2 Alec dꞌa masanil ebꞌ eyetchon̈abꞌ to a dꞌa scal masanil nocꞌ nocꞌ ay dꞌa sat luum tic, aton juntzan̈ nocꞌ tic syal e chiꞌani: 3 Nocꞌ sjax yan̈ cha xechan̈ yech. 4 Palta a juntzan̈xo nocꞌ ol val tic, man̈ ol yal-laj e chiꞌan nocꞌ, vachꞌchom sjax yan̈ nocꞌ, palta man̈ cha xechan̈oc yech nocꞌ:

Nocꞌ camello sjax yan̈ nocꞌ, palta man̈ cha xechan̈oc yech nocꞌ, a nocꞌ chiꞌ max yal-laj e chiꞌan nocꞌ.

5 Yedꞌ pax nocꞌ tejón, sjax yan̈ nocꞌ, palta tzijtum yech nocꞌ, a nocꞌ chiꞌ max yal-laj e chiꞌan nocꞌ.

6 Yedꞌ pax nocꞌ nivac chich, sjax yan̈ nocꞌ, palta tzijtum yech nocꞌ, yuj chiꞌ max yal-laj e chiꞌan nocꞌ.

7 Yedꞌ pax nocꞌ chitam, vachꞌchom cha xechan̈ yech nocꞌ, palta max sjaxpax svael nocꞌ, yuj chiꞌ max yal-laj e chiꞌan nocꞌ.

8 Max yal e chiꞌan juntzan̈ nocꞌ nocꞌ chiꞌ, max yalpax eyaman nocꞌ ayic toxo ix cham nocꞌ, yovalil tze naꞌa to man̈ vachꞌoc nocꞌ icha yalan ley.

9 Axo pax nocꞌ ay dꞌa yoltac a aꞌ, nocꞌ ay dꞌa yol aꞌ mar, ma dꞌa yoltac a nivac aꞌ, syal e chiꞌan nocꞌ ay scꞌaxil yedꞌ stuminal spatic. 10 Axo pax nocꞌ malaj scꞌaxil, malaj pax stuminal spatic, max yal-laj e chiꞌan nocꞌ. A nocꞌ chiꞌ yajbꞌentac nocꞌ, vachꞌchom a dꞌa yol aꞌ mar ma dꞌa yoltac aꞌ ay nocꞌ. 11 Yujto yajbꞌentac nocꞌ, man̈ e chi nocꞌ, man̈ eyampax nocꞌ chamnacxo. 12 Masanil nocꞌ malaj scꞌaxil yedꞌ stuminal spatic ay dꞌa yoltac aꞌ, yajbꞌentacocabꞌ yaj nocꞌ dꞌa yol e sat.

13 An̈ejaꞌ pax dꞌa scal nocꞌ much, man̈ ol yal-laj e chiꞌan juntzan̈ nocꞌ ol val tic,^* yujto man̈ vachꞌoc nocꞌ: Icha nocꞌ dꞌiv, nocꞌ vacavoc, nocꞌ chꞌacbꞌa yic a aꞌ, 14 nocꞌ xulem, nocꞌ milano yedꞌ masanil macan̈il nocꞌ xulem chiꞌ, 15 yedꞌ masanil macan̈il nocꞌ joj, 16 nocꞌ avestruz, nocꞌ nivac tonton, nocꞌ xalun̈e yedꞌ masanil macan̈il nocꞌ chꞌacbꞌa, 17 nocꞌ cujubꞌ, nocꞌ cormorán, nocꞌ ibis, 18 nocꞌ pech, nocꞌ julum chay, nocꞌ ostoc, 19 nocꞌ cigüeña yedꞌ masanil macan̈il nocꞌ garza yedꞌ nocꞌ abubilla yedꞌ nocꞌ sotzꞌ.

