2 Tato ay mach tzꞌoch smul, man̈ scꞌanoc scꞌool, scꞌulan tastac ay yovalil, ato aꞌ syal schecnabꞌil Jehová, yovalil scꞌanabꞌajej masanil juntzan̈ tastac ol val tic:

3 Tato a vin̈ sat sacerdote tzꞌoch smul ayic ayoch vin̈ dꞌa yopisio, a smul vin̈ chiꞌ tzꞌempax dꞌa yibꞌan̈ ebꞌ chon̈abꞌ, yovalil syacꞌ junoc nocꞌ quelem vacax vin̈ silabꞌoc dꞌa Jehová yuj smul chiꞌ. A nocꞌ vacax syacꞌ vin̈ chiꞌ, a nocꞌ malaj jabꞌoc spaltail. 4 Syicꞌancot nocꞌ vin̈ dꞌa yichan̈ mantiado bꞌaj schꞌox sbꞌa Jehová. Syacꞌanqꞌue scꞌabꞌ vin̈ dꞌa sjolom nocꞌ, smilancham nocꞌ vin̈ dꞌa yichan̈ Jehová. 5 A vin̈ tzꞌicꞌancot jabꞌoc schiqꞌuil nocꞌ syicꞌanoch vin̈ dꞌa yol mantiado chiꞌ. 6 Syaqꞌuem yiximal scꞌabꞌ vin̈ dꞌa scal schiqꞌuil nocꞌ chiꞌ. Uquel stziquem vin̈ dꞌa yichan̈ Jehová dꞌa yichan̈elta cꞌapac cortina ayoch bꞌaj ay lugar An̈ej Jehová Ay Yicoꞌ. 7 Sucanoch jabꞌoc schiqꞌuil nocꞌ chiꞌ vin̈ dꞌa schꞌac altar yic incienso ayoch dꞌa yichan̈ Jehová dꞌa yol mantiado. Axo masanil chicꞌ tzato can chiꞌ, seccanem vin̈ dꞌa yichtac yoc altar bꞌaj sn̈usjitzꞌa silabꞌ, aton jun ayem dꞌa yichan̈ mantiado chiꞌ.

8 Slajvi chiꞌ tzꞌicꞌjiel masanil xepuꞌ dꞌa nocꞌ yol scꞌool, 9 yedꞌ chabꞌ stut nocꞌ yedꞌ xepual yedꞌ pax masanil xepual sbꞌaquil yich spatic nocꞌ yedꞌ xepuꞌ ayoch dꞌa yibꞌan̈ seyubꞌ nocꞌ, 10 icha val tzꞌaj yicꞌjiel dꞌa nocꞌ vacax tzꞌacꞌji silabꞌoc yic schꞌoxan juncꞌolal yedꞌ Dios. Slajvi chiꞌ, sn̈usjitzꞌa dꞌa yibꞌan̈ altar.

11 Axo nocꞌ stzꞌumal, nocꞌ sbꞌacꞌchil, nocꞌ sjolom, nocꞌ xubꞌ, nocꞌ yoc, masanil nocꞌ yol scꞌool yedꞌ masanil schꞌan̈tzaꞌ nocꞌ, 12 syalelcꞌochi masanil nocꞌ silabꞌ chiꞌ, tzꞌicꞌjiel dꞌa junoc lugar to vachꞌ yaj dꞌa spatiquel campamento, aton bꞌaj secchajtaxonel qꞌuen ticꞌaqꞌuil taan̈. Ataꞌ sn̈usjitzꞌa nocꞌ dꞌa yibꞌan̈ teꞌ cꞌatzitz.

