꞌool. 9 A mach tzꞌacꞌan nocꞌ silabꞌ chiꞌ, yovalil a smaxan nocꞌ yol scꞌool, sbꞌicanel nocꞌ yoc, axo vin̈ sacerdote sn̈usantzꞌa jun silabꞌ chiꞌ smasanil dꞌa yibꞌan̈ altar. Sucꞌuqꞌui sjabꞌ jun silabꞌ stzꞌa chiꞌ syabꞌ Jehová.

10 Tato calnel, ma chiva nocꞌ tzeyacꞌ silabꞌil chiꞌ, yovalil chꞌaac nocꞌ, malajocabꞌ jabꞌoc spaltail nocꞌ. 11 A dꞌa stojolal norte dꞌa jun altar chiꞌ, ataꞌ smiljicham nocꞌ yuj mach tzꞌacꞌan nocꞌ chiꞌ dꞌa yichan̈ Jehová. Axo ebꞌ yuninal vin̈aj Aarón chiꞌ stzicanoch schiqꞌuil nocꞌ dꞌa schan̈il pacꞌan̈ jun altar chiꞌ. 12 Slajvi chiꞌ slaj cotac xicajbꞌat nocꞌ, axo vin̈ sacerdote tzꞌacꞌanqꞌue nocꞌ cotac xicabꞌilxo yaj chiꞌ dꞌa yibꞌan̈ cꞌacꞌ dꞌa yibꞌan̈ altar yedꞌ nocꞌ sjolom yedꞌ nocꞌ xepuꞌ tzꞌel dꞌa nocꞌ yol scꞌool. 13 Axo jun mach tzꞌacꞌan nocꞌ silabꞌ chiꞌ, yovalil a smaxan nocꞌ yol scꞌool, sbꞌicanpaxel nocꞌ yoc, axo vin̈ sacerdote sn̈usantzꞌa smasanil dꞌa yibꞌan̈ altar. Sucꞌuqꞌui sjabꞌ jun silabꞌ stzꞌa chiꞌ syabꞌ Jehová.

14 Tato much nocꞌ silabꞌ sn̈usjitzꞌa smasanil dꞌa yichan̈ Jehová, yovalil a junoc nocꞌ paramuch yaln̈ej tas macan̈il. 15 A vin̈ sacerdote tzꞌicꞌancot nocꞌ silabꞌ chiꞌ dꞌa altar, stocꞌanel sjolom nocꞌ vin̈, sn̈usjitzꞌa nocꞌ. Axo schiqꞌuil nocꞌ, stzicoch vin̈ dꞌa spacꞌul altar. 16 Tzꞌicꞌjielta masanil yooch nocꞌ yedꞌ tas ay dꞌa yool, syumjicanbꞌat dꞌa stzꞌeybꞌat altar dꞌa stojolal bꞌaj sjavi cꞌu, aton bꞌaj smolchaj qꞌuen ticꞌaqꞌuil taan̈. 17 Slajvi chiꞌ syamji scꞌaxil nocꞌ yic sjecchitanbꞌat jabꞌoc nocꞌ vin̈, palta max chabꞌaxlaj snan̈al nocꞌ, sn̈usantzꞌa nocꞌ vin̈ sacerdote dꞌa yibꞌan̈ teꞌ cꞌatzitz ayqꞌue dꞌa yibꞌan̈ altar chiꞌ. Sucꞌuqꞌui sjabꞌ jun silabꞌ stzꞌa chiꞌ syabꞌ Jehová.