2 Ix yalan vin̈ dꞌa vin̈aj Aarón chiꞌ: Icꞌcot junoc nocꞌ quelem vacax yic tzꞌoch nocꞌ silabꞌil yuj a mul yedꞌ junoc nocꞌ chꞌac calnel, aton nocꞌ malaj jabꞌoc spaltail. Tza n̈ustzꞌa smasanil silabꞌil uuj, tzacꞌoch nocꞌ dꞌa yichan̈ Jehová.

3 Alpax dꞌa ebꞌ quetisraelal to syicꞌcot junoc nocꞌ mam chiva ebꞌ silabꞌil yuj smul. Syicꞌanpaxcot junoc nocꞌ quelem vacax ebꞌ yedꞌ junoc nocꞌ calnel, yuj sn̈usjitzꞌa nocꞌ smasanil silabꞌil, jun abꞌil sqꞌuinal junjun nocꞌ, malajocabꞌ jabꞌoc spaltail nocꞌ. 4 Syicꞌanpaxcot junoc nocꞌ vacax ebꞌ yedꞌ junoc nocꞌ chꞌac calnel smiljicham dꞌa yichan̈ Jehová silabꞌil yic schꞌoxan sjuncꞌolal ebꞌ yedꞌoc. Syicꞌanpaxcot junoc ofrenda ebꞌ dꞌa tas svaji, calabꞌil yedꞌ aceite, yujto ol schꞌox sbꞌa Jehová dꞌayex ticnaic, xchi vin̈aj Moisés chiꞌ.

5 Ix yicꞌancot ebꞌ dꞌa yichan̈ mantiado masanil tastac ix checji yicꞌcot yuj vin̈aj Moisés chiꞌ. Masanil chon̈abꞌ ix javi molan, ix och lin̈jabꞌ ebꞌ dꞌa yichan̈ Jehová. 6 Axo ix yalan vin̈aj Moisés chiꞌ dꞌa ebꞌ icha tic: Aton val juntzan̈ tic schec Jehová e cꞌulej yic vachꞌ ol schꞌox val stziquiquial dꞌayex, xchi vin̈.

7 Ix lajvi chiꞌ, ix yalanxi vin̈ dꞌa vin̈aj Aarón chiꞌ: Nitzcot a bꞌa dꞌa slacꞌanil altar tic, tzacꞌan nocꞌ nocꞌ silabꞌoc yuj a mul yedꞌ nocꞌ silabꞌ sn̈usjitzꞌa smasanil. Icha chiꞌ ol aj yacꞌji lajvoc a mul. Tzacꞌanpax nocꞌ silabꞌ yuj yacꞌji lajvoc co mul a on̈ israel on̈ tic, icha val ix aj yalan Jehová, xchi vin̈.

8 Yuj chiꞌ ix javi vin̈aj Aarón dꞌa slacꞌanil altar chiꞌ, ix smilancham nocꞌ quelem vacax ix yacꞌ vin̈ silabꞌil yuj smul chiꞌ. 9 Ix lajvi chiꞌ ix japax ebꞌ yuninal vin̈ yedꞌ schiqꞌuil nocꞌ silabꞌ chiꞌ, ix yacꞌanem yiximal scꞌabꞌ vin̈ dꞌa scal chicꞌ chiꞌ, ix sucanoch vin̈ dꞌa schꞌac altar chiꞌ. Axo jabꞌocxo chicꞌ ixto can chiꞌ, ix seccanem vin̈ dꞌa yich altar chiꞌ. 10 Ix lajvi chiꞌ ix sn̈usantzꞌa smasanil xepual nocꞌ vin̈ dꞌa yibꞌan̈ altar yedꞌ pax stut nocꞌ yedꞌ xepual ayoch dꞌa yibꞌan̈ seyubꞌ nocꞌ, aton nocꞌ silabꞌ yuj mul, icha ix aj yalan Jehová dꞌa vin̈aj Moisés chiꞌ. 11 Axo pax sbꞌacꞌchil nocꞌ yedꞌ stzꞌumal, ix n̈usjitzꞌa dꞌa spatiquel campamento.

12 Ix smilanpaxcham nocꞌ silabꞌ vin̈aj Aarón chiꞌ, nocꞌ sn̈usjitzꞌa smasanil, axo ebꞌ yuninal vin̈ ix icꞌancot schiqꞌuil nocꞌ, ix stzicanoch vin̈ dꞌa schan̈il pacꞌan̈ altar. 13 Ix lajvi chiꞌ, ix yicꞌanpaxcot sjolom nocꞌ ebꞌ yedꞌ nocꞌ ix xicchajbꞌat chiꞌ, ix sn̈usantzꞌa vin̈ dꞌa yibꞌan̈ altar chiꞌ. 14 Ix maxchaj nocꞌ yol scꞌool yedꞌ nocꞌ yoc, ix sn̈usanpaxtzꞌa vin̈ dꞌa yibꞌan̈ altar chiꞌ, dꞌa yibꞌan̈ nocꞌ vanxo stzꞌa chiꞌ.

