A juntzan̈ mul smoj yacꞌji silabꞌ yuuj
5
Qꞌuinaloc ay junoc mach tzꞌavtaj yuj yalani ma yacꞌan testigoal sbꞌa dꞌa junoc tas ix yilaꞌ, ma ix yabꞌi, palta tato max yalelta yuj tas ix yil chiꞌ, ma tas ix yabꞌ chiꞌ, a jun chiꞌ tzꞌoch smuloc scann̈ej dꞌa yibꞌan̈.2 An̈ejtonaꞌ tato ay junoc mach syaman junoc tas man̈ vachꞌoc icha yalan ley, tzꞌoch smul. Qꞌuinaloc suquecꞌ sbꞌa dꞌa snivanil junoc chamnac nocꞌ, vachꞌchom caltacteꞌal nocꞌ, ma molbꞌetzal nocꞌ, ma junoc nocꞌ tzꞌecꞌ n̈ern̈onoc, a junoc mach icha chiꞌ scꞌulej, man̈ vachꞌoc tzꞌaji. Tzꞌoch smul, vachꞌchom max yabꞌi tato ix suquecꞌ sbꞌa dꞌa nocꞌ chamnac nocꞌ chiꞌ.
3 Qꞌuinaloc ay mach syaman junoc tas tzꞌel dꞌa anima, man̈ vachꞌoc tzꞌajcan yuuj icha yalan ley, max nachajel yuj dꞌa jun rato chiꞌ, palta ayic snachajel yuuj, tzꞌoch jun chiꞌ smuloc.
4 Qꞌuinaloc ay junoc mach syacꞌ stiꞌ dꞌa yalxon̈ej tas lolonelal dꞌa elan̈chamel, tato max cham val snaani syacꞌan stiꞌ chiꞌ, max yaqꞌuelcꞌoch tas ix yal chiꞌ, palta ayic snachajel yuuj, toxo ix och juntzan̈ chiꞌ smuloc.
5 A mach tzꞌoch junoc smul dꞌa juntzan̈ tastac tic, yovalil scha smuloc, 6 syacꞌan junoc nocꞌ nun calnel silabꞌoc yuj smul ix och chiꞌ, ma junoc nocꞌ nun chiva. A jun silabꞌ chiꞌ, sn̈ustzꞌa vin̈ sacerdote yic slajvicanel smul jun anima chiꞌ.
7 Tato malaj stumin jun anima chiꞌ bꞌaj sman junoc nocꞌ calnel, ma junoc nocꞌ chiva chiꞌ, yovalil syicꞌcot chavan̈oc nocꞌ paramuch, yaln̈ej tas macan̈il dꞌa yichan̈ Jehová yuj smul ix och chiꞌ. Jun nocꞌ tzꞌoch yuj smul chiꞌ, junocxo nocꞌ sn̈usjitzꞌa smasanil silabꞌil. 8 Bꞌabꞌel sn̈usjitzꞌa nocꞌ tzꞌacꞌji yuj smul chiꞌ yuj vin̈ sacerdote, ton̈ej schꞌumjiel sjaj nocꞌ, palta max el-laj dꞌa juneln̈ej. 9 Slajvi chiꞌ, sucjioch jabꞌoc schiqꞌuil nocꞌ dꞌa spatictac altar, axo jantacto schiqꞌuil nocꞌ scani, tzꞌacꞌjicanoch dꞌa yich yoc altar chiꞌ, yujto silabꞌ yuj mul yaji. 10 Axo junxo nocꞌ schabꞌil chiꞌ, sn̈usjitzꞌa nocꞌ icha sleyal. Icha chiꞌ tzꞌaj sbꞌoan silabꞌ vin̈ sacerdote yuj slajvican smul jun anima chiꞌ.
11 Tato malaj stumin jun anima chiꞌ bꞌaj sman chavan̈oc nocꞌ paramuch chiꞌ, yovalil syicꞌcot chan̈eoc libra ixim harina te vachꞌ, max bꞌatlaj aceite yedꞌ incienso dꞌa scal, yujto ofrenda yuj mul yaji. 12 Yovalil syicꞌcot dꞌa vin̈ sacerdote, axo vin̈ tzꞌicꞌancot junoc bꞌechan̈ ixim harina chiꞌ yic stzꞌa dꞌa yibꞌan̈ altar yuj schꞌoxaneli to masanil jun ofrenda chiꞌ yic Jehová yaji. Sn̈usjitzꞌa dꞌa altar dꞌa yibꞌan̈ juntzan̈xo ofrenda van stzꞌa dꞌa yichan̈ Jehová. A jun ofrenda chiꞌ yuj mul tzꞌacꞌji. 13 Icha chiꞌ tzꞌaj sbꞌoan jun silabꞌ chiꞌ junoc vin̈ sacerdote yuj slajvicanel smul jun anima chiꞌ. A jantacto scani, yicxo vin̈ sacerdote chiꞌ, icha scꞌulej yedꞌ juntzan̈ vael tzꞌacꞌji dꞌa ofrendail, xchi vin̈aj Moisés chiꞌ.
A silabꞌ tzꞌacꞌji yuj stupchaj mul
14 Ix schec Jehová yal vin̈aj Moisés chiꞌ icha tic:
15 Qꞌuinaloc ay junoc mach max icꞌancot tastac yictaxon Jehová yaji, vachꞌchom man̈ scꞌanoc scꞌool tzꞌoch smul. A jun anima chiꞌ yovalil syicꞌcot junoc nocꞌ chꞌac calnel malaj jabꞌoc spaltail, syacꞌan nocꞌ silabꞌil dꞌa Jehová yuj smul chiꞌ. Yovalil snaji jantac stojol nocꞌ chꞌac calnel chiꞌ dꞌa qꞌuen plata, icha qꞌuen scꞌanchaj dꞌa scajnubꞌ Dios. 16 A jun anima chiꞌ yovalil stup tastac yictaxon Jehová yaj maj yicꞌcot chiꞌ, syacꞌan jabꞌocxo stojol dꞌa yibꞌan̈ juntzan̈ toxo ix yacꞌ chiꞌ dꞌa vin̈ sacerdote yedꞌ nocꞌ calnel tzꞌacꞌji dꞌa silabꞌil yuj smul chiꞌ. Icha chiꞌ tzꞌaj sbꞌoan silabꞌ jun vin̈ sacerdote yuj slajvicanel smul jun anima chiꞌ.
17 Qꞌuinaloc ay junoc mach tzꞌoch smul dꞌa checnabꞌil ix yacꞌ Jehová vachꞌchom man̈ scꞌanoc scꞌool, a jun chiꞌ ayxo och smuloc. 18 Yuj chiꞌ syicꞌcot junoc silabꞌ dꞌa junoc ebꞌ vin̈ sacerdote yic stupan smul chiꞌ. Syicꞌcot junoc nocꞌ chꞌac calnel malaj jabꞌoc spaltail. A vin̈ sacerdote chiꞌ snaani to cꞌocbꞌil syabꞌ stojol nocꞌ chiꞌ dꞌa icha val stojol tas stupchaj chiꞌ, an̈ejaꞌ vin̈ sbꞌoan jun silabꞌ chiꞌ. Icha chiꞌ tzꞌaj slajvicanel smul ix och chiꞌ. 19 Aton silabꞌ yuj stupchaj smul chiꞌ, yujto a jun anima chiꞌ ay smul dꞌa yichan̈ Jehová, xchi vin̈aj Moisés chiꞌ.