20 An̈ejtonaꞌ pax masanil nocꞌ cotac nocꞌ tzꞌecꞌ jen̈en̈oc dꞌa jun petan̈il sbꞌey dꞌa sat luum, yajbꞌentacocabꞌ nocꞌ dꞌa yol e sat. 21 Axo pax tato a nocꞌ ay yip yoc sqꞌue tzꞌitnajoc, vachꞌchom sjen̈vi nocꞌ, sbꞌeypax nocꞌ dꞌa sat luum, syal schiji nocꞌ. 22 A dꞌa scal nocꞌ chiꞌ syal e chiꞌan smasanil macan̈il nocꞌ cꞌulubꞌ, nocꞌ nivac cꞌulubꞌ yedꞌ nocꞌ chil. 23 Axo masanil juntzan̈xo nocꞌ cotaquil nocꞌ tzꞌecꞌ jen̈en̈oc, ma tzꞌecꞌ dꞌa sat luum tic, yovalil tzeyaj nocꞌ.

24-28 Tato tze yam juntzan̈ nocꞌ nocꞌ sval tic ayic chamnacxo nocꞌ, man̈ vachꞌoc tzex ajcani icha yalan ley, masanto sqꞌuicꞌbꞌiemi. Masanil nocꞌ nocꞌ ay yech palta man̈ chaxechan̈oclaj, max sjaxpax yan̈, a juntzan̈ nocꞌ chiꞌ nachajocabꞌ el eyuuj to man̈ vachꞌoc nocꞌ. Yaln̈ej tas nocꞌal to chan̈eꞌ yoc palta tzijtum yech mocabꞌ vachꞌoc nocꞌ dꞌa yol e sat. Yuj chiꞌ yaln̈ej mach syaman junoc nocꞌ nocꞌ chiꞌ tato chamnacxo nocꞌ, man̈ vachꞌoc tzꞌajcani, icha yalan ley. Icha pax chiꞌ junoc mach tzꞌicꞌanchaan̈ nocꞌ chamnac nocꞌ chiꞌ, yovalil sjuqꞌuel spichul, palta manto vachꞌoc tzꞌajcani masanto sqꞌuicꞌbꞌiemi. Man̈ vachꞌoc juntzan̈ nocꞌ chiꞌ icha yalan ley.

29-30 Axo masanil nocꞌ nocꞌ tzꞌecꞌ dꞌa sat luum, nachajocabꞌ el eyuuj to max yal schiji juntzan̈ nocꞌ tic: Icha nocꞌ cꞌuxum boton, nocꞌ chꞌoov, nocꞌ cꞌocꞌon yedꞌ masanil macan̈il nocꞌ pajtzaꞌ yedꞌ masanil macan̈il nocꞌ tzꞌecꞌ n̈ern̈onoc ma tzꞌecꞌ jachjonoc: Aton nocꞌ ayin, nocꞌ lagarto, nocꞌ patix yedꞌ nocꞌ tzalajcꞌabꞌ.

31 A dꞌa scal masanil nocꞌ nocꞌ, a juntzan̈ nocꞌ tic, nachajocabꞌ el eyuuj to man̈ vachꞌoc nocꞌ icha yalan ley, yuj chiꞌ yaln̈ej mach syaman nocꞌ ayic toxo ix cham nocꞌ, man̈ vachꞌoc tzꞌajcani masanto sqꞌuicꞌbꞌiemi.

32 Qꞌuinaloc ay junoc tas bꞌaj tzꞌem nocꞌ chamnac nocꞌ chiꞌ, a jun chiꞌ, man̈ vachꞌoc tzꞌajcani, icha yalan ley: Vachꞌchom a junoc te teꞌ, junoc pichul, junoc tzꞌuum, junoc coxtal, ma junoc yamcꞌabꞌ yic munlajel, tato tzꞌem junoc nocꞌ chamnac nocꞌ chiꞌ dꞌa yibꞌan̈, yovalil slabꞌchajem dꞌa scal a aꞌ. Palta manto vachꞌoc tzꞌajcani, masanto sqꞌuicꞌbꞌiemi, ichato chiꞌ vachꞌ tzꞌajcani.

33 Tato tzꞌem junoc nocꞌ nocꞌ chiꞌ dꞌa yol junoc lum chen ayic toxo ix cham nocꞌ, a tas ayem dꞌa yol lum chiꞌ, man̈ vachꞌoc tzꞌajcani, axo jun chen chiꞌ, yovalil smacꞌjipoj luum. 34 Yaln̈ej tas chibꞌil vailal yedꞌ yal ayem dꞌa yol jun chen chiꞌ, ma uqꞌuem, man̈ vachꞌoc tzꞌajcani. 35 Yuj chiꞌ tato tzꞌem junoc nocꞌ chamnac nocꞌ chiꞌ dꞌa yibꞌan̈ junoc tasi, man̈ vachꞌoc tzꞌajcani, vachꞌchom a junoc horno, ma junoc yedꞌtal bꞌaj tzꞌoch cꞌacꞌ, yovalil spojjieli. A jun yamcꞌabꞌ chiꞌ man̈xo vachꞌoc icha yalan ley, yuj chiꞌ man̈xo vachꞌoc pax dꞌa yol e sat.

