Juntzan̈ tas svaji tzꞌacꞌji ofrendail
2
Tato ay junoc ex tzeyicꞌcot ixim harina ofrendail dꞌa Jehová, a val ixim harina te vachꞌ tzeyicꞌcoti. A dꞌa yibꞌan̈ ixim chiꞌ tzeyaqꞌuem aceite yedꞌ incienso, 2 tzeyicꞌancot dꞌa ebꞌ sacerdote yin̈tilal vin̈aj Aarón. A junoc ebꞌ sacerdote ayoch dꞌa yopisio tzꞌicꞌanqꞌue junoc bꞌechan̈ ixim harina yedꞌ aceite yedꞌ pax masanil incienso. Slajvi chiꞌ sn̈usjitzꞌa jun silabꞌ chiꞌ dꞌa yibꞌan̈ altar, yuj schꞌoxchaji to aꞌ silabꞌ chiꞌ yic Jehová yaji. Sucꞌuqꞌui sjabꞌ jun ofrenda chiꞌ syabꞌ Jehová. 3 Axo jabꞌocxo jun ofrenda chiꞌ yicxo ebꞌ vin̈ sacerdote yaji. Nivan yelcꞌochi, yujto yetbꞌeyum sbꞌa yedꞌ jun silabꞌ sn̈usjitzꞌa dꞌa yichan̈ Jehová.4 A tzꞌacꞌji junoc ofrenda cꞌanbꞌinac dꞌa yol horno, aocabꞌ ixim harina te vachꞌ, malaj yich sbꞌat dꞌa scal. Syal pim tzꞌaj sbꞌoji, scalaj yedꞌ aceite, syalpax yoch dꞌa cꞌoxoxal to malaj yich, succhajecꞌ aceite dꞌay.
5 Tato a jun ofrenda chiꞌ maybꞌil dꞌa yol xalten, aocabꞌ ixim harina yelxo val te vachꞌ, calabꞌil yedꞌ aceite, palta mocabꞌa yich aybꞌati. 6 Scotac xepchitaji, slajvi chiꞌ tzꞌoch aceite dꞌay, yujto ofrenda dꞌa tas svaji.
7 Tato tzeyacꞌ junoc ofrenda tajinac dꞌa scal aceite, aocabꞌ yedꞌ ixim harina te vachꞌ, calabꞌil yedꞌ aceite tzeyacꞌaꞌ. 8 Ayic toxo ix bꞌoel jun ofrenda chiꞌ, tzeyicꞌancot dꞌa Jehová, tzeyacꞌan dꞌa vin̈ sacerdote, axo vin̈ tzꞌicꞌanbꞌat dꞌa altar. 9 Ataꞌ sn̈ustzꞌa jabꞌoc jun ofrenda chiꞌ vin̈ yic chꞌoxnabꞌil to a ofrenda chiꞌ yic Jehová yaji. Sucꞌuqꞌui sjabꞌ jun silabꞌ chiꞌ syabꞌ Jehová. 10 Axo jabꞌocxo jun ofrenda chiꞌ, yic ebꞌ sacerdote tzꞌajcani. Nivan yelcꞌochi, yujto yetbꞌeyum sbꞌa yedꞌ juntzan̈ ofrenda sn̈usjitzꞌa dꞌa yichan̈ Jehová.
11 Masanil juntzan̈ ofrenda tzeyacꞌ dꞌa Jehová dꞌa tastac svaji, malajocabꞌ yich aybꞌat dꞌa scal. Max yal-laj sn̈usjitzꞌa tas silabꞌil dꞌa yichan̈ Jehová tato aybꞌat yich pan, ma nocꞌ yalchabꞌ dꞌa scal. 12 Syal eyacꞌan ixim pan aybꞌat yich dꞌa scal yedꞌ tas aybꞌat nocꞌ yalchabꞌ dꞌa scal dꞌa ofrendail a tzꞌacꞌji bꞌabꞌel sat avbꞌen, palta max n̈usjitzꞌalaj dꞌa yibꞌan̈ altar silabꞌil bꞌaj stzꞌa silabꞌ sucꞌuqꞌui sjabꞌ syabꞌ Jehová.
13 Masanil ofrenda tzeyacꞌ dꞌa tas svaji, yovalil sbꞌat yatzꞌamil, malaj junoc ofrenda chiꞌ to max bꞌat yatzꞌamil, yujto a atzꞌam atzꞌam chiꞌ schꞌoxanel co trato yedꞌ co Diosal. Yuj chiꞌ masanil ofrenda tzeyacꞌ dꞌa tas svaji chiꞌ, ayn̈ejocabꞌoch yatzꞌamil.
14 Tato tzeyacꞌ junoc ofrenda dꞌa Jehová dꞌa sbꞌabꞌel sat eyavbꞌen, yovalil a jayeoc jolom trigo scꞌanbꞌi dꞌa scal cꞌacꞌ, yaxto val svuchchajeli. 15 A dꞌa yibꞌan̈ jun ofrenda chiꞌ, tzeyacꞌoch aceite yedꞌ incienso, yujto a ofrenda chiꞌ a ixim trigo, ma ixim cebada. 16 A junoc vin̈ sacerdote sn̈usantzꞌa jabꞌoc ixim vuchbꞌilel chiꞌ yedꞌ aceite yedꞌ pax masanil incienso. A jabꞌoc chiꞌ schꞌoxani to a ofrenda chiꞌ yic Jehová yaji.