Silabꞌ yuj ixtoj anima
6
Ix schec Jehová yal vin̈aj Moisés chiꞌ icha tic:2 Qꞌuinaloc ay junoc mach tzꞌoch smul dꞌa yichan̈ Jehová, yic syixtan yetanimail dꞌa junoc tas scan abꞌenal dꞌay, ma syelqꞌuej junoc tasi, mato ton̈ej scꞌubꞌejeli, 3 mato sicꞌ junoc tasi stecꞌbꞌan sbꞌa yalani to malaj tas syilaꞌ, ma stecꞌbꞌan sbꞌa yalan junoc tas man̈ yeloc, ma scꞌulej junocxo chucal scꞌulej ebꞌ anima icha juntzan̈ tic, yovalil syacꞌ junoc silabꞌ. 4-5 Axo yic snachaji to ay smul dꞌa junoc juntzan̈ tic, yovalil syacꞌxi masanil stojol dꞌa mach ay yicoꞌ, syacꞌan jabꞌocxo stojol* dꞌa yibꞌan̈ juntzan̈ toxo ix yacꞌ chiꞌ dꞌa mach ay yicoꞌ. Syacꞌanpax junoc silabꞌ dꞌa Jehová yuj smul tzꞌoch chiꞌ. 6 A silabꞌ syacꞌ chiꞌ, aton junoc nocꞌ chꞌac calnel malaj jabꞌoc spaltail, ma a tumin icha stojol junoc nocꞌ chꞌac calnel chiꞌ tzꞌacꞌji dꞌa vin̈ sacerdote. 7 Axo vin̈ tzꞌacꞌanoch jun silabꞌ chiꞌ dꞌa yichan̈ Jehová yuj smul jun anima ix och chiꞌ, axo jun mul chiꞌ slajvicanel dꞌa yibꞌan̈, xchi vin̈aj Moisés chiꞌ.
A tas tzꞌaj yacꞌji silabꞌ sn̈usjitzꞌa smasanil
8 Ix schec Jehová yal vin̈aj Moisés chiꞌ icha tic:
9 Al dꞌa vin̈aj Aarón yedꞌ dꞌa ebꞌ yuninal yuj tas tzꞌaj yacꞌji jun silabꞌ to sn̈usjitzꞌa smasanil dꞌa junjun yemcꞌualil. A nocꞌ nocꞌ sn̈usjitzꞌa smasanil dꞌa silabꞌil chiꞌ, yovalil ayqꞌue nocꞌ dꞌa yibꞌan̈ cꞌacꞌ tzꞌecꞌ acꞌval yic stzꞌabꞌat nocꞌ. 10 Axo dꞌa junxo qꞌuin̈ibꞌalil, a junoc vin̈ sacerdote yovalil syacꞌoch junoc spichul vin̈ te vachꞌ yedꞌ yol svex to lino. Slajvi chiꞌ, smolanqꞌue stan̈il nocꞌ nocꞌ ix n̈usjitzꞌa dꞌa yibꞌan̈ altar chiꞌ vin̈, syacꞌanem vin̈ dꞌa stzꞌeybꞌat altar chiꞌ. 11 Slajvi chiꞌ, sqꞌuexanel spichul vin̈ chiꞌ, sbꞌat yacꞌancan stan̈il nocꞌ silabꞌ chiꞌ vin̈ dꞌa jun lugar sicꞌbꞌilel dꞌa spatiquel campamento. 12-13 A jun cꞌacꞌ ayoch dꞌa yibꞌan̈ altar chiꞌ, ayn̈ejocabꞌoch masanil tiempo, malajocabꞌ bꞌaqꞌuin̈ stupi. Yovalil tzꞌacꞌjioch teꞌ cꞌatzitz yuj ebꞌ sacerdote dꞌa junjun qꞌuin̈ibꞌalil, aton dꞌa yibꞌan̈ cꞌacꞌ chiꞌ tzꞌacꞌjiqꞌue nocꞌ silabꞌ stzꞌa dꞌa junjun qꞌuin̈ibꞌalil. Ataꞌ stzꞌapax xepual nocꞌ silabꞌ yic juncꞌolal.
A tas tzꞌaj yacꞌji tas svaji dꞌa ofrendail
14 A juntzan̈xo checnabꞌil tzꞌalji tic, aton tas tzꞌaj yacꞌji tas svaji dꞌa ofrendail: A vin̈ sacerdote tzꞌacꞌan dꞌa Jehová dꞌa yichan̈ altar, 15 syicꞌancot junoc bꞌechan̈ ixim harina yedꞌ aceite, junn̈ej tzꞌajbꞌat yedꞌ masanil incienso yic ofrenda chiꞌ, stzꞌa bꞌaj stzꞌataxon ofrenda, yuj schꞌoxani to a masanil jun ofrenda chiꞌ yic Jehová yaji, te sucꞌuqꞌui sjabꞌ syabꞌi. 16-17 Axo jantacto ofrenda chiꞌ scani, sbꞌolchaji, malaj yich pan sbꞌat dꞌa scal. Sva ebꞌ vin̈ sacerdote dꞌa junoc lugar to yic Jehová yaji, aton dꞌa yamaqꞌuil mantiado bꞌaj schꞌox sbꞌa Jehová. A juntzan̈ ofrenda chiꞌ, yicn̈ej Jehová yaji, icha yaj silabꞌ yuj yacꞌji lajvoc mul, icha pax yaj silabꞌ yuj stupchaj mul. Ix yacꞌcan juntzan̈ ofrenda tic Jehová dꞌa ebꞌ sacerdote dꞌa scal juntzan̈ ofrenda tzꞌacꞌji dꞌay to sn̈usjitzꞌa dꞌa yibꞌan̈ altar. 18 A sleyal jun ofrenda chiꞌ ol cann̈ej dꞌa masanil tiempo. A ofrenda to yic Jehová yaji, sn̈usjitzꞌaoc, syaln̈ej svaan masanil ebꞌ vinac dꞌa yin̈tilal vin̈aj Aarón. Yaln̈ej tastac tzꞌoch tennaj dꞌa juntzan̈ ofrenda chiꞌ yic Jehová tzꞌajcani, xchi vin̈aj Moisés chiꞌ.
A yofrenda ebꞌ sacerdote
19 Ix checji yal vin̈aj Moisés chiꞌ yuj Jehová icha tic:
20 Aton jun ofrenda tic yovalil syacꞌ vin̈aj Aarón yedꞌ ebꞌ yuninal dꞌa Jehová, dꞌa scꞌual sicꞌchajoch ebꞌ dꞌa sacerdoteal: Chan̈eꞌ libra ixim harina te vachꞌ, yujto ofrenda tzꞌacꞌji dꞌa tas svaji. Nan̈al tzꞌacꞌji dꞌa qꞌuin̈ibꞌalil, axo nan̈alxo, a dꞌa yemcꞌualil tzꞌacꞌji dꞌa jun cꞌu chiꞌ. 21 A dꞌa yol junoc xalten sbꞌoji jun ofrenda chiꞌ, vachꞌ tzꞌaj scꞌanbꞌi dꞌa scal aceite, slajvi chiꞌ spojchaji, tzꞌacꞌji dꞌa ofrendail to sucꞌuqꞌui sjabꞌ syabꞌ Jehová. 22 Icha chiꞌ ol yutejn̈ej junjun yin̈tilal vin̈aj Aarón ol laj ochn̈ej sqꞌuexuloc dꞌa sacerdoteal. Yicn̈ej Jehová yaj jun ofrenda chiꞌ, yuj chiꞌ sn̈usjitzꞌa smasanil dꞌa yichan̈. 23 Masanil ofrenda syacꞌ ebꞌ sacerdote dꞌa tas svaji, yovalil sn̈usjitzꞌa smasanil. Malaj junoc mach syal svaani, xchi vin̈aj Moisés chiꞌ.
A sleyal silabꞌ yuj yacꞌji tup mul
24 Ix lolon Jehová dꞌa vin̈aj Moisés chiꞌ, ix yalani:
25 Al masanil juntzan̈ cꞌaybꞌubꞌal tic dꞌa vin̈aj Aarón yedꞌ dꞌa ebꞌ yuninal, yuj tas tzꞌaj sn̈usjitzꞌa silabꞌ yuj yacꞌji tup mul: A junoc nocꞌ silabꞌ tzꞌacꞌji yuj mul chiꞌ, yovalil smiljicham nocꞌ dꞌa yichan̈ Jehová, dꞌa jun lugar bꞌajtaxon smiljicham nocꞌ sn̈usjitzꞌaoc. A jun silabꞌ chiꞌ yic Jehová yaji. 26 A vin̈ sacerdote tzꞌacꞌan jun silabꞌ yuj yacꞌji tup mul chiꞌ, syal schiꞌan vin̈ dꞌa jun lugar yic Jehová yaji, aton dꞌa yamaqꞌuil mantiado bꞌaj schꞌox sbꞌa Jehová. 27 Yaln̈ej tastac tzꞌoch tennaj dꞌa nocꞌ chibꞌej chiꞌ yic Jehová tzꞌajcani. Tato tzꞌoch tzitnaj schiqꞌuil nocꞌ dꞌa junoc pichul, yovalil sjucꞌjiel dꞌa junoc lugar to yic Jehová yaji. 28 An̈ejaꞌ lum chen bꞌaj stzꞌan̈ji nocꞌ silabꞌ chiꞌ, yovalil smacꞌjipoj luum, palta ta a dꞌa yol junoc chen bronce stzꞌan̈ji, an̈ej to sn̈icjiel smical, vachꞌ tzꞌaj sbꞌicchaji.