13 Tato co masanil a on̈ chon̈abꞌ israel on̈ tic tzꞌoch co mul, man̈ scꞌanoc co cꞌool, malaj pax junoc on̈ snachajel cuuj to man̈ ichoc yalan schecnabꞌil Jehová ix co cꞌulej, yuj chiꞌ tzꞌoch co mul, 14 ayic squilancot co bꞌa to ix och co mul, yovalil scacꞌ junoc nocꞌ quelem vacax silabꞌil co masanil yic tzꞌacꞌji tup co mul chiꞌ dꞌa quibꞌan̈. Squicꞌanbꞌat nocꞌ dꞌa yichan̈ mantiado bꞌaj schꞌox sbꞌa Jehová. 15 Ataꞌ syacꞌqꞌue scꞌabꞌ ebꞌ yichamtac vinaquil chon̈abꞌ dꞌa sjolom nocꞌ dꞌa yichan̈ Jehová, smiljicham nocꞌ taꞌ. 16 Axo vin̈ sat sacerdote tzꞌicꞌancot jabꞌoc schiqꞌuil nocꞌ chiꞌ dꞌa yol junoc yedꞌtal syicꞌanoch vin̈ dꞌa yol mantiado, 17 slabꞌanem yiximal scꞌabꞌ vin̈ dꞌa scal schiqꞌuil nocꞌ chiꞌ stzicanem uqueloc vin̈ dꞌa yichan̈ Jehová dꞌa yichan̈elta cꞌapac cortina. 18 Sucanecꞌ jabꞌoc schiqꞌuil nocꞌ chiꞌ vin̈ dꞌa schꞌac altar bꞌaj stzꞌa incienso, aton ayecꞌ dꞌa yichan̈ Jehová dꞌa yol mantiado chiꞌ. Axo jantacto schiqꞌuil nocꞌ tzato cani, stobꞌjicanecꞌ dꞌa yich yoc altar bꞌaj sn̈usjitzꞌa silabꞌ, aton jun ayecꞌ dꞌa yichan̈ mantiado chiꞌ. 19 Slajvi chiꞌ tzꞌicꞌjiel masanil xepual nocꞌ silabꞌ chiꞌ, sn̈usjitzꞌa dꞌa yibꞌan̈ altar. 20 Syalelcꞌochi, to icha val tzꞌaj nocꞌ quelem vacax syacꞌ vin̈ sat sacerdote yuj smul icha chiꞌ tzꞌajpax nocꞌ tzꞌacꞌji chiꞌ yuj smul ebꞌ anima smasanil. Icha chiꞌ syutej vin̈ sat sacerdote chiꞌ sbꞌoan silabꞌ yuj slajvicanel co mul dꞌa quibꞌan̈ a on̈ tic. 21 Slajvi chiꞌ tzꞌicꞌjiel nocꞌ silabꞌ chiꞌ dꞌa spatiquel campamento. Ataꞌ sn̈usjitzꞌa nocꞌ, icha val tzꞌutaj nocꞌ bꞌabꞌel quelem vacax chiꞌ, yujto a jun silabꞌ chiꞌ tzꞌacꞌji yuj yacꞌji lajvoc co mul co masanil.

22 Tato ay junoc vin̈ yajal tzꞌoch smul, man̈ scꞌanoc scꞌol vin̈ yic scꞌulan tastac to man̈ ichoctaꞌ yalan schecnabꞌil Jehová, 23 ayic snachajel yuj vin̈ to ix och smul vin̈, yovalil syicꞌcot junoc nocꞌ mam chiva vin̈ silabꞌil yuj smul ix och chiꞌ. A nocꞌ syicꞌcot vin̈ chiꞌ a nocꞌ malaj jabꞌoc spaltail. 24 Syacꞌqꞌue scꞌabꞌ vin̈ dꞌa sjolom nocꞌ, smilancham nocꞌ vin̈ dꞌa yichan̈ Jehová, aton bꞌaj smiljitaxon nocꞌ nocꞌ sn̈usjitzꞌa silabꞌil, yujto silabꞌ yuj smul vin̈ yaj nocꞌ. 25 Axo junoc vin̈ sacerdote tzꞌicꞌancot schiqꞌuil nocꞌ silabꞌ chiꞌ, sucanoch vin̈ dꞌa schꞌac altar bꞌaj sn̈usjitzꞌa silabꞌ, axo jantacto chicꞌ scani, stobꞌancanecꞌ vin̈ dꞌa yich yoc altar chiꞌ. 26 Sn̈usjitzꞌa smasanil xepual nocꞌ dꞌa yibꞌan̈ altar, icha val tzꞌaj silabꞌ tzꞌacꞌji yuj schꞌoxji juncꞌolal yedꞌ Dios. Icha chiꞌ syutej vin̈ sacerdote sbꞌoan jun silabꞌ chiꞌ yic tzꞌacꞌji tup smul jun vin̈ yajal dꞌa chon̈abꞌ chiꞌ.