15 Ix lajvi chiꞌ, ix yacꞌan silabꞌ vin̈ yuj ebꞌ yetchon̈abꞌ. Ix yicꞌancot nocꞌ chiva vin̈, aton nocꞌ silabꞌ tzꞌacꞌji yuj smul ebꞌ yetchon̈abꞌ chiꞌ. Ix smilancham nocꞌ vin̈, ix yacꞌan nocꞌ vin̈ silabꞌil icha ix yutej yacꞌan nocꞌ bꞌabꞌel chiꞌ. 16 Ix lajvi chiꞌ, ix yacꞌan junxo nocꞌ silabꞌ vin̈ to stzꞌa smasanil icha sleyal. 17 Ix yacꞌanpax ofrenda vin̈ dꞌa tas svaji. Ix yicꞌbꞌat jun bꞌechan̈ ixim harina vin̈, ix sn̈usantzꞌa vin̈ dꞌa yibꞌan̈ altar yedꞌ silabꞌ sn̈usjitzꞌa dꞌa junjun qꞌuin̈ibꞌalil.

18 Ix yacꞌanpax nocꞌ vacax vin̈ yedꞌ nocꞌ chꞌac calnel ix yicꞌcot ebꞌ yetchon̈abꞌ chiꞌ silabꞌil yuj schꞌoxan sjuncꞌolal ebꞌ yedꞌ Dios. A ebꞌ yuninal vin̈ ix icꞌancot schiqꞌuil nocꞌ, axo vin̈ ix tzicanoch dꞌa schan̈il pacꞌan̈ altar chiꞌ. 19 Ix yacꞌanpax xepual nocꞌ vacax ebꞌ yedꞌ xepual nocꞌ chꞌac calnel chiꞌ, aton xepuꞌ ayoch dꞌa sn̈e nocꞌ, dꞌa nocꞌ yol scꞌool yedꞌ dꞌa nocꞌ stut yedꞌ xepuꞌ ayoch dꞌa yibꞌan̈ seyubꞌ nocꞌ. 20 Junn̈ej ix aj nocꞌ xepuꞌ chiꞌ yedꞌ nocꞌ sn̈iꞌ scꞌool. Axo vin̈aj Aarón ix n̈usantzꞌa nocꞌ xepual chiꞌ dꞌa yibꞌan̈ altar. 21 Axo pax nocꞌ sn̈iscꞌol chiꞌ yedꞌ nocꞌ xubꞌ dꞌa svachꞌ, ton̈ej ix bꞌachjiecꞌ dꞌa yichan̈ Jehová, icha ix aj yalan vin̈aj Moisés chiꞌ.

22 Ix lajvi chiꞌ ix yicꞌanchaan̈ scꞌabꞌ vin̈aj Aarón chiꞌ, ix yalan vachꞌ lolonel vin̈ dꞌa yibꞌan̈ ebꞌ yetchon̈abꞌ chiꞌ. Ayic toxo ix lajvi sn̈usantzꞌa silabꞌ vin̈ yuj mul yedꞌ silabꞌ sn̈usjitzꞌa smasanil yedꞌ silabꞌ yic schꞌoxan sjuncꞌolal yedꞌ Dios, ix emixta vin̈ bꞌaj ay altar chiꞌ. 23 Ix lajvi chiꞌ ix och vin̈aj Moisés yedꞌ vin̈ dꞌa mantiado bꞌaj schꞌox sbꞌa Jehová. Axo ix elta ebꞌ vin̈, ix yalan vachꞌ lolonel ebꞌ vin̈ dꞌa yibꞌan̈ ebꞌ yetchon̈abꞌ chiꞌ. Ix lajvi chiꞌ ix schꞌoxan stziquiquial Jehová dꞌa masanil ebꞌ israel chiꞌ. 24 Ix elta cꞌacꞌ dꞌa yichan̈ Jehová chiꞌ, ix sn̈usantzꞌa nocꞌ silabꞌ yedꞌ xepual nocꞌ ayqꞌue dꞌa yibꞌan̈ altar, ix tzꞌabꞌat smasanil.

A ix yilan masanil jun chiꞌ ebꞌ chon̈abꞌ chiꞌ, ix el yav ebꞌ dꞌa tzalajcꞌolal, ix em n̈ojjabꞌ ebꞌ, ix emcꞌoch snan̈al sat ebꞌ dꞌa sat luum.