2 Al masanil juntzan̈ tic dꞌa ebꞌ etisraelal: Tato a junoc ix ix tzꞌaj junoc svinac unin, yovalil uqueꞌ cꞌual man̈ sacoc yaj ix icha sleyal, ichataxon yic syilan sbꞌislabꞌ uj ix dꞌa juntac el. 3 Dꞌa val yucubꞌixial yaj jun vinac unin chiꞌ, tzꞌacꞌji circuncidar. 4 Axo pax ix nunabꞌil chiꞌ, 33 cꞌualto man̈ vachꞌoc tzꞌajcan ix, ichato vanto sacbꞌitan sbꞌa ix, max yal-laj syaman junoc tas ix to vic yaji, max yalpax sbꞌat ix bꞌaj ay in cajnubꞌ ayic manto tzꞌacvoc juntzan̈ cꞌual chiꞌ. 5 Palta tato ix unin tzꞌaj jun, 14 cꞌual tzꞌeqꞌui ayic manto sacoc yaj ix, ichataxon tzꞌaj dꞌa sbꞌislabꞌ uj dꞌa juntac el, slajvi chiꞌ 66 cꞌual scan ix yic sacbꞌitan sbꞌa.

6 Ayic stzꞌacvi juntzan̈ cꞌual yic sacbꞌitan sbꞌa ix yuj yuneꞌ ix alji chiꞌ, vachꞌchom vinac unin ma ix unin, yovalil syicꞌcot junoc nocꞌ quelem calnel jun abꞌil sqꞌuinal ix silabꞌil yedꞌ junoc nocꞌ yaln̈ej macan̈il paramuch, syacꞌ ix silabꞌil yuj yacꞌji tup smul. A juntzan̈ chiꞌ tzꞌacꞌji dꞌa junoc vin̈ sacerdote dꞌa yichan̈ mantiado. 7 Axo jun vin̈ sacerdote chiꞌ tzꞌacꞌan dꞌayin silabꞌil yic vachꞌ tzꞌacꞌji tup smul ix. Icha chiꞌ tzꞌaj sacbꞌixican ix.

Aton juntzan̈ sleyal tic ayic tzꞌalji vinac unin, ma ix unin.

8 Palta tato a ix nunabꞌil chiꞌ malaj junoc nocꞌ scalnel chiꞌ syal yacꞌani, syicꞌcot chavan̈oc nocꞌ paramuch ix yaln̈ej tas macan̈il, jun nocꞌ stzꞌa silabꞌil, jun nocꞌ tzꞌacꞌji silabꞌil yuj yacꞌji tup mul. Axo junoc vin̈ sacerdote tzꞌacꞌan silabꞌil yic vachꞌ tzꞌacꞌji tup smul ix. Icha chiꞌ tzꞌaj sacbꞌixican ix, xchi Jehová dꞌa vin̈aj Moisés chiꞌ.