A sleyal silabꞌ yuj stupchaj mul
7
Yic Jehová yaj silabꞌ tzꞌacꞌji yuj stupchaj mul. Aton val checnabꞌil yuj tas tzꞌaj yacꞌji tic: 2 A junoc nocꞌ nocꞌ tzꞌacꞌji yuj stupchaj mul, yovalil smiljicham nocꞌ bꞌaj schamtaxon nocꞌ sn̈usjitzꞌaoc, axo schiqꞌuil nocꞌ stzicjioch dꞌa schan̈il pacꞌan̈ altar. 3 Tzꞌacꞌji masanil xepual nocꞌ, aton xepuꞌ ayoch dꞌa nocꞌ sn̈e, dꞌa nocꞌ yol scꞌool, 4 yedꞌ nocꞌ stut schabꞌil yedꞌ xepuꞌ ayoch dꞌa yich spatic nocꞌ yedꞌ pax xepuꞌ ayoch dꞌa yibꞌan̈ seyubꞌ nocꞌ, junn̈ej tzꞌaj yel yedꞌ nocꞌ stut chiꞌ. 5 Axo junoc ebꞌ sacerdote sn̈usantzꞌa juntzan̈ chiꞌ dꞌa yibꞌan̈ altar silabꞌil to sn̈usjitzꞌa dꞌa yichan̈ Jehová yuj stojoloc mul. 6 Yaln̈ej mach ebꞌ vinac dꞌa yin̈tilal ebꞌ sacerdote syal schiꞌan jun silabꞌ chiꞌ, palta an̈ej dꞌa jun lugar to yic Jehová yaji, yujto a jun chiꞌ nivan yelcꞌochi.7 A checnabꞌil yuj silabꞌ yic stupchaj mul, lajann̈ej yedꞌ yic silabꞌ tzꞌacꞌji yuj mul. A nocꞌ chibꞌej yic juntzan̈ silabꞌ chiꞌ, scan yicoc vin̈ sacerdote ix acꞌanoch dꞌa yichan̈ Jehová. 8 An̈ejton pax aꞌ stzꞌumal jun nocꞌ silabꞌ stzꞌa syacꞌ ebꞌ anima chiꞌ, yic vin̈ sacerdote chiꞌ tzꞌajcani. 9 Icha pax chiꞌ masanil ofrenda scꞌanbꞌi dꞌa horno, ma dꞌa yol xalten, ma staji dꞌa yoltac nivac chen, yicn̈ej jun vin̈ sacerdote tzꞌacꞌanoch jun ofrenda chiꞌ dꞌa yichan̈ Jehová. 10 Icha chiꞌ tzꞌaj yacꞌji masanil ofrenda tzꞌacꞌji dꞌa tas svaji, icha ixim trigo jaxbꞌil calabꞌil yedꞌ aceite, mato cꞌanbꞌinac. A juntzan̈ chiꞌ yicn̈ej ebꞌ yin̈tilal vin̈aj Aarón, lajann̈ej tzꞌaj spucanecꞌ ebꞌ dꞌa spatic.
A sleyal silabꞌ yic juncꞌolal
11 Aton val sleyal tas tzꞌaj yacꞌji silabꞌ dꞌa yichan̈ Jehová schꞌoxan juncꞌolal yedꞌoc: 12 Tato a junoc nocꞌ silabꞌ chiꞌ tzꞌacꞌji yuj acꞌoj yuj diosal, tzꞌacꞌjipax ixim pan malaj yich, scalaj yedꞌ aceite yedꞌ cꞌoxox pan tzꞌoch aceite dꞌay to malaj pax yich yedꞌ juntzan̈ pan bꞌobꞌil dꞌa ixim harina te vachꞌ calabꞌil yedꞌ aceite. 13 A yedꞌ jun silabꞌ chiꞌ, tzꞌacꞌjipax ixim pan ay yich. 14 Tzꞌicꞌjiel junoc pan, tzꞌacꞌjioch dꞌa yichan̈ Jehová. Slajvi chiꞌ scan jun pan chiꞌ dꞌa yol scꞌabꞌ vin̈ sacerdote, aton vin̈ stzicanem schiqꞌuil nocꞌ silabꞌ chiꞌ.
