—Aton jun tic syalelcꞌoch slolonel Jehová ix yalaꞌ:

Ix em numnaj vin̈aj Aarón chiꞌ, man̈xalaj tas ix yal vin̈.

4 Ix lajvi chiꞌ, axo vin̈aj Moisés chiꞌ ix avtan vin̈aj Misael yedꞌ vin̈aj Elzafán, ebꞌ yuninal vin̈aj Uziel yicham vin̈aj Aarón chiꞌ, ix yalan vin̈ dꞌa ebꞌ vin̈:

—Nitzeccot e bꞌa a ex tic dꞌa stiꞌ mantiado bꞌaj ayecꞌ snivanil ebꞌ e cꞌabꞌ eyoc chiꞌ, iqꞌuequel ebꞌ dꞌa spatiquel campamento, xchi vin̈.

5 Ix javi ebꞌ vin̈, ix yicꞌanel ebꞌ chamnac chiꞌ ebꞌ vin̈ dꞌa spatiquel campamento icha ix aj yalan vin̈aj Moisés chiꞌ. Aytooch spichul ebꞌ chamnac chiꞌ dꞌay, aton cꞌapac scꞌantaxon ebꞌ dꞌa yopisio.

6 Ix lajvi chiꞌ ix yalan vin̈aj Moisés dꞌa vin̈aj Aarón yedꞌ dꞌa chavan̈xo ebꞌ yuninal vin̈, aton vin̈aj Eleazar yedꞌ vin̈aj Itamar:

—Man̈ eyiqꞌuel e cꞌox ayqꞌue dꞌa e jolom, man̈ e n̈icꞌchitejbꞌat e pichul yuj e chꞌoxanel e cuscꞌolal. Axo talaj tzꞌaji, tzex champaxi, axo scot yoval scꞌol Jehová dꞌa quibꞌan̈ co masanil a on̈ israel on̈ tic. Palta a masanil ebꞌ quetchon̈abꞌ tic syal yocꞌ scꞌol ebꞌ yuj mach ix satel Jehová yedꞌ cꞌacꞌ. 7 Man̈ ex elpax dꞌa yichan̈ mantiado bꞌaj schꞌox sbꞌa Jehová yic vachꞌ man̈ ol ex chamoc, a ex tic sicꞌbꞌil ex eli, acꞌbꞌiloch aceite to yic Jehová dꞌayex, xchi vin̈. Icha val ix aj yalan vin̈aj Moisés chiꞌ, icha chiꞌ ix scꞌulej ebꞌ.

8 Ix yalanpax Jehová dꞌa vin̈aj Aarón chiꞌ icha tic:

9 —Ayic ol ach och a ach tic, ma ebꞌ uninal dꞌa yol mantiado bꞌaj tzin chꞌox in bꞌa, man̈ eyucꞌ vino, ma tastac pajbꞌinacxo, axo talaj tzꞌaji tzex chami. A jun tic ley tzꞌajcan dꞌa e cal dꞌa masanil tiempo. 10 Man̈ e cꞌulej juntzan̈ chiꞌ yujto yovalil snachajel eyuuj, tastac vachꞌ icha yalan ley yedꞌ tastac man̈ vachꞌoc. 11 Yovalil tze cꞌaybꞌejpax ebꞌ eyetchon̈abꞌ dꞌa juntzan̈ ley ix in chec yal vin̈aj Moisés dꞌayex tic, xchi dꞌa vin̈.

12 Ix lajvi chiꞌ ix yalanpax vin̈aj Moisés chiꞌ dꞌa vin̈aj Aarón yedꞌ pax dꞌa ebꞌ yuninal vin̈, aton vin̈aj Eleazar yedꞌ vin̈aj Itamar:

—Iqꞌueccot ixim harina ixto can dꞌa ofrenda ix tzꞌa dꞌa yichan̈ Jehová, tze bꞌoan ixim pan malaj yich dꞌa yichan̈ altar, yujto a jun ofrenda chiꞌ yic Jehová yaji. 13 Tze vaan dꞌa junoc lugar to yic Jehová yaji, yujto a ofrenda sn̈usjitzꞌa dꞌa yichan̈ Jehová ic yaj yedꞌ ebꞌ uninal. Aton juntzan̈ tic ix alji dꞌayin. 14 Axo pax nocꞌ sn̈iscꞌol sbꞌachchajecꞌ dꞌa yichan̈ Jehová yedꞌ nocꞌ xubꞌ, tzꞌicꞌchajel nocꞌ, a juntzan̈ chiꞌ eyictaxon yaji. Tza chi yedꞌ ebꞌ uninal yedꞌ ebꞌ isil dꞌa junoc lugar to vachꞌ yaji icha syal ley, yujto a juntzan̈ chiꞌ eyictaxon yaj dꞌa silabꞌ schꞌoxan sjuncꞌolal ebꞌ quetchon̈abꞌ yedꞌ Dios. 15 Yujto a nocꞌ xubꞌ tzꞌicꞌjiel chiꞌ yedꞌ nocꞌ sn̈iscꞌol sbꞌachjiecꞌ dꞌa yichan̈ Jehová, junn̈ej tzꞌaj yacꞌji yedꞌ nocꞌ xepuꞌ sn̈usjitzꞌaoc. A cha macan̈ nocꞌ chiꞌ, ic yedꞌ ebꞌ uninal dꞌa masanil tiempo icha ix aj yalan Jehová dꞌayin, xchi vin̈aj Moisés chiꞌ.

16 Ix scꞌanbꞌanpax vin̈aj Moisés chiꞌ yuj nocꞌ chiva ix acꞌji silabꞌil yuj mul. Axo ix yalan ebꞌ vin̈ to toxo ix sn̈ustzꞌa nocꞌ ebꞌ vin̈. Yuj chiꞌ ix cot yoval vin̈ dꞌa vin̈aj Eleazar yedꞌ dꞌa vin̈aj Itamar, ix yalan vin̈ icha tic:

17 —¿Tas yuj maj e chi nocꞌ silabꞌ dꞌa yamaqꞌuil scajnubꞌ Jehová? A jun macan̈ silabꞌ chiꞌ, yic Jehová yaji, yuj chiꞌ ix acꞌji dꞌayex, yuj e chiꞌan nocꞌ, yic tzꞌicꞌjiel smul ebꞌ molanecꞌ dꞌa yichan̈ Jehová. 18 Yujto a schiqꞌuil nocꞌ silabꞌ chiꞌ, maj icꞌjibꞌat dꞌa yol scajnubꞌ Jehová, yuj chiꞌ yovalil to ix e chi nocꞌ dꞌa yamaqꞌuil chiꞌ, icha ix aj valan dꞌayex, xchi vin̈.

19 Ix yalan vin̈aj Aarón icha tic:

—A ticnaic ix yacꞌ silabꞌ ebꞌ yuj smul yedꞌ silabꞌ to stzꞌa smasanil, vachꞌchom icha chiꞌ, palta ina val tas ix javi dꞌa vibꞌan̈. Tato ix in chi nocꞌ silabꞌ ix acꞌji yuj mul chiꞌ, ¿tom chabꞌil in yuj Jehová tza naꞌ? xchi vin̈aj Aarón chiꞌ.

20 Ayic ix yabꞌan vin̈aj Moisés icha chiꞌ, ix schaan scꞌol vin̈.