36 Palta a sjaj a aꞌ, ma aꞌ ucꞌbꞌilaꞌ vachꞌchom tzꞌem nocꞌ chamnac nocꞌ dꞌa yol aꞌ, vachꞌn̈ej yaj aꞌ, an̈ej jun mach tzꞌicꞌanqꞌueta nocꞌ chamnac nocꞌ chiꞌ dꞌa yol aꞌ man̈ vachꞌoc tzꞌajcani.

37 Qꞌuinaloc tzꞌem junoc nocꞌ chamnac nocꞌ chiꞌ dꞌa yibꞌan̈ junoc macan̈ in̈at tzꞌavchaji, a jun macan̈ in̈at chiꞌ max ixtaxel-laj. 38 Palta tato a jun macan̈ in̈at labꞌanxo, tzꞌem junoc chamnac nocꞌ chiꞌ dꞌa yibꞌan̈, a juntzan̈ in̈at chiꞌ man̈xo vachꞌoc tzꞌajcani.

39 Qꞌuinaloc scham junoc nocꞌ nocꞌ to schiji, a mach syaman nocꞌ, man̈ vachꞌoc tzꞌajcani masanto sqꞌuicꞌbꞌicanemi. 40 A mach schiꞌan sbꞌacꞌchil nocꞌ chamnac nocꞌ chiꞌ yovalil sjuqꞌuel spichul, man̈ vachꞌoc tzꞌajcani masanto sqꞌuicꞌbꞌicanemi. A mach tzꞌicꞌanelta junoc chamnac nocꞌ chiꞌ yovalil sjuqꞌuel spichul, man̈ vachꞌoc tzꞌajcani masanto sqꞌuicꞌbꞌiemi.

41 Man̈ e chi juntzan̈ nocꞌ nocꞌ sn̈ervi, ma sjachvi dꞌa sat luum, yujto man̈ vachꞌoc nocꞌ.

42 Masanil nocꞌ nocꞌ sn̈ervi, ma sjachvi dꞌa sat luum, vachꞌchom nocꞌ sbꞌey yedꞌ schan̈il yoc, ma nocꞌ tzijtum yoc, masanil juntzan̈ nocꞌ chiꞌ man̈ vachꞌoc nocꞌ icha yalan ley, yuj chiꞌ man̈ e chi nocꞌ. 43 Man̈ e juel e bꞌa a ex tic yuj nocꞌ nocꞌ man̈ vachꞌoc chiꞌ, yujto man̈ vachꞌoc tzex ajcan yuj nocꞌ. 44 A in ton Jehová e Diosal in, yuj chiꞌ bꞌesequel e bꞌa dꞌa juntzan̈ man̈ vachꞌoc chiꞌ, yujto vachꞌ inn̈ej, yuj chiꞌ te max yal eyixtanbꞌat e bꞌa yedꞌ juntzan̈ nocꞌ chiꞌ. 45 A in Jehová in, ix ex viqꞌuelta dꞌa Egipto, e Diosal in, yuj chiꞌ te vachꞌocabꞌn̈ej tzeyutej e bꞌa yujto vachꞌ inn̈ej.

46 Aton val masanil juntzan̈ checnabꞌil tic dꞌa masanil nocꞌ nocꞌ, nocꞌ much yedꞌ masanil nocꞌ nocꞌ ay dꞌa yoltac a aꞌ yedꞌ masanil nocꞌ tzꞌecꞌ jachachoc dꞌa sat luum tic, sval dꞌayex 47 yic vachꞌ snachajel eyuuj bꞌajtil ay nocꞌ vachꞌ syal schiji yedꞌ nocꞌ man̈ vachꞌoc max yal schiji, xchi Jehová, xe chi.