27 Tato ay junoc comon anima tzꞌoch smul, man̈ scꞌanoc scꞌool yic scꞌulan tastac to man̈ ichoctaꞌ yalan schecnabꞌil Jehová, 28 ayic snachajel yuuj to ix och smul, yovalil syicꞌcot junoc nocꞌ nun chiva silabꞌil yuj smul ix och chiꞌ. A nocꞌ syicꞌcot chiꞌ, a nocꞌ malaj jabꞌoc spaltail. 29 Syacꞌqꞌue scꞌabꞌ dꞌa sjolom nocꞌ, slajvi chiꞌ smilancham nocꞌ bꞌaj smiljitaxoncham nocꞌ nocꞌ sn̈usjitzꞌa silabꞌil. 30 Axo junoc vin̈ sacerdote tzꞌicꞌancot schiqꞌuil nocꞌ, sucanoch vin̈ dꞌa schꞌac altar bꞌaj sn̈usjitzꞌa silabꞌ, axo jantacto schiqꞌuil nocꞌ scani, stobꞌancanecꞌ vin̈ dꞌa yich yoc altar chiꞌ. 31 Slajvi chiꞌ tzꞌicꞌjiel masanil xepual nocꞌ silabꞌ chiꞌ, icha val tzꞌaj yicꞌjiel yic nocꞌ silabꞌ tzꞌacꞌji yuj schꞌoxan sjuncꞌolal yedꞌ Dios. Sn̈usjitzꞌa xepual nocꞌ chiꞌ silabꞌil dꞌa yichan̈ Jehová to sucꞌuqꞌui sjabꞌ. Icha chiꞌ syutej vin̈ sacerdote sbꞌoan jun silabꞌ chiꞌ yic tzꞌacꞌji tup smul jun anima chiꞌ.

32 Tato a nocꞌ calnel syicꞌcot jun mach tzꞌacꞌan jun silabꞌ chiꞌ, a junoc nocꞌ snun malaj jabꞌoc spaltail syicꞌcoti. 33 Yovalil syacꞌqꞌue scꞌabꞌ dꞌa sjolom nocꞌ calnel chiꞌ, smilancham nocꞌ bꞌaj smiljitaxoncham nocꞌ nocꞌ sn̈usjitzꞌaoc. 34 Axo junoc vin̈ sacerdote tzꞌicꞌancot schiqꞌuil nocꞌ, sucanoch vin̈ dꞌa schꞌac altar bꞌaj sn̈usjitzꞌa silabꞌ, axo jantacto schiqꞌuil nocꞌ scani, stobꞌcanecꞌ vin̈ dꞌa yich yoc altar chiꞌ. 35 Slajvi chiꞌ tzꞌicꞌjiel masanil xepual nocꞌ silabꞌ chiꞌ, icha val tzꞌaj yicꞌjiel yic nocꞌ silabꞌ tzꞌacꞌji yuj schꞌoxan sjuncꞌolal yedꞌ Dios. Sn̈usjitzꞌa xepual nocꞌ chiꞌ dꞌa yibꞌan̈ altar, dꞌa yibꞌan̈ juntzan̈xo silabꞌ to stzꞌataxon dꞌa yichan̈ Jehová. Icha chiꞌ syutej jun vin̈ sacerdote sbꞌoan jun silabꞌ chiꞌ yic tzꞌacꞌji tup smul jun anima chiꞌ.