2 Icꞌcot vin̈aj Aarón yedꞌ ebꞌ yuninal, tzicꞌanpaxcot spichul ebꞌ syacꞌoch dꞌa yopisio dꞌa sacerdoteal. Tzicꞌpaxcot aceite scꞌanchaji a sicꞌchajcanoch ebꞌ dꞌa yopisio chiꞌ. Tzicꞌpaxcot junoc nocꞌ quelem vacax ol acꞌchaj silabꞌil yuj mul yedꞌ chavan̈oc nocꞌ chꞌac calnel yedꞌ junoc yuneꞌ mooch ixim pan malaj yich. 3 Tza molbꞌan ebꞌ etchon̈abꞌ smasanil dꞌa stiꞌ mantiado bꞌaj tzin chꞌox in bꞌa, xchi dꞌa vin̈.

4 Ix scꞌanabꞌajej vin̈aj Moisés chiꞌ icha val ix aj yalan Jehová, ix molchaj anima smasanil dꞌa stiꞌ mantiado chiꞌ. 5 Ix yalan vin̈ dꞌa ebꞌ icha tic: Aton juntzan̈ tic ix yal Jehová to ol co cꞌulej, xchi vin̈.

6 Ix lajvi chiꞌ ix yalan vin̈ to snitzcot sbꞌa vin̈aj Aarón yedꞌ ebꞌ yuninal dꞌa stzꞌey. Ix bꞌicjiel ebꞌ yuj vin̈. 7 Ix lajvi chiꞌ, ix acꞌjioch scamix vin̈aj Aarón chiꞌ yedꞌ stzecꞌul yuj vin̈ yedꞌ pax cꞌapac pichul jucan, cꞌapac chaleca yedꞌ cꞌapac stzecꞌul tzꞌisbꞌiloch yelvanubꞌ. 8 Axo dꞌa spatic cꞌapac chiꞌ, ix yacꞌpaxoch jun cꞌapac smacul sn̈iscꞌol vin̈, a dꞌa yol cꞌapac chiꞌ ix yacꞌoch qꞌuen Urim vin̈ yedꞌ qꞌuen Tumim. 9 Ix lajvi chiꞌ ix acꞌjiqꞌue scꞌox vin̈, aton jun cꞌapac ix bꞌacꞌjioch dꞌa sjolom vin̈. Axo dꞌa snan̈al sat vin̈, ix acꞌjioch jun qꞌuen yelvanubꞌ nabꞌa oro, aton schꞌoxani to sicꞌbꞌiloch vin̈ dꞌa sacerdoteal, icha val ix aj yalan Jehová.

10 Ix lajvi chiꞌ ix yicꞌanchaan̈ aceite vin̈aj Moisés chiꞌ, aton scꞌanchaji a sicꞌchajoch junoc mach, ma junoc tas tzꞌochcan yicoc Jehová. Ix stzicanem vin̈ dꞌa yibꞌan̈ scajnubꞌ Jehová yedꞌ dꞌa yibꞌan̈ masanil tastac ayoch dꞌa yool chiꞌ. Icha val chiꞌ ix aj yochcan masanil tastac chiꞌ yicoc Jehová. 11 An̈ejaꞌ jun aceite chiꞌ, ix tzicjiem uquel dꞌa yibꞌan̈ altar yedꞌ dꞌa yibꞌan̈ masanil syamcꞌabꞌil, dꞌa yibꞌan̈ jun nivan palangana yedꞌ sbꞌachnubꞌ yich. Icha chiꞌ ix aj yochcan yicoc Jehová.

12 Ix lajvi chiꞌ ix yacꞌanpaxqꞌue aceite vin̈aj Moisés dꞌa sjolom vin̈aj Aarón yuj yochcan vin̈ yicoc Jehová. 13 Ix yicꞌanpaxcot ebꞌ yuninal vin̈aj Aarón chiꞌ vin̈ dꞌa stzꞌey. Ix acꞌjioch spichul ebꞌ jucan, stzecꞌul ebꞌ yedꞌ scꞌox ebꞌ yuj vin̈, icha val ix aj yalan Jehová.

14 Ix lajvi chiꞌ, ix yicꞌancot nocꞌ quelem vacax vin̈, nocꞌ ol och dꞌa silabꞌil yuj mul. A vin̈aj Aarón yedꞌ ebꞌ yuninal, ix yacꞌqꞌue scꞌabꞌ ebꞌ dꞌa sjolom nocꞌ. 15 Ix lajvi chiꞌ ix smilancham nocꞌ vin̈. Ix yicꞌanbꞌat schiqꞌuil nocꞌ vin̈, ix sucanoch vin̈ yedꞌ yiximal scꞌabꞌ dꞌa schꞌac altar ayqꞌue dꞌa schiquintac schan̈il, yic vachꞌ chabꞌil yuj Dios. Axo jantacto chicꞌ ixto can chiꞌ, ix stobꞌcanem vin̈ dꞌa yichtac altar chiꞌ. Icha chiꞌ ix aj yochcan yicoc Jehová, yic vachꞌ slajvicanel chucal taꞌ.

16 Ix lajvi chiꞌ ix yicꞌanelta masanil xepual nocꞌ vin̈ ayoch dꞌa nocꞌ yol scꞌool yedꞌ dꞌa yibꞌan̈ seyubꞌ nocꞌ, nocꞌ stut schabꞌil yedꞌ xepual ayoch dꞌay. Masanil juntzan̈ chiꞌ ix sn̈ustzꞌa vin̈ dꞌa yibꞌan̈ altar. 17 Axo jantacto nocꞌ vacax chiꞌ ix cani, aton stzꞌumal nocꞌ yedꞌ sbꞌacꞌchil nocꞌ yedꞌ schꞌan̈tzaꞌ nocꞌ, ix acꞌchajcanoch scꞌacꞌal dꞌa spatiquelta campamento, icha ix aj yalan Jehová.

18 Ix yacꞌanpax icꞌjoccot nocꞌ calnel vin̈ sn̈usjitzꞌa smasanil silabꞌil. Axo vin̈aj Aarón yedꞌ ebꞌ yuninal chiꞌ, ix yacꞌqꞌue scꞌabꞌ ebꞌ dꞌa sjolom nocꞌ. 19 Ix lajvi chiꞌ ix smilancham nocꞌ vin̈aj Moisés chiꞌ, ix stzicanoch schiqꞌuil nocꞌ vin̈ dꞌa schan̈il pacꞌan̈ altar. 20 Ix scotac xiquej nocꞌ vin̈, ix sn̈usantzꞌa sjolom nocꞌ vin̈ yedꞌ nocꞌ chocꞌ yaj chiꞌ yedꞌ sxepual nocꞌ. 21 Ix lajvi chiꞌ ix smaxan nocꞌ yol scꞌool vin̈ yedꞌ nocꞌ yoc. Ix sn̈usantzꞌa nocꞌ vin̈ smasanil silabꞌil dꞌa yibꞌan̈ altar. A jun ofrenda chiꞌ te sucꞌuqꞌui sjabꞌ ix yabꞌ Jehová, icha val ix aj yalani.

22 Ix lajvi chiꞌ ix yacꞌan icꞌjoccot junxo nocꞌ chꞌac calnel vin̈ yic scꞌanchaji yic tzꞌochcan ebꞌ dꞌa yopisio. Axo vin̈aj Aarón yedꞌ ebꞌ yuninal chiꞌ, ix yacꞌqꞌue scꞌabꞌ ebꞌ dꞌa sjolom nocꞌ. 23 Ix lajvi chiꞌ, ix smilancham nocꞌ vin̈, ix yicꞌanbꞌat jabꞌoc schiqꞌuil nocꞌ vin̈, ix sucanoch vin̈ dꞌa sjayil schiquin vin̈aj Aarón dꞌa svachꞌ, dꞌa smam scꞌabꞌ vin̈ dꞌa svachꞌ yedꞌ dꞌa yiximal smam yoc vin̈ dꞌa svachꞌ. 24 Ix lajvi chiꞌ ix yalan vin̈ to snitzcot sbꞌa ebꞌ yuninal vin̈aj Aarón chiꞌ dꞌa stzꞌey, ix yacꞌanpaxoch schiqꞌuil nocꞌ chiꞌ vin̈ dꞌa sjayil schiquin ebꞌ dꞌa svachꞌ yedꞌ dꞌa smam scꞌabꞌ ebꞌ dꞌa svachꞌ yedꞌ dꞌa yiximal smam yoc ebꞌ dꞌa svachꞌ. Ix lajvi chiꞌ ix stzicanoch vin̈ jantacto chicꞌ ixto can dꞌa schan̈il pacꞌan̈ altar.

25 Ix lajvi chiꞌ ix yicꞌanelta xepuꞌ vin̈ ayoch dꞌa nocꞌ sn̈e yedꞌ ayoch dꞌa nocꞌ yol scꞌool, xepuꞌ ayoch dꞌa yibꞌan̈ seyubꞌ nocꞌ yedꞌ nocꞌ stut schabꞌil yedꞌ xepuꞌ ayoch dꞌay yedꞌ nocꞌ xubꞌ dꞌa svachꞌ. 26 Ix yicꞌancot jun yuneꞌ mooch ixim pan vin̈ malaj yich, ix yacꞌoch vin̈ dꞌa yichan̈ Jehová. Ix yicꞌanqꞌueta jun ixim pan chiꞌ vin̈ dꞌa yol mooch chiꞌ yedꞌ junxo ixim calabꞌil yedꞌ aceite yedꞌ jun ixim cꞌoxox bꞌobꞌil dꞌa ixim harina, ix yacꞌanqꞌue vin̈ dꞌa yibꞌan̈ nocꞌ xepuꞌ chiꞌ yedꞌ dꞌa yibꞌan̈ nocꞌ xubꞌ dꞌa svachꞌ. 27 Ix lajvi chiꞌ ix yacꞌan masanil juntzan̈ tic vin̈ dꞌa yol scꞌabꞌ vin̈aj Aarón yedꞌ ebꞌ yuninal, yic sbꞌachanecꞌ ebꞌ dꞌa yichan̈ Jehová. 28 Ix lajvi chiꞌ ix yicꞌanpaxecꞌ masanil juntzan̈ chiꞌ vin̈ dꞌa yol scꞌabꞌ ebꞌ, ix sn̈usantzꞌa vin̈ smasanil dꞌa yibꞌan̈ altar yedꞌ nocꞌ silabꞌ ix n̈usjitzꞌa dꞌa yichan̈ Jehová, yuj sicꞌchajoch ebꞌ dꞌa yopisio. Te sucꞌuqꞌui sjabꞌ ix yabꞌ Jehová.

29 Ix yicꞌanpaxcot sn̈iscꞌol nocꞌ calnel vin̈ ix acꞌji yuj sicꞌchajcanoch ebꞌ dꞌa yopisio. Ix sbꞌachanoch ebꞌ dꞌa yichan̈ Jehová. A jun chiꞌ ix yicꞌcan vin̈aj Moisés chiꞌ icha ix aj yalan Jehová.

30 Ix lajvi chiꞌ, ix yicꞌancot aceite vin̈ yedꞌ chicꞌ ayecꞌ dꞌa yibꞌan̈ altar. Ix stzicanqꞌue vin̈ dꞌa yibꞌan̈ vin̈aj Aarón yedꞌ dꞌa spichul. Ix tzicanpaxqꞌue vin̈ dꞌa yibꞌan̈ ebꞌ yuninal vin̈aj Aarón chiꞌ yedꞌ dꞌa spichul ebꞌ. Icha chiꞌ ix aj yochcan ebꞌ yicoc Jehová yedꞌ spichul smasanil.

31 Ix yalan vin̈ dꞌa vin̈aj Aarón yedꞌ dꞌa ebꞌ yuninal chiꞌ: Tzꞌan̈jocabꞌ nocꞌ chibꞌej dꞌa yichan̈ mantiado bꞌaj schꞌox sbꞌa Jehová. Ataꞌ tze chi nocꞌ yedꞌ ixim pan ayem dꞌa yol jun yuneꞌ mooch, aton ixim ix acꞌji yic tzex ochcan dꞌa eyopisio. Icha ix aj valani: A vin̈aj Aarón yedꞌ ebꞌ yuninal ol sva jun vael tic ebꞌ, xin chi, ix valani. 32 A jantacto man̈ ol lajvoc nocꞌ chibꞌej chiꞌ yedꞌ ixim pan chiꞌ eyuuj, ol e n̈uscantzꞌaoc. 33 A dꞌa yichan̈ cꞌapac mantiado bꞌaj schꞌox sbꞌa Jehová, an̈ej taꞌ tzex aj uqueoc cꞌual masanto scꞌoch scꞌual eyochcan dꞌa eyopisio.

34 A ticnaic toxo ix bꞌo icha val ix aj schecan Jehová co cꞌulej yic slajvicanel e mul. 35 Yuj chiꞌ a dꞌa yichan̈ mantiado, ataꞌ tzex can uqueoc cꞌual yedꞌ uqueoc acꞌval. Tze cꞌanabꞌajan masanil juntzan̈ schecnabꞌil Jehová yic vachꞌ max ex chami, yujto icha chiꞌ ix aj yalan Jehová chiꞌ dꞌayin, xchi vin̈ dꞌa ebꞌ.

36 Icha chiꞌ ix aj scꞌanabꞌajan vin̈aj Aarón yedꞌ ebꞌ yuninal masanil tas ix schec Jehová yal vin̈aj Moisés chiꞌ dꞌa ebꞌ.