15 A nocꞌ nocꞌ tzꞌacꞌji silabꞌil yic schꞌoxan juncꞌolal yedꞌ Dios yuj acꞌoj yuj diosal, a dꞌa jun cꞌual tzꞌacꞌji nocꞌ chiꞌ schijicanbꞌati, man̈xa jabꞌoc nocꞌ sicꞌjicanbꞌat dꞌa junxo cꞌu. 16 A pax tato a jun silabꞌ tzꞌacꞌji yujto yacꞌnac stiꞌ mach yacꞌani, ma ton̈ej tzꞌel dꞌa scꞌol yacꞌani, a juntzan̈ chiꞌ schiji dꞌa jun cꞌual chiꞌ, tato ayto nocꞌ scani, syal schiji dꞌa junxo cꞌu. 17 Palta tato ayto nocꞌ dꞌa schabꞌjial, ataꞌ yovalil sn̈usjitzꞌa nocꞌ. 18 Tato ay mach schiꞌan jun nocꞌ silabꞌ chiꞌ dꞌa schabꞌjial, a jun silabꞌ chiꞌ maxtzac chajilaj, maxtzac ochpaxlaj yopisio. A jun chiꞌ man̈ vachꞌoc tzꞌajcan dꞌa yol sat Jehová. Yuj chiꞌ a mach schiꞌan jun chiꞌ, scan jun mul chiꞌ dꞌa yibꞌan̈.
19 Tato ay nocꞌ chibꞌej yic junoc silabꞌ tic tzꞌoch tennaj dꞌa junoc tas man̈ vachꞌoc yaj icha yalan ley, maxtzac yal-laj schiji nocꞌ, palta to sn̈usjitzꞌa nocꞌ.
A mach vachꞌ yaj icha yalan ley, syal schiꞌan juntzan̈ silabꞌ chiꞌ.
20-21 A junoc anima man̈ vachꞌoc yaj icha yalan ley, yujto ix syam junoc tas to man̈ vachꞌoc, vachꞌchom dꞌa anima scoti, ma junoc nocꞌ nocꞌ, ma junocxo tas man̈ vachꞌoc, tato a jun anima chiꞌ schiꞌanpax nocꞌ silabꞌ yic juncꞌolal to yic Jehová yaji, a jun anima chiꞌ, man̈xaocabꞌ yalan yic dꞌa co cal, xchi vin̈aj Moisés chiꞌ.
A sleyal dꞌa nocꞌ xepuꞌ yedꞌ dꞌa chicꞌ
22 Ix yalanxi Jehová dꞌa vin̈aj Moisés chiꞌ icha tic:
23 Al masanil juntzan̈ tic dꞌa ebꞌ etchon̈abꞌ: Max yal-laj e chiꞌan xepual nocꞌ nocꞌ, nocꞌ vacax, nocꞌ calnel, ma nocꞌ chiva, 24 yedꞌ pax xepual nocꞌ nocꞌ ton̈ej syacꞌcham sbꞌa, ma nocꞌ smiljicham yuj nocꞌ caltacteꞌal nocꞌ. Syal scꞌanchaj dꞌa junocxo tasi, palta max yal-laj schiji.
25 Yaln̈ej mach schiꞌan xepual nocꞌ nocꞌ to syal sn̈usjitzꞌa dꞌa ofrendail dꞌa Jehová, man̈xaocabꞌ yalan yic dꞌa co cal.
26 Yaln̈ej bꞌajtil ayex eqꞌui, max yal tze chiꞌ schiqꞌuil nocꞌ nocꞌ, aton nocꞌ nivac nocꞌ yedꞌ nocꞌ much. 27 A junoc anima schiꞌan schiqꞌuil nocꞌ nocꞌ chiꞌ, man̈xaocabꞌ yalan yic dꞌa co cal, xa chi, xchi Jehová.
A tas syicꞌ ebꞌ sacerdote
28 Ix yalanxi Jehová dꞌa vin̈aj Moisés chiꞌ icha tic:
29 Al jun checnabꞌil tic dꞌa ebꞌ etchon̈abꞌ: A junoc mach tzꞌacꞌan junoc silabꞌ yic schꞌoxan sjuncꞌolal yedꞌ Jehová, yovalil syicꞌcot dꞌa yichan̈. 30 A tzꞌicꞌancot jabꞌoc nocꞌ sn̈usjitzꞌa dꞌa yichan̈, aton xepual nocꞌ yedꞌ nocꞌ sn̈iꞌ scꞌool. A nocꞌ sn̈iscꞌol chiꞌ sbꞌachchajoch dꞌa yichan̈ Jehová. 31 A nocꞌ xepuꞌ chiꞌ sn̈usjitzꞌa dꞌa altar yuj junoc sacerdote, axo nocꞌ sn̈iꞌ scꞌool, yic vin̈aj Aarón yedꞌ ebꞌ yuninal yaj nocꞌ. 32-33 A xubꞌ nocꞌ silabꞌ chiꞌ dꞌa svachꞌ yic vin̈ sacerdote tzꞌacꞌan schiqꞌuil nocꞌ yedꞌ xepual nocꞌ dꞌa silabꞌil yuj juncꞌolal. 34 A nocꞌ sn̈iꞌ scꞌool sbꞌachchajecꞌ dꞌa yichan̈ Jehová yedꞌ nocꞌ xubꞌ dꞌa svachꞌ, a Jehová chiꞌ tzꞌacꞌan nocꞌ dꞌa vin̈aj Aarón yedꞌ dꞌa ebꞌ yin̈tilal dꞌa masanil tiempo. A juntzan̈ chiꞌ yicn̈ej ebꞌ yaj dꞌa nocꞌ silabꞌ yic juncꞌolal syacꞌ ebꞌ israel chiꞌ.
35 A dꞌa nocꞌ silabꞌ sn̈usjitzꞌa dꞌa yichan̈ Jehová, yacꞌnac nocꞌ sn̈iꞌ scꞌool yedꞌ nocꞌ xubꞌ dꞌa vin̈aj Aarón yedꞌ dꞌa ebꞌ yin̈tilal, atax dꞌa scꞌual a ix sicꞌchajcanoch ebꞌ dꞌa sacerdoteal. 36 Atax dꞌa jun cꞌu chiꞌ yalnaccani to yovalil tzꞌacꞌji juntzan̈ chiꞌ dꞌa ebꞌ. A jun checnabꞌil tic, yovalil sco cꞌanabꞌajej dꞌa masanil tiempo yedꞌ ebꞌ quin̈tilal dꞌa bꞌaqꞌuin̈.
37 Ichaton tic sleyal masanil juntzan̈ silabꞌ tzꞌacꞌji dꞌa Dios: Aton silabꞌ sn̈usjitzꞌa smasanil, ofrenda tzꞌacꞌji dꞌa tas svaji, silabꞌ tzꞌacꞌji yuj mul yedꞌ pax yuj stupchaj mul yedꞌ junoc mach tzꞌochcan yicoc Dios yedꞌ silabꞌ schꞌoxan juncꞌolal yedꞌ Dios. 38 A juntzan̈ ley tic ix yacꞌ Jehová dꞌa vin̈aj Moisés dꞌa jolom vitz Sinaí dꞌa tzꞌinan luum, aton val dꞌa jun cꞌu chiꞌ ix alchaji, to ol yacꞌ silabꞌ ebꞌ israel dꞌa Jehová.