A silabꞌ yic juncꞌolal
3
Tato ay junoc ex tzeyacꞌ junoc snun e vacax, ma junoc nocꞌ toro silabꞌoc yic tze chꞌoxani to ay e juncꞌolal yedꞌ Jehová, yovalil tzeyicꞌcot nocꞌ dꞌa yichan̈ Jehová. A jun nocꞌ nocꞌ chiꞌ yovalil malaj jabꞌoc spaltail nocꞌ. 2 Ayic tzeyacꞌan junoc ofrenda chiꞌ, tzeyicꞌbꞌat nocꞌ dꞌa yichan̈ mantiado bꞌaj schꞌox sbꞌa Jehová. Ataꞌ tzeyacꞌqꞌue e cꞌabꞌ dꞌa sjolom nocꞌ, slajvi chiꞌ tze milancham nocꞌ. Axo junoc ebꞌ vin̈ sacerdote stzicanoch schiqꞌuil nocꞌ dꞌa schan̈il pacꞌan̈ altar.3 Tato ay junoc ex tzeyacꞌ junoc nocꞌ silabꞌ yic juncꞌolal, tzeyiqꞌuel junoc macan̈ dꞌa nocꞌ silabꞌ chiꞌ, yic sn̈usjitzꞌa dꞌa yichan̈ Jehová, aton juntzan̈ tic tzeyiqꞌueli: Masanil xepuꞌ ayoch dꞌa nocꞌ yol scꞌool, 4 chabꞌ stut nocꞌ yedꞌ xepual, xepuꞌ ayoch dꞌa spatictac sbꞌaquil yich spatic nocꞌ yedꞌ xepuꞌ ayoch dꞌa yibꞌan̈ seyubꞌ nocꞌ. 5 Axo junoc ebꞌ vin̈ sacerdote sn̈usantzꞌa masanil juntzan̈ chiꞌ silabꞌil dꞌa yibꞌan̈ junxo silabꞌ van stzꞌa dꞌa yibꞌan̈ teꞌ cꞌatzitz dꞌa yibꞌan̈ altar, sucꞌuqꞌui sjabꞌ syabꞌ Jehová.
6 Tato tzeyacꞌ junoc nocꞌ calnel ma junoc nocꞌ chiva dꞌa Jehová silabꞌil yic tze chꞌoxan e juncꞌolal yedꞌoc, syal eyacꞌan nocꞌ chꞌaac ma nocꞌ snun, an̈ej tato malaj jabꞌoc spaltail nocꞌ. 7 Ayic tzeyacꞌan nocꞌ calnel chiꞌ silabꞌil dꞌa yichan̈ Jehová, 8 tzeyacꞌqꞌue e cꞌabꞌ dꞌa sjolom nocꞌ. Slajvi chiꞌ tze milancham nocꞌ dꞌa yichan̈ mantiado bꞌaj schꞌox sbꞌa Jehová. Axo junoc ebꞌ vin̈ sacerdote stzicanoch schiqꞌuil nocꞌ dꞌa schan̈il pacꞌan̈ altar.
9 A junoc mach ex tzeyacꞌ junoc nocꞌ silabꞌ chiꞌ, tzeyiqꞌuel junoc macan̈ dꞌa nocꞌ yic sn̈usjitzꞌa dꞌa yichan̈ Jehová, aton juntzan̈ tic tzꞌicꞌjieli: Xepual sn̈e nocꞌ, vachꞌ tzꞌaj yicꞌjiel smasanil yedꞌ xepuꞌ ayoch dꞌa nocꞌ yol scꞌool, 10 stut nocꞌ yedꞌ pax xepuꞌ ayoch dꞌay, xepuꞌ ayoch dꞌa yich spatic nocꞌ yedꞌ xepuꞌ ayoch dꞌa yibꞌan̈ seyubꞌ nocꞌ, junn̈ej tzꞌaj yicꞌjiel yedꞌ nocꞌ stut chiꞌ. 11 Slajvi chiꞌ, axo vin̈ sacerdote sn̈usantzꞌa juntzan̈ chiꞌ smasanil silabꞌoc dꞌa yichan̈ Jehová to icha junoc vael yaji.
12 Tato chiva nocꞌ tzeyacꞌ e silabꞌoc chiꞌ, tzeyicꞌcot nocꞌ dꞌa yichan̈ Jehová. 13 Axo mach ex tzeyacꞌ nocꞌ chiꞌ, tzeyacꞌqꞌue e cꞌabꞌ dꞌa sjolom nocꞌ, tze milancham nocꞌ dꞌa yichan̈ mantiado. Axo ebꞌ vin̈ sacerdote stzicanoch schiqꞌuil nocꞌ dꞌa schan̈il pacꞌan̈ altar.
14-15 A ex mach ex tzeyacꞌ junoc nocꞌ silabꞌ chiꞌ, tzeyiqꞌuel junoc macan̈ dꞌa nocꞌ, yic sn̈usjitzꞌa dꞌa yichan̈ Jehová, aton juntzan̈ tic: Masanil xepuꞌ ayoch dꞌa nocꞌ yol scꞌool, dꞌa spatictac sbꞌaquil yich spatic nocꞌ yedꞌ xepuꞌ ayoch dꞌa spatic seyubꞌ nocꞌ yedꞌ stut nocꞌ schabꞌil yedꞌ xepual. 16 Axo vin̈ sacerdote sn̈usantzꞌa juntzan̈ chiꞌ smasanil dꞌa yibꞌan̈ altar, icha junoc vael sn̈usjitzꞌaoc, sucꞌuqꞌui sjabꞌ syabꞌ